Tukudishany Ukaliweny Wetu wa Kutesh
Chirung cha machuku ma nsudiel ma mar nakash, mutushicha katat, chiletin yipwichik yivud ni yoziu yikash ya mitapu ni mitapu pad antu a Nzamb ndond yawonsu yidiau. (2 Tim. 3:1-5) Etu awonsu tukwet kuswir kwa dikasikesh chakwel kwiman dang mu ritiy. (1Kor. 16:13) Tukutwish kusal mwamu nich ukwash wa Yehova anch tudandamedin kwidish chisu chin chawonsu nich Dizu diend, kuchingejin spiritu wend, ni kulamat ku dirijek diend.—Kus. 37:28; Rom. 8:38, 39; Kuj. 2:10.
2 Chawiy lel chisambidina program wa chikumangan cha pakampwil cha dichuku dimwing wa muvu wasutina “Ikalany Amakurump mu Manangu.” Wading ushindamedina pa 1Korint 14:20, mufundinay mupostol Paul anch: “Anamakwam, kangal wikalany anikanch mu manangu: ikalany kusu mudi an mu tuyimp, pakwez mu manangu ikalany amakurump.” Ov mutapu ik wamena program winou?
3 “Diading kamu dikasikesh chakin!” “Chinech chawiy twadinga tuswiridina!” Yiney yidi kusu milad ya yakul yitwateshina. Ap kand muntu umwing wakad kwikal Kaman weza ku chikumangan cha pakampwil cha dichuku dimwing mulong wa kutal mwanend mband wa mivu 12 watambula dibabatish, walonda anch washimoka nakash pa kutesh program winou, ni kulond anch wajingunina mutapu chikwikala nich ukwash ku dijuku diend. Ov yawiy yitongijok ukweta niyey? Tuvurikany mamwing ma manans majim ma program winou.
4 Ronganyin Rakin Ridi ra Usey Chakwel Kukudish Ukaliweny wa Kutesh: Mu diskur dia kusambish, “Kudishany Ukaliweny Wen wa Kutesh Katat,” Ov chom ik chakasikeshinay mwin kulond chiswiridikina mulong wa kurish nich machuku ma katat makash? Tukwet kuswir kwa yom yivud kupandakanamu kusu ukaliweny wetu wa manangu. Tufanyidin kukudish ni kujimbish ukaliweny wetu wa kutesh Baibel, anch tusotinap kwikal apandakenau nich uyimp wawonsu uturishishina. Chawiy lel, chakwel kwikal ni nteshil yiney, tukwet kuswir kwa umutakel wa Nzamb. Mud nfund-a-kuseng, tufanyidin kumwit Yehova mu malembil chisu ni chisu chakwel atukwasha kutesh yijil yend ni yivurish yend chakwel tutwisha kumusadil nich muchim wawonsu.—Kus. 119:1, 2, 34.
5 Mu diskur dialondulaku, kalam wa munyimuku wamekesha anch Yehova, kusutil ku Dizu ni dirijek diend, utwinkishin ukwash wa “Kwikal Amakurump mu Kutesh Kwa Baibel.” Kutesh [ap manangu] akurumburila mud “ukaliweny wa kuman mukach mwa chom ni kujingunin yidiamu nich kutesh yikasina yikunku yach ni yawonsu, chakwel kutesh kurumburik.” Ov nany ukutwisha kutukwash kukudish ukaliweny winou? Yehova watwinkisha amakundj mud yipan chakwel kutukwash kuya kurutu muspiritu. (Efe. 4:11, 12) Dirijek diend dia panap pansh ditukasikeshin kutang Dizu dia Nzamb dichuku ni dichuku ni kukumangan ku yikumangan yawonsu ya chikumangen wakad kujing. (Kus. 1:2) Akat kutufundish mutapu wa kusadil Baibel ni mikand yetu ya Ukristu mu dilejan dia muntu ipend ni mu dilejan dia dijuku ni mulong wa kurijek yikumangan ni mudimu wa chingand. Ov ukat kutambul ukwash wa yitenchik yiney yawonsu? Ov udandamedin pakad kujing kulondul program wa kutang Baibel wa muntu ipend? Chinech chidi cha usey anch tusotin kwichidij ku yibachikin ya mangand, milad ya kudjal, mafilozofi, ni yipwichik ya makasu ya mangand.—Kol. 2:6-8.
6 Twijidishany Ukaliweny Wetu wa Kutesh: Mu diskur diend dia kusambish, diadinga dikweta mutu wa mulong “Tulamany Mwom wa Muspiritu Nich Kwijidish Ukaliweny wa Kutong,” mwin kulond ngez warumburila anch antu a mangand katwishinap kutek kushalijan pakach pa kuwap ni kuyip. Chinech chimekedin patok mu mutapu ulikinau ronganyin ni kulondul yany yitentamina ya Nzamb. (Isa. 5:20, 21, NW) Chinyim ni chinech, etu twatambwila kal kwiyijidish kwa muspiritu mu dirijek dia Yehova twitiyin yany ya Nzamb, yikata kututakel mu mijikit yetu ni ngikadil yetu. Chawiy lel, tukutwish kujingunin ayinetu yidia yiwamp ni yitiyikina ku mes ma Yehova ni yambatena nich rusot rend riwanyidina.—Rom. 12:2.
7 Chakwel kwipuk yitongijok ya mangand yirumbangena ni yibudikin yiyimp, tufanyidin kamu kudandamen kwijidish ukaliweny wetu wa kutesh. Ov mutapu ik? Mud muchifundilau mu Hebereu 5:12-14, mupostol Paul wakasikeshina kuswir kwa kulik kudia ching kusu “mayel” ma dizu. Tukwet kuswir kwa yakudia yikash ya muspiritu, mud yitudila mu kwilej kwa buku La prophétie d’Isaïe ku Dilejan dia Buku dia Chikumangen. Kupwa kand tufanyidin kusadil kamu nich muchim umwing mu mwom wetu yom twilejina. Anch twasal mwamu, tukat kumekesh kutentam kwa yijidik ni yany ya Yehova. Tukwijidish ukaliweny wetu wa kujingunin nawamp kushalijan pakach pa kuwap ni kuyip.
8 Cha ushon chidi anch, antu amwing akat kushadik muspiritu. Ov mulong wak? Mulong katekinap manangu mau pa yom yidia yiwamp ni yitentamina ku mes ma Yehova. Chawiy lel, awidil mu mipit ya kutesh ni kutal maprogram ku radio ap ku televizion yom yidia chinyim ni Mifund, mizik yiyimp, ap ku yipwichik yiyimp mu jindond ja kutadil kompyut. Anch twasadil nich manangu, tukez kwipuk kwikal apwitinau kud antu in masandj, ayisup, ap antu ayimp.—Jinsw. 13:20; Gal. 5:7; 1Tim. 6:20, 21.
9 Ansand Afanyidin “Kwikal Anikanch mu Uyimp”: Yikunku yaad ya program yayikasikesha kamu nakash ansand kukudish ukaliweny wau wa kutesh. In kulond alejana anch kwikal “anikanch mu tuyimp” chirumburikin kushal akad ukaliweny, chawiy kulond, kwikal akad mulong mud anikanch, ku yom yijondila ku mes ma Yehova. (1Kor. 14:20) Etu awonsu atukasikesha kuker nich mutapu tukata kusadil chisu chetu, chakwel kwipuk kwitek kurutu kwa milad kushalijan ya uyimp wawonsu ni kwipuk kutushemunin. (Efe. 5:15-17) Atukasikesha kuchind asaa tukata kushesh ku kutang mikand yakad kwambatan ap pakemp nich kukul kwetu kwa kutesh yom ya muspiritu. Ov mwamu wasadila? Ov pisu washikedina kal? Tujijamanany chidiap kusu mu chiyul chetu cha kutang Baibel dichuku ni dichuku, pakwez kand chiyul cha kudandamen kutang mikand yiletina dirijek. Kusal mwamu kukez kutukwash etu awonsu, pamwing ni ansand, “kutambul ronganyin.”—Jinsw. 4:7-9.
10 “Tambul Ukwash Udiokila ku Kusadil Yijidik ya Baibel Nich Manangu”: Winou wading mutu wa mulong wa diskur dia nsudiel dia program wa chikumangan cha pakampwil cha dichuku dimwing. Mwin kulond ngez warumburila anch Yehova ndiy Musul wa manangu mapanina mwom, musul udia piur nakash wakad nsudiel kupandakanamu wa antu awonsu. Tonginap bil kwikal nich mutapu wa kutambul manangu madiokila kud Yehova! Ukat kumapan pakad ushish kud antu akata kumakimb chakin ni kumit nich ritiy. (Jinsw. 2:3-5, 9; 28:5) Ov ukat kutambul sens ukwash wa kupan kwend?
11 Atukasikesha kwilej kujingunin yany chisu tutangina Baibel. (2 Tim. 3:16, 17) Ileja nawamp kamu yijidik yiney chakwel kwikal nich nteshil ya kashinsh ya yom yilondilay Yehova. Itekina chisu cha kutongijokin pa yijidik yiney ni kuyitek mu manangu ni mu muchim wey. Chinech chikez kwijidish ukaliweny wey wa kutesh chakwel ukutwish kukwat yiyul yiwamp mu mwom. (Jos. 1:8) Tutala bil yilikej yikemp ya mikadil yikatau kurish nich antu avud ni kuman mutapu kusadil yijidik ya Baibel kukutwisha kutukwash kupandakan.
12 ‘Ov Nifanyidin Kutond Mulad Kanang wa Kudjal ni Kwileng?’ Milad kanang ya kudjal ni kwileng ya mangand yimekeshin chisu ni chisu spiritu wa wimbwambol. Spiritu winou ukat kuyipwitin antu ku kudjal kwa mulad umwing wakad kalimish ni wakad kusangarish ap mulad umwing wa kulangwish masandj. Ov yijidik ik ya Baibel yikutukwasha kudjibwil kulemp yipwichik yiney? Anch twijidish ukaliweny wetu wa kutesh, tukez kushinshikin chijidik chidia mu 1Timote 2:9, 10, cha kudjal “maswin mawanyidina nawamp wakad kwishimek . . . , mud muchifanyidina kud [antu] akata kwijimbul anch, amwitiyijina Nzamb.” Yijidik yikwau yidi kand ya kusadil mud yifundinau mu 2 Korint 6:3 ni Kolosay 3:18, 20.
13 ‘Ov Chom ik Nifanyidina Kusal Chakwel Nilama Uumwing wa Dijuku Diam Ukasikena?’ Kwisamb kuwamp mukach mwa yid ya dijuku kudi kwa usey. Jakobu 1:19 utulejin anch: “muntu mwawonsu ufanyidin kuswakal kutesh, pakwez ashimpish muchim pa kulond, ashimpish kand muchim wakad kujiman swa.” Yid ya dijuku yiswiridin kwovijan nawamp nich kand kulond muntu ni mukwau mulong kwisamb mu dijuku kwitin kukwashijan kwa muntu ni mukwau mu yitongijok. Ap anch yitulondina yidi yakin, anch twayilond mu mulad wa kuswej, wa chibud, ap mulad wakad kuyitongin akwau, tukutwish kusal nayimp nakash pa ndond pa kukwash. Chawiy lel, twikala ngatan ap ngachik, nvaj ap mwan, mazu metu mafanyidin ‘kwikal mawamp, matadila mud mungu’—Kol. 4:6.
14 ‘Ov Nikwachikin Nich Chipwichik cha kulondul Nakash Mapit?’ Kulondul nakash mapit chidi chipwichik cha mangand chikata kurumbangesh mwom wa muntu. Kulondul mapit yidiap nfungul ya musangar wa kashinsh. (Mul. 5:10; Luka 12:15; 1Tim. 6:9, 10) Chakwel kutukwash kwipuk kuwil mu mupit wa kulondul nakash mapit, Yesu watufundisha chijidik chinech cha usey nakash: Kulam dis didia zwang. Chakwel kwikal nich mwom wisikena, wakad kurumbangan tufanyidin kwimikin mes metu pa yisakin ya Want, ni kutek yom yikwau yawonsu pa ndond ya kaad.—Mat. 6:22, 23, 33.
15 Chifanyidina Kwikal Rutong Retu: Tukwet mu Dizu dia Nzamb musul wa kashinsh wa yijidik yitentamina ya kututakel mu kukwat yiyul. Tukwet kuswir kwa kwilej yijidik yiney, kuyitongijokin, ni kutesh mutapu wa kuyisadil mu mwom wetu. Chawiy lel ‘kwijidish ukaliweny wetu wa kwauril pakach pa kuwap ni kuyip,’ kukez kutukwash ayinetu ni kumushiman Yehova.—Heb. 5:14.