‘Tusalany Yom Yawonsu Mulong wa Uyaj wa Nzamb’

MULONG tudi atushalapol a Nzamb ipanina, tukwet chisend cha kumekesh uyaj wa Yehova mu yom yawonsu tulondina ni tusadina. Kambuy Paul walejana mbil yiney yifanyidina kulondul pafunday anch: ‘Ap anch wadiany ap anch wanany ap wasalany chom chin chawonsu, salany yawonsu mulong wa uyaj wa Nzamb.’ (1 Kor. 10:31) Chinech chitin kulimish mbil jitentamina ja Yehova, jimekeshina wuntu wend uwanyidina. (Kol. 3:10) Mulong wa kwikal antu atumbila, tufanyidin kumwimburij Nzamb.—Efes 5:1, 2.

² Mulong wa kuyikwash in Kristu pa mulong winou kambuy Pita wafunda anch: “Ikalany mudi an amuziyidila Nzamb, kangal walondulany maku mayimp ma mujimbu, mudi muwadinganya pakur, piwadinganya kand kal wijikany yom ya Nzamb. Mudi mudiay wakutazukanya utumbil, niyen ikalany atumbila mu yaku yen yawonsu. Mulong afundil mu Mukand wa Nzamb anch: ‘Ikalany antu atumbila, mulong am nidi utumbila.’” (1 Pita 1:14-16) Mudi in Isarel a pasak, antu adia mu chikumangen cha win Kristu ayitin kulam mwikadil wishitwila. Chinech chirumburikin anch afanyidin kwikal zwang, kwikal atokishinau ku chitil ni ku mwikadil wa mangand. Ayitonda mulong wa kusal mudimu utumbila.—Kub. 20:5.

³ Tulamin kwishitul mulong tulondwil yijil ni mbil ya Yehova yilejenau patok mu Mifund Yitumbila. (2 Tim. 3:16) Kusutin dilejan dia Bibil, twileja kumwijik Yehova ni mbil jend ni twamusejina piswimp. Dilejan dietu diatwinka kashinsh ka kukimb bil Want wa Nzamb ni kutek rusot ra Yehova pa ndond ya kusambish mu mwom wetu. (Mat. 6:33; Rom 12:2) Chinech chita anch tudjala wuntu usu.—Efes 4:22-24.

KWISHITUL MU SPIRITU NI MU MANANGU

⁴ Chidingap chiswapela kulamat kwi mbil jitentamina ja Yehova. Mukankuny netu Satan Djabul, ukat kusal usu wa kutudiosh ku uyakin. Chibachikin cha mangand mend mayimp ni mwikadil wetu wa chitil yikat kusal anch yom yitukasiken. Kushakam kukwatijan ni kwipan kwetu kwitin kurish nakash mu spiritu. Bibil utulejin anch kangal twakashimuk anch rupompat ap yakamish yatushiken. Tukuman mar mulong wa kutentam. (2 Tim. 3:12) Pakwez tukwikal ni musangar anch yakamish yatushiken, ni anch twijik anch yitushikedin mulong tusadin rusot ra Nzamb.—1 Pita 3:14-16; 4:12; 14-16.

⁵ Ap anch Yesu wading muntu uwanyidina, wileja kuziyin kusutin mar mamanay. Kaziyinap ku yoziu ya Satan ni kovap ris ra yom ya mangand minam. (Mat. 4:1-11; Yoh. 6:15) Yesu katongap dichuku ap dimwing kujip chijil cha Nzamb. Ap anch antu amukisa mulong wa kushinshaman kwend, pakwez walamata kwi mbil jitentamina ja Yehova. Machuku makemp kurutu kwa rufu rend, Yesu wayibabesha in kwilejend anch mangand makukukisany niyen. Kudiokal chisu chinicha, in kwilej a Yesu amana mar nakash, pakwez ikala ni mushiku pa kwijik anch Mwan a Nzamb wapandakana mangand.—Yoh. 15:19; 16:33; 17:16.

⁶ Mulong wa kulik kwiyandjik mu milong ya mangand, tufanyidin kulimish mbil jitentamina ja Yehova, mudi mwasalay Nsalejetu. Tufanyidinap kwetu ching kwiyep milong ya politik ap kukwash yitenchik yisadina usu wa kurijek mashakamin ma antu, tufanyidin kand kwipuk yaku yiyimp ya mangand minam. Tusendin ni usey nakash chiyul chidia mu Jakobu 1:21 chilondina anch: “Chawiy djibulany yaku yitakanena ni yisalijok yawonsu yiyimp, akany nich kwitudish dizu dikat kutekay Nzamb mu michim yen, mulong diawiy dikutwisha kukupandishany.” Kusutin kwilej ni kukumangan ku yikumangan, tukutwish kuman anch “dizu” dia uyakin dijamin katat mu manangu ni mu michim yetu, mwamu tukutwishap kand kwov ris mulong wa yom yidia mu mangand. Mwin kwilej Jakobu wafunda anch: ‘Ov, wijanyap kwen anch, kwikal murund wa mangand kudi kwikal mukankuny wa Nzamb? Muntu mwawonsu ukatina kwikal murund wa mangand, ndiy wikal kal mukankuny wa Nzamb.’ (Jak. 4:4) Pa mulong winou, Bibil utuyudin nakash anch tufanyidin kulimish mbil jitentamina ja Yehova ni kulik kwiyandjik mu milong ya mangand.

⁷ Dizu dia Nzamb ditubabeshin pantaliken ni mwikadil wijondila ni wa usany. Bibil utulejin anch: ‘Yom ya masandj ni kwijond kwa mitapu yawonsu ap ris, kangal kulond yom mudi yiney pakach pen, mudi muchifanyidina kudi antu atumbila.’ (Efes 5:3) Chawiy tufanyidinap kulik manangu metu malama yom yijondila, ya usany ni ya kuburen kalimish, ni tufanyidinap kusal anch yom yiney yikala mu mambamb metu. Mwamu tukumekesh anch tukatin kulamat ni kulimish mbil jitentamina ni jishitwila ja Yehova.

KWINANG KWA KU MUJIMBU

⁸ Kulik ching kwishitul kwa mu spiritu ni kwa mu manangu, in Kristu ij kand usey wa kwikal inangina ku mujimbu. Mu Isarel wa pasak, Nzamb wishitwila walejana anch mu chibeng mufanyidin kwikal mwinangina. Niyetu tufanyidin kwikal inangina chakwel Yehova kangal “amana chom ap kusu chimwing cha usany” mukach mwetu.—Kuv. 23:14.

⁹ Mu Bibil, kwishitul ni kwinang kwa ku mujimbu yendin pamwing. Chilakej, Paul wafunda anch: “Anamakwam in Kristu, tukwetany kushilamu kwinoku kuvud kwa Nzamb, chawiy chifanyidin etu kwishitwish ku yom yawonsu yikata kuyipish mijimbu ni mipim yetu. Chad twikalany kamu antu atumbila akata kumulimish Nzamb.” (2 Kor. 7:1) Mwin Kristu ikundj ap mband ufanyidin kusal usu wa kwikal winangina chisu chawonsu kusutil kowal mem ni kutut masun. Ap anch mashakamin ma ngand ni ngand mashalijadin, tukutwish kusal usu wa kwikal ni sabang ni mem mulong wa kowal ni kwikal ni kashinsh anch anetu inangin niyawiy.

¹⁰ Mulong wa mudimu wetu wa kulejan, antu avud atwij mwi ndond tushicha. Kulam chikumbu chetu chinangina pol ap mukach, kukutwish kupan uman uwamp kudi amutej netu. Mulong winou uyitadin antu awonsu a mu dijuku. Akadivar afanyidin kushinshikin nakash yikumbu yau ni yom yidiamu, ni kwijik anch rupang ni chikumbu chilaminau nawamp yikat kupan uman uwamp kudi antu akwau. Mulong awiy akata kutakel yom ya mu spiritu, chawiy chimekeshina anch akat kutakel nawamp yikumbu yau. (1 Tim. 3:4, 12) Anambaz niyawiy akwet chisend cha kushinshikin yom, nakash yom ya mukach mwa chikumbu. (Tit. 2:4, 5) An afumbinau nawamp afanyidin niyau kwijik anch akwet chisend cha kulam tupalikany twau twinangina nawamp. Anch asal mwamu, antu awonsu adia mu dijuku amekeshin yaku yiwamp ya kwinang yikwikala mwi ngand yisu yikutakelau kudi Want wa Nzamb.

¹¹ Nlel unou atushalapol a Yehova avud akat kusadin yom mudi motak, moto, nking mulong wa kuya ku yikumangan. Mu jindond jimwing, akat kusadinang motak mulong wa kuya mu mudimu wa kulejan. Motak winou ufanyidin kwikal winangina ni urijekinau nawamp. Yikumbu yetu ni yom mudi motak, moto ap nking yifanyidin kumekesh anch tudi antu inangina ni atumbila a Yehova. Mbil yiney yidi kand ya kusadin mulong wa ma sakosh ni Bibil tusadidina mulong wa kulejan.

¹² Kudjal kwetu ni kwileng yifanyidin kumekesh anch tulimishin mbil ja Nzamb. Tukutwishap kuya kurutu kwa muntu mujim ni masun makad kuwanyin ni maburedina kalimish. Umenap anch chidi cha usey kudjal nawamp chisu tumumekeshina Yehova mu mudimu wa kulejan ap pitukata kusal yikunku ku chikumangan! Kwileng kwetu ni mutapu wa kudjal kukwikal ni yibudikin piur pa mutapu umenau antu akwau difukwil dia Yehova. Tufanyidinap kuvuramen anch tufanyidin kudjal mu mutapu wisikena ni wa kuyilimish antu akwau. (Mike 6:8; 1 Kor. 10:31-33; 1 Tim. 2:9, 10) Pitukata kwirijek mulong wa kuya mu mudimu wa kulejan, ap ku yikumangan, ku yitentam ya munyingumuku ap ya rejon, tufanyidin kulam mu manangu yom yilondinay Bibil piur pa kwinang kwa ku mujimbu ni kudjal mu mutapu uwamp. Chisu chawonsu tufanyidin kumutumbish ni kumushiman Yehova.

¹³ Mbil yiney tukutwish kand kuyisadin chisu tuyila kutal biro mujim wa pa mangand mawonsu ap biro wa mutiy wa Atuman a Yehova. Vurikany anch, dijin Betel dirumburikin “Chikumbu cha Nzamb.” Chawiy lel, tufanyidin kudjal ni kwikal ni yaku yiwamp mudi mutusadininga anch tuyil ku yikumangan ku Chot cha Want.

¹⁴ Ap anch twipuwangejin, tufanyidin kudjal nawamp ni kumekan mu mutapu uwamp. Tufanyidin kwiyipul anch, ‘Ov, nikutwish kwov usany wa kupan uman wa kukashimwish mulong wa mutapu nidjadina?’

KWIPUWANGEJ NI KWISWEDISH KUWAMP

¹⁵ Kwiswedish ni kwipuwangej yidi ya usey mulong wa kulam ukash wa mujimbu uwanyidina. Dichuku dimwing, Yesu wayileja in kwilejend anch aya kwi ndond ya ayinau chakwel ‘iswedisha.’ (Mar. 6:31) Yisu yimwing, kwiswedish ni kwipuwangej kuwamp kukat kusangareshan nakash. Kukat kutwinkish kand usu wa kusambishiril midimu yetu.

¹⁶ Mulong nlel kudi mitapu yivud ya kwipuwangej, chawiy in Kristu afanyidin kusadin manangu ma Nzamb mulong wa kutond kwipuwangej kudia kuwamp. Ap anch kwipuwangej kukwet ndond yau, chidiap chom cha usey nakash mu mwom. Bibil utubabeshin anch mu ‘machuku ma nsudiel,’ antu akwikal “in kukat yom ya kwisangarish ayinau kupandakan kumukat Nzamb.” (2 Tim. 3:1, 4) Yom yivud ya kwipuwangesh ni ya kwisangaresh nich yiwapilap mulong wa antu akatina kulimish mbil jitentamina ja Yehova.

¹⁷ In Kristu a kusambish arisha ni mangand mayimp mading makatina kwisangaresh kuyimp. Mu Rom mwading jindond jatungau chakwel antu atala masengan ma antu amena mar. Antu ading kand kutal yom ya chisum, ya kumwang mash ni masengan ma masandj, pakwez in Kristu a kusambish ipuka yom yiney. Nlel unou, yom yivud ya kwipuwangesh yiletinau kudi mangand yilangwishin maku ma kusal yom yitakanena ni yiyimp. Tufanyidin ‘kubabal’ mu mutapu twendina ni kwipuk kwipuwangej kwakad kuwanyin. (Efes 5:15, 16; Kus. 11:5) Ap anch mutapu wa kwipuwangesh udiap kamu uyimp, pakwez vurik anch kwikal pamwing ni antu a mangand ni yibachikin yau yikutwish kwikal ya ubaj.—1 Pita 4:1-4.

¹⁸ Kudi mitapu ya kwipuwangesh ni ya kwisangaresh yikutwishau in Kristu kusanger. Antu avud akat kutaninamu mu kusadin mbil yidia mu Bibil ni yiyul yisikena yidia mu mikand yetu.

¹⁹ Yisu yimwing, mwin Kristu ukutwish kutazuk majuku ma in Kristu akwau mulong wa kusutish nau chisu pamwing. Ap akutwish kuyitazuk akadivar ni anambaz mulong wa kuya ku musambu wa uruw ap ku musambu ukwau. (Yoh. 2:2) Muntu warijekang musambu winou ndiy ukweta chisend cha yom yawonsu yikusadika. Chakin, chifanyidin kubabal nakash anch kudi antu avud atazukinau. Mutapu uwamp usutina yom ukutwish kusal anch antu amwing amatika mipak ya win Kristu, mulong akutwish kudia ni kuna nakash ap kushiken kusal yitil yijim. Anch alamin chom chinech mu manangu, in Kristu akweta nkeu akat kukepish kwa manangu uvud wa antu akutazukau ni chisu chikusalau. Anch akuna maar ma kasu, afanyidin kuna mu mutapu wisikena. (Fil. 4:5) Anch mwin Kristu mwawonsu wasal usu wa kusal anch chisu chinech chisangaresha ni chiyikasikesha antu mu spiritu, komb yakudia ni maar yikutwishap kumekan anch yidi ya usey nakash.

²⁰ Chidi chom chiwamp kwikal mwin kwakan. (1 Pita 4:9) Anch wayitazuk in Kristu akwau kwol kwey mulong wa yakudia, kwipuwangej, kusutish chisu ni arund, ufanyidinap kuyivuramen akadivar aburedina. (Luka 14:12-14) Anch yetwa katazukangau, mwikadil wetu ufanyidin kwikal wovijadina ni chiyul chidia mu Marko 12:31. Chidi chiwamp chisu chawonsu kujikitish mulong wa uwamp usadinau antu akwau.

²¹ In Kristu akat kusanger yipan ya Nzamb ni kwijik anch akutwish ‘kudia ni kuna ni kusanger midimu ya makas mau.’ (Mul. 3:12, 13) Anch ‘twasal yom yawonsu mulong wa uyaj wa Nzamb,’ etu atazukangau ni watazukanang tukusanger chisu twasutisha kal pamwing ni musangar wa kwijik anch twakasikeshijan kal mu spiritu.

KU SHIKOL

²² An a Atuman a Yehova akat kutaninamu mu kwilej mashikol. Ap anch akat kuyang ku shikol, chidi mulong wa kwilej kutang ni kufund nawamp. Yom yikwau yikatau kwilej ku shikol yidi ya usey kudi ansand akweta kuswir kwa kuwanyish yom yimwing ya mu spiritu. Mu mivu yawonsu yilejinau, akat kusal usu nakash mulong wa ‘kumuvurik Sakatang wau Mujim’ kusutin ku kutek yom ya mu spiritu pa ndond ya kusambish.—Mul. 12:1.

²³ Anch udi nsand mwin Kristu uchidia ku shikol, kangal wibomb ni ansand a mu mangand minam anch kwikil chom cha usey ufanyidina kusal nau pamwing. (2 Tim. 3:1, 2) Mulong Yehova usadin yom yivud mulong wa kutuking, ufanyidin kusal usu wey wawonsu mulong wa kwiyep yibachikin ya mangand. (Kus. 23:4; 91:1, 2) Chakwel wichidija, sal usu wa kutaninamu mu yom yawonsu yikwinkishinay Yehova.—Kus. 23:5.

²⁴ Mulong wa kwiyauril ni mangand minam chisu chichidiau ku shikol, ansand avud adia Atuman atonda kulik kuyandjik mu yom yikatau asand akwau kusal kupwa kwa shikol. Chikutwish kuyikasiken ansand a shikol ni alej kutesh kurumburik mulong wak tusadin mwamu. Pakwez chidia cha usey, chidi kumusangaresh Nzamb. Chinech chirumburikin anch ufanyidin kusadin kom key kafumbinau kudi Bibil mulong wa kushinshikin ni kukwat mupak wa kulik kwiyandjik mu kubambil kwa mangand minam ap mu yom ya wanangand. (Gal. 5:19, 26) Anch ukat kutesh yiyul ya Bibil yikatau anvaj ey in Kristu kukwink ni kutond arund awamp a mu chikumangen, ukutwish kulimish mbil jitentamina ja Yehova.

MUDIMU WA KU MUJIMBU NI ARUND

²⁵ Antakel a majuku akwet chisend cha kukimb yom mulong wa kuwanyish maswir ma antu a mu dijuku diau. (1 Tim. 5:8) Ap anch chidi mwamu, mulong adi atushalapol a Nzamb, ij nawamp anch mudimu wau wa ku mujimbu usutinap kutwal yisakin ya Want kurutu. (Mat. 6:33; Rom 11:13) Mulong akat kumwov Nzamb wom, akat kusanger yakudia, masun, ni kiyakamishinap mulong wa kwikal ni yom yivud ya ku mujimbu.—1 Tim. 6:6-10.

²⁶ In Kristu awonsu ipanina afanyidin kulam mu manangu mbil ja Nzamb. Mulong wa kutwish mwom wau nawamp kakatap kusal yom yikutwisha kujip yijil ya Nzamb ap ya ngand. (Rom 13:1, 2; 1 Kor. 6:9, 10) Tulamin mu manangu ubaj udiaku wa kwikal ni arund ayimp. Mulong tudi amasalay a Kristu, tukatap kwiyandjik mu mitapu ya kwisak yikata kujip yijil ya Nzamb, yikutwisha kutubachik kwiyandjik mu milong ya ngand ap yikata kuyipish mwikadil wetu wa mu spiritu. (Isay 2:4; 2 Tim. 2:4) Tukatap kwibomb nau akankuny a Nzamb mudi “Babilon Mujim.”—Kuj. 18:2, 4; 2 Kor. 6:14-17.

²⁷ Kusadin mbil jitentamina ja Nzamb kukat kutwiyepish kusadin chisu cha yikumangan mulong wa kutwal milong yetu ya kwisak kurutu ap yom yikwau yitutadina. Chisu tuyila ku yikumangan, ku yitentam pamwing ni anamakwetu in Kristu, chitongijok chetu chidi cha kumwifukwil Yehova. Chinech chidi chisu tukata kudia ku tebur wend wa mu spiritu ni kusanger “kukasikeshijan muntu ni mukwau.” (Rom 1:11, 12; Heb. 10:24, 25) Yisu yiney tufanyidin kwambamb yom ya mu spiritu.

KUSHAKAM MU UUMWING WA WIN KRISTU

²⁸ Mbil jitentamina ja Yehova jiyitin kand antu end ‘kulam uumwing wa mu spiritu ni chisambu.’ (Efes 4:1-3) Ap anch tukatin kwisangaresh ayinetu, pakwez muntu ni muntu ufanyidin kukimb kand uwamp wa antu akwau. (1 Tes. 5:15) Chidi chakin anch mwikadil winou udi mu chikumangen. Chikalap nchik ulombu wa chikit chetu, ngand yetu, mashakamin tukweta ap shikol twileja, etu awonsu atutakedin kudi mbil jitentamina. Ap antu akad kwikal Atuman, akat kuman yisal ya antu a Yehova.—1 Pita 2:12.

²⁹ Mulong wa kukasikeshin pa dishin dia uumwing, kambuy Paul wafunda anch: ‘Kudi mujimbu umwing ni spiritu umwing, chawiy chakutazukinanyau kand niyenen mu ruchingej rumwing, Mwant umwing, ritiy rumwing, dibatish dimwing, Nzamb umwing, Tatuku wa awonsu, udia piur pa awonsu, ni ku yawonsu, ni mu yawonsu.’ (Efes 4:4-6) Mazu minam matukasikeshin kwikal mu umwing mu kutesh mafundish ma pa dishin ma Bibil mudi kwijik chidia ukaleng wa Yehova. Chakin kamu, Yehova wayinkisha antu dizu dishitwila dia uyakin, diyikwashina awonsu kumusadil Nzamb pamwing.—Sof. 3:9.

³⁰ Uumwing ni chisambu yidia mu chikumangen cha win Kristu, yidi musul wa musangar wa antu awonsu amwifukwidila Yehova. Tumen kuwanyin kwa kushilamu kwa Yehova kulondina anch: “Nikez kakukumangejany pamwing mudi amikoku achirikina mu diyind.” (Mike 2:12) Tukatin kulam uumwing wetu wa chisambu pa kudandamen kulimish mbil jitentamina ja Yehova.

³¹ Ayuk kwau antu itiyinau kwandam mu chikumangen chishitwila cha Yehova! Kututazuk anch Atuman a Yehova chidi chisend chijim nakash kusutamu kwipan kwawonsu tukutwisha kusal. Tusalany usu wa kulam urund wetu upandakena kuwap ni Yehova ni kulimish mbil jend jitentamina ni kujijikish kudi antu akwau.—2 Kor. 3:18.