Kwipuwangesh Kuwamp Kutudishina
“Chawiy anch wadianyip nchik, ap wananyip nchik, ap yawonsu yiwasalanya, salany ku uyaj wa Nzamb.”—1 KORINT 10:31.
1, 2. Ov, mulong wak chifanyidina kuman mijikit ya kwisangaresh mud “kupan kwa riy ra Nzamb,” pakwez Bibil uletin dibabesh ik dikash?
CHIDING cha chivadik kusal mijikit yikutwisha kutuletin musangar. Nzamb wetu mwin musangar, Yehova, utusotidin kusanger mwom, ni uletin yitenchik yivud chakwel chitwishika kusanger mwom. (1 Timote 1:11; 6:17) Mwant Salomon mwin manangu wafunda anch: ‘Nij anch, kwikil chom chipandikenamu kuwap . . . anch muntu mwawonsu anch wadia, ni kuna, ni kusanger mu mapit ma midimu yend, kwawiy kupan kwa riy kwa Nzamb.’—Mulej 3:12, 13.
2 Kusanger kwinoku mud anch muntu wiman chakwel kusanger mu mapit ma midimu yend kukat chakin kamu kutudish, pakampwil mu kubombakan kusangareshina nich dijuku ni arund. Kusangar kwinoku kufanyidin kumekan kamu mud “kupan kwa riy kwa Nzamb.” Inge, yitenchik yivud yidiokila kud Nzamb yitwinkishinap mbil ya kwiyandjik mu misambu yakad mipak. Bibil ufishin nich kuleu, kupumb kudia, ni masandj, ubabeshin anch antu asadininga yom yiney “kakuswanip want wa Nzamb.”— 1 Korint 6:9, 10; Jinswir 23:20, 21; 1 Pita 4:1-4.
3. Chom ik chikutukwasha kushal achila ku mes muspiritu ni mu kuchingel dichuku dijim dia Yehova didia kurutu?
3 Mu machuku minam makash mansudiel, kupandakanamu muchadinga, in Kristu akat kurish nich yikokujol ya ngikadil ya mwom mu mangand mijondila pakad kulondul yisal ya mangand. (Yohan 17:15, 16) Mud mwasambelau kulond, antu a chizaz ch’ilel ikadil kal “akwisangarish ayinau, Nzamb bwat” mu chilik chakwel anch awiy ‘kakwijikap’ uman ulejena anch “mar mapandakena” madi piswimp. (2 Timote 3:4, 5; Mateu 24:21, 37-39) Yesu wayibabesha in kwilejend anch: “Dimukany en ayinen, palemp michim yen yakifund kudia ni kukwachik kwa maruvu ni yom ya mwom winou, ni dichuku dinidia dikwez kudi en mudi kwoz kwa chilemb.” (Luka 21:34, 35) Mud atushalapol a Nzamb, tukwatin mupak wa kutesh dibabesh dia Yesu. Tukat kwikasikesh kushal achila ku mes muspiritu ni kulam mu manangu dichuku dijim dia Yehova.—Sofoniy 3:8; Luka 21:36.
4. (a) Ov, mulong wak chidi chikash kutan kwipuwangesh kuwamp? (b) Chiyul ik chidia mu Efes 5:15, 16 chituswiridina kusadil?
4 Chiswapelingap kwiyep yisal yiyimp ya mangand, mulong Djabul wayikadishil kal yiswiridikina ni yitwishikina kuyitan. Chidi pakampwil chikash pitukata kukimb kwitudish ap kwipuwangesh. Yom yivud yiletina mangand ayitenchika chakwel kusangaresh “maku ma mujimbu.” (1 Pita 2:11) Kwipuwangesh kuyimp kudi mu miab yijikena, pakwez kukutwish kand kwandam mu ujindj mu dijuku kusutil ku yafundilau kal, TV, Internet, ni video. Chawiy lel, Dizu dia Nzamb diyiyudil in Kristu kwa manangu anch: “Babalany mudi muukata kwendany, kangal wendany mudi antu akad kubabal, pakwez ching mudi ababela; lamany chisu cha muten, mulong machuku mayimp madi kwaku.” (Efes 5:15, 16) Ching anch twalondul piswimp chiyul chinech chawiy tukutwisha kushinshikin anch kangal kwipuwangesh kuyimp kweza kutukwata, kutubwika, mwawiy, ap kushesh urund wetu nend Yehova, nich kupwishil mu kusheshik kwetu!—Yakob 1:14, 15.
5. Ku chom ik kutukata kutanin ditudish dijim?
5 Mulong in Kristu akwet mwom ukwatikena nakash, chakin kamu ayingin kwov pa chisu kanang kuswir kwa kusanger mijikit kanang ya kwipuwangesh. Chakin kamu, Mulej 3:4 ulondil anch kudi “chisu . . . cha kusip” ni “chisu . . . cha kuja maj.” Chawiy Bibil kameningap kwipuwangesh mud kushesh chisu. Pakwez kwipuwangesh kufanyidin kutudutish, kangal kutek mu chak mwom wetu wa muspiritu ap kukangesh mijikit ya muspiritu. In Kristu aswila ij kusutil ku yamanau anch musangar ujim udiokiling ku kuyinkish antu akwau. Atekin pa ndond ya kusambish kusal rusot ra Nzamb mu mwom wau ni akat kutan ‘kwitudish kwakin kwa mipim yau’ pa kwitiyin mpand yiswakela ya Yesu.—Mateu 11:29, 30; Midimu 20:35.
Kutond Kwipuwangesh Kwitiyikina
6, 7. Chom ik chikutwisha kukukwash kujingunin kwipuwangesh kwitiyikina ap kwakad kwitiyik?
6 Mutapu ik tukutwisha kwijik anch mulad kanang wa kwipuwangesh witiyikin kud mwin Kristu? Anvaj ayitakedil anau, ni amakurump akat kupan ukwash uswiridinau. Chakin kamu, chikwikalap cha usey anch antu indjing atuleja anch buku kanang, filim, masengan, maj, ap muminy yitiyikinap. Paul walonda anch “Antu akudila kal . . . ifumbil kal manangu mau mu kusal kwa pichuku pichuku ku kujingunin kuwap ni kuyip.” (Hebereu 5:14; 1 Korint 14:20) Bibil utwinkishin yijil ya kututakel. Kom key, kafumbau kal ku Dizu dia Nzamb, kakez kukukwash anch wa katesh.—1 Timote 1:19.
7 Yesu walonda anch “mutond akat kuwijikin ku mabuj mau.” (Mateu 12:33) Anch kulondul kwipuwangesh kwasong mabuj mavudila ma chisum, masandj, ap ritiyin ra aspiritu ayimp, chifanyidin kukulik. Kwitiyikinap kand anch kutekin mu chak mwom ap ukash wa mujimbu wa muntu, anch kukat kushesh nfalang ap kuziyish muchim, ap kukat kuyipwakesh antu akwau. Kambuy Paul utubabeshin anch, anch twatap kom ka mwanamakwetu, tusadil chitil. Paul wafunda anch: “Anch en wasalany chitil mwamu kudi akadivar, ni kuyitap ku kom kau pikachidia kaziyil, ukat kusalany chitil kudi Kristu. Chawiy anch mbij jamupwakesh mwanamakwam, am kinikez kajidiap kand mbij chikupu, mulong nikamupwakesh mwanamakwam.”—1 Korint 8:12, 13.
8. Ubaj ik udiaku ku kusengan mafilm ma masengan ma ordinater ni video?
8 Mu makashing mwizwil too nich mafilm ma masengan ma ordinater ni ma video. Mamwing makwet masengan makad ubaj ni matudishina, pakwez kwipuwangesh kwinoku kwizwil nich yom yifishilay nich Bibil. Chakin kamu chidiap cha wer anch masengan masotil anch in kumasengan itapa yitat ni kujipan ap asal mwi njil ya masandj! Yehova uyikisin antu ‘akatila chisum.’ (Kuseng 11:5; Jinswir 3:31; Kolosay 3:5, 6) Ni anch kusengan masengan kwakuletin kwibaz ap chisum, makurumbangeshin manangu, ap kukusheshin chisu chey chivud, chawiy jingunin disheshik dia muspiritu dikwezaku ni sal yitenchik swa.—Mateu 18:8, 9.
Kuwanyish Maswir ma Kwipuwangesh mu Jinjil Jishitwila
9, 10. Chom ik chikatau kusal antu in manangu mulong wa kuwanyish maswir mau ma kwipuwangesh?
9 Pa yisu yimwing, in Kristu ipwiling anch: “Kwipuwangesh ik kwitiyikina? Mulong masengan mavud maletina mangand movijadinap ni yijil ya Bibil.” Ijik anch chitwishikin kutan kwipuwangesh kuwamp, pakwez kwitin usu. Chitining kusambel kutenchik, pakampwil ku mutambu wa anvaj. Avud akat kutan kwipuwangesh kuwamp mu dijuku ni mu chikumangen. Kudia yakudia yisangareshina ni kwisambin yishiken ya dichuku ap minsamb ya Bibil chidi cha kusangaresh ni chikat kutung. Kuya kwiswedish, masengan mawamp, maweny makuya mu kwipuwangesh, ap chitwishikin kutenchik kuya mu kwend. Kwipuwangesh kwinoku kuwamp kukutwish kwikal kusangareshina ni kudutishina.
10 Mukurump umwing ni mukajend alila an asatu ulondil anch: “Kusambish kamu pa wanikanch, anetu adinga nich mbil ya kutond kutukutwisha kuya pa chisu cha konje. Pa kusut kwa yisu, twamwinkisha mwan ni mwan mbil ya kumuladikij murund muwamp, chinech chikadishang konje usangareshina nakash. Twajingunina yishiken yimwing ya usey mu mwom wa anetu. Chilakej, pa kusut kwa yisu twaladikija dijuku ni arund a mu chikumangen kwol kwetu. Twisuka ni kudia ni kusengan masengan. Yisu yimwing twaya mu motak ni kwendil mu mikandu, twasadila yisu yiney mulong wa kwilej chitangil cha Yehova.”
11, 12. (a) Chom ik ukutwisha kusal chakwel kuladikij antu akwau mu yitenchik yey ya chisu cha kwipuwangesh? (b) Antu avud kezap kuvuramen misambu ya mutapu ik?
11 Ov, ukutwish witanduril amwiney ap mud dijuku kuyiladikij antu akwau piutenchikina yisu ya kwipuwangesh? Antu amwing, mud mwadia-mufu, mujich, ap nvaj ulidina dijuku amwinend, akutwish aswiriken dikasikesh. (Luka 14:12-14) Ukutwish kand kuyiladikij antu amwing adia asu, chakin kamu, nich kudimuk, kangal kuyitek antu akwau mu yipwichik yiyimp. (2 Timote 2:20, 21) Anch chayikasiken ayibid kuya kulemp, pamwing ap yitenchik yikutwish kusadik kulet yakudia ku yikumbu yau.—Hebereu 13:1, 2.
12 Ku misambu kudi angendj adila yakudia yiswapela, tesh mutapu washikenau antu akwau kwikal in Kristu, ni kwilej yom yayikwasha kushal ashinshamena kud Nzamb yikala yakadau antu avud kutwish kuvuramen. Chitwishikin kusadil minsamb ya Bibil yikal mambamb, ni awonsu adia pinipa, pamwing ni an, aladikijinau kwez. Minsamb yiney yikutwish kwikal ya usey nakash wa dikasikesh pakad muntu ap umwing iyova anch kafanyidinap.
13. Mutapu ik washay Yesu ni Paul chilakej mu kumekesh ni kwitiyij muchim wa kwakan?
13 Yesu washa chilakej chiwamp mu kuyimekeshin ni kwitiyij muchim wa kwakan. Ndiy wasadila yisu yiney mulong wa kupan yiyukish ya muspiritu. (Luka 5:27-39; 10:42; 19:1-10; 24:28-32) In kwilejend a kusambish imburija chilakej chend. (Midimu 2:46, 47) Kambuy Paul wafunda anch: “Nikat kunanikan kukumanany, chakwel nikwinkany kupan kwa [s]piritu ni en ukujamany. Chinech chawiy am nikwikal ni yenen mu kwongojijan ku ritiy retu.” (Rom 1:11, 12) Chilik chimwing, minsamb yetu yifanyidin kwikal yisu ya kupanijan dikasikesh dia muspiritu.—Rom 12:13; 15:1, 2.
Yivurish Yimwing ni Yibabesh
14. Ov, mulong wak chidiap cha manangu kusal misambu ya kwipuwangesh yijim-yijim?
14 Chidiap cha manangu kusalang minsamb yijim-yijim, mulong chikasikening kuyitakel. Pa chisu chakad kupwitijan nich mijikit ya muspiritu, majuku kanang ma kukwat mupak wa kusanger kuya kutal chitangil kanang pamwing ap kusengan masengan makad kusot kubechijan. Anch amakurump amwing, ankwash a midimu, ap antu amwing akudila ikal ku musambu, aletining ngikadil yiwamp ni chisu chinech chikutwish kwikal cha kwitudish nakash.
15. Ov, mulong wak kutenchik musambu kwitining kuutakel nawamp?
15 Ku misambu ya kwipuwangesh, kafanyidinap kuvuramen maswir ma kuyitakel nawamp. Piusangaredina kumekesh muchim wa kupan, ov, ukutwishap kwov kuyip anch watesh anch mulong wa kudiuwol kumwing ku mutambu wey, angendj ipwakel mulong wa yasadikina kwol kwey? Shinshikin chijil chisambidinau mu Kuvurik Yijil 22:8. Mwin Isarel utungina chikumbu chisu amwitang kutung jinkwatish kunyingumwish chikumbu chalalela piur, padingau chisu ni chisu kusadil angendj mulong wa kwipuwangesh. Ov, mulong wak? “Chakwel chikumbu chey kangal chez chileta mash anch muntu weza wapalikaku.” Mwinjil yawiy yimwing, chiusadila—pakad kulet yijidik yakad kwisikan—mulong wa kuyiking angendj ey ipuwangeshina ku musambu ufanyidin kumekesh kalimish mulong wa yisakin yau ya ku mujimbu ni ya muspiritu.
16. Manangu ik mafanyidinau kusadil anch kudi maar ku musambu wa kwipuwangesh?
16 Anch kukwikal kuna maar ku musambu wa kwipuwangesh, chifanyidin kuchisal nich kudimuk nakash. In Kristu amwing akwatining mupak wa kupan maar ching anch ayinau akutwish kutakel yiyinkishinau ap yininau angendj au. Kichifanyidinap kushil ndond chom ap chimwing chikutwisha kuyipwakesh antu akwau ap kumupak muntu ap umwing kuna pakad kupep pa chopu. (Efes 5:18, 19) Mulong wa mayingishin kushalijan, angendj amwing akutwish kukwat mupak wa kulik kuna maar. Mu jindond jivud mudi reng ra antu kwambatan nich chijil akutwisha kuna ni in Kristu afanyidin kuziyil ku yijil ya Kaisar ap anch yijil yiney yidi yikash.—Rom 13:5.
17. (a) Anch kudi muzik ku musambu wa kwipuwangesh, ov, mulong wak chidi cha usey ujim anch mwin kwakan ikal mwin kutond mizik? (b) Anch kwikal kuja ku musambu, mutapu ik ufanyidina kumekesh kwitudish?
17 Mwin kwak angendj ufanyidin kushinshikin anch muzik, maj, ap kwiswedish kwin kwawonsu kwambaten nich yijil ya Ukristu. Kukatish kwa muzik kuding kushalijadina, ni chiswapel kwikal nich mizik kushalijan. Pakwez, mizik yivud ya katat yikasikeshidin spiritu wa wimbwambol, masandj, ni chisum. Kudi kuswir kwa kwikal mwin kutond. Muzik witiyikina ufanyidin kwikal ching witudishina, pakwez kand kiufanyidinap kwikal wa kulangwish maku ma masandj, ubudinau nich masok nakash ni dizu dia piur. Dimuk anch kangal wamushil muntu wakad kwov nawamp kurumburik kwa yijil ya Ukristu atonda mizik ap kumushil kushirish ni kujimbish dizu. Maj makad kwisikan ma chaku chiyimp, makasikeshina kuveng kwa mbund ni ntul kulangwishina maku ma masandj, kimafanyidinap kamu kud mwin Kristu.—1 Timote 2:8-10.
18. Mutapu ik ukutwishau anvaj kuyilam anau ku kushinshikin mijikit yau ya misambu ya kwipuwangesh?
18 Anvaj in Kristu afanyidin kwikal a kusambish kwijik yik yitenchikinau ku misambu ya kwipuwangesh kuyiladikijinau anau, ni chikwikal cha manangu yisu yivud kuya nau pamwing. Cha ushon, anvaj amwing ayilika anau kuya ku misambu yakad ntakel kwawilau avud au mu masandj ap ngikadil yikwau mud yiney. (Efes 6:1-4) Ap anch asand ikadil kal amakurump ni amekeshin kal anch akutwish kusend yisend yau ayinau, kuchidi ni katat kuswir kwa kuyikwash chakwel ‘achina maku ma usand.’—2 Timote 2:22.
19. Uyakin ik ukutukwasha kwasin pa yitufanyidina ‘bil kukimb’?
19 Pa chipatu kwipwish usweral ni kwipuwangesh kudia kufanyidina ni kutudishina kukutwish kwikadish mwom usangareshina. Yehova katukishinap etu musangar winou, pakwez chakin kamu twij anch mijikit yiney ayinay kiyikatap kutukwash kwitekin dipit ap disu dia muspiritu mwiur. (Mateu 6:19-21) Yesu wayikwasha in kwilejend kutesh anch ‘kusambel bil kukimb want ni kutentam kwa Nzamb’ chawiy chom chijim mu mwom, kangal yitukutwisha kudia ap kuna ap kudjal, “yom yiney yawonsu yawiy yikatau kukimb in mangand.”—Mateu 6:31-34.
20. Yom ik yiwamp yidiokila kud Mwin Kupan Mujim yikutwishau kusambel kusanger atushalapol ashinshamena a Yehova?
20 Inge, ap anch ‘twadia nchik, ap anch twana nchik, ap chom chin chawonsu chitukusala,’ tukutwish kusal ‘yom yawonsu mulong wa uyaj wa Nzamb,’ nich kumujikitish Mwin Kupan Mujim mulong wa yom yiwamp yitwasangaredina mu kwisikan. (1 Korint 10:31) Mu Paradis wend wa pansh udia kurutu oku, kukez kwikal yisu yakad kusul ya kusanger muchifanyidina muchim wa kupan wa Yehova, pamwing nich wimbay uwamp wa awonsu awanyishina yitinay yitentamina.—Kuseng 145:16; Isay 25:6; 2 Korint 7:1.
Ov, Uvurikin?
• Ov, mulong wak chiyikasikedin ilel in Kristu kutan kwipuwangesh kufanyidina?
• Yisu mitapu kanang ya kwipuwangesh yimekena kwikal ya kusangaresh majuku ma in Kristu?
• Pa chisu cha kusanger kwipuwangesh kuwamp, yivurish ni yibabesh ik yifanyidinay muntu kulam mu manangu?
[Chipich chidia pa paj wa 24]
Tondany kwipuwangesh kukata kusong mabuj mawamp
[Chipich chidia pa paj wa 25]
Mitapu ik ya kwipuwangesh yilikiningau in Kristu?