Tutekany Kwipuwangej pa Ndond Yifanyidina
1 Mu machuku minam makash, etu awonsu tuswiridin kuswimpaku mijikit yisu yimwing ni yikwau. Choviken komb anch twipuwangejaku pakemp. Pakwez, anch twasutish chisu chivud mu kwipwish usweral ni kuyendil arund netu, tukwel tusambisha kwipan pakemp mu mijikit ya muspiritu. Chawiy lel tufanyidina kutek kwipuwangej pa ndond yifanyidina. (Mat. 5:3) Ov mu mutapu ik? Nich kulondul yiyul yidia mu Efes 5:15-17.
2 Twitekinany Mimbu: Paul wafunda anch In Kristu afanyidin ‘kubabal’ nich mutapu ushichau mu mwom wau. Chakwel kulam yisu ya kwipuwangej mu mimbu yau yifanyidina, chifanyidin kwisikan ni kwilam. Chidi cha manangu kutongin nakash mutapu tukata kusadilang chisu chetu chakad kwikal ni mudimu. Kwiswedish kufanyidin kwikal ni ukwash; tufanyidinap kuman mud tusutishin chisu chetu chamwamu ap kwikal aziyina nakash. Anch kupwa kwa kusal mu mujikit kanang twajingunin yovil ya kuburen chom kanang, kuburen kusanger, ap kand chitongijok kanang cha kwifish nich, chinech chimekeshin anch chifanyidin kukarumun mutapu wetu wa kusadil chisu.
3 Tusadilany Manangu: Paul wapana chiyul cha ‘kulam chisu chifanyidina’ mulong wa yom yipandakena usey ya mwom, ni kulik kwikal “ayisup.” In Kristu ipanina kud Nzamb kakutwishap kulik mwom wau kwikal wengamidina pa kwipuwangej. Ap anch kupim ni kwipwish usweral kukutwish kuchirish kand usu mu mujimbu, musul wa usu wa muspiritu udi usu wa kusadish wa Nzamb. (Isa. 40:29-31, NW) Mijikit ya uteokras—kwilej Baibel, kukumangan ku yikumangan ya chikumangen, kwipan mu midimu ya chingand yawiy yikata kutukwash kutambul spirit wend—kudiap kwiswedish bwat.
4 Tutekany pa Ndond ya Kusambish Yom ya Usey: Paul wayikasikesha In Kristu ‘kwikasikesh kushinshikin mudia rusot ra Yehova.’ (Efe. 5:15-17) Yesu wafundisha anch mijikit yetu yifanyidin kwengamin pa Want wa Nzamb mud chom cha usey cha kutek pa ndond ya kusambish mu mwom wetu. (Mat. 6:33) Chitufanyidin bil kusal yom yikututwishisha kushakam kwambatan nich kwipan kwetu kud Yehova. Kupwa, chisu cha kwipuwangej chikutwish kwikal pa ndond yifanyidina. Pitukwipuwangeja, yikwikal nich chibudikin cha ukash wa mujimbu, ni tukez kuchisanger nakash kamu.—Mul. 5:12.