‘Amakundj Mud Yipan’ Akat Kulam Amikoku a Nzamb Nich Mushiku
1 Ukwash wa rukat mud ik wasalay Yehova kusutin Mwanend papanay ‘amakundj mud yipan’! (Efe. 4:8, 11, 12) Awiy akwet yisend yivud, kuwejinaku ni mudimu wa kubing pakad kuziy nich mushiku amikoku a Nzamb. (1 Pita 5:2, 3) Etu awonsu tukat kumen ukwash uvud nakash ku ditenchik dined. Ap anch amwing akat kusankan yikokujol, akwau ni yawiy adi asu mu chikumangen, akwet kuziy kampand, ap awiy apumbuka kal, amakundj inay akat kutongin nakash kuwap kwa muntu ni muntu kwa muspiritu. —Filp. 2:4; 1 Tes. 5:12-14.
2 Yinship ya kanvundangesh ya mangand piyikata kukwat mipak kanang ya kuyikwat, atufung inay ankwash akat kumekan kwikal “mud ndond ya kwikangin mulong wa rinkind ni mud dipat dia kuchinyin rinkind mujim wa ruval.” Akat kutukasikeshang chisu tukata kuziy ap chisu tukweta chisend chilimina ni kuswir kwa rongoj. Mu yisu mud yiney awiy adi “mud tuwit twa mem mwi ngand yakad mem” ap “mud urel wa diyal dijim mwi ngand yikweta ngem yikash.” —Isa. 32:2, NW.
3 Kumukasikesh Muntu Wakad Kutulang Kand Rapor: Mu chirung cha muvu winou wa mudimu, amakurump asadin usu wa pakampwil chakwel kuyikasikesh antu ikadila kal in kusal pa chipatu ap akad kutulang kand rapor, end ayikwash kusal jinzau ja kuchirikin kand ku kusal pakad kuziy mu mijikit yawonsu ya chikumangen. Kuyendin kwa kubing kwa rukat kwayikwashin kal antu avud kukumangan ku yikumangan pakad kujing ni kuyitung mu spiritu djat ni mu chilik cha kusambish kand kusadil pamwing nich chikumangen mu mudimu wa chingand. Usu winou wawonsu ku mutambu wa amakurump umekeshin patok rukat ra Yehova ra kuyibangin ni usu wa umutakel wa Yesu Kristu. Ndiy washa chilikej cha kumekesh kubangin kwa mutapu winou mulong wa mukoku wend mwin mwawonsu ukutwisha kupumbuk ap kushadik. —Mat. 18:12-14; Yohan 10:16, 27-29.
4 Atufung ankwash akat kukimb yijingidij yimekeshina chisu chikutwishay muntu kuziy mu spiritu. Antu awonsu amekeshina yijingidij ya kuziy kwa muchim, akata kujingol ku yikumangan, ap kuchirikin kwinyim mu midimu ya chingand akwet kuswir kwa ukwash wa muspiritu. Amakurump asotining kamu kuyikwash antu in awonsu asambishina kumekesh ngikadil ya kudjal kwa mangand ni kwileng ap antu akudishina ngikadil ya kununganijan pantaliken ni chikumangen. Nich kutongin kwa kashinsh ni rukat rijim, atulam in kubangin asotining kamu ‘kupan mipim yau ayinau’ mu kusal usu wa kuyikwash antu mud inay kuvuvurish kand rukat rau mulong wa Yehova. —1 Tes. 2:8.
5 Pasak, in Kristu amwing ipanina ashadisha urund wau pamwing nich chikumangen, awila mu kuburen mijikit kwa mu spiritu mulong awiy ikala in kutongijokin nakash piur pa milong ya ukash wa mijimbu, ngikadil ya ekonomi, ap yipwichik ya dijuku. Pakad kwikal in kunyinyit nakash, atufung ankwash akat kupan nich rukat ruchingej anch Yehova ukat kubangin amikoku awonsu ni ukez kuyikwash mu yisu yikash. (Kus. 55:22; 1Pita 5:7) Atufung adimukina a amikoku akutwish kuyikwash kujingunin anch, anch awiy ‘ashejin piswimp nakash kud Nzamb, niyend ukez kushejin piswimp nau,’ mulong wa kuyongoj ni kuyiswedish. —Jak. 4:8; Kus. 23:3, 4.
6 Usey wa Ayibid: Kubangin kwa atufung inay ankwash akweta rukat kuwejidinaku kand antu akutwishau kuvuramen. Mukach mwa chikumangen ni chikumangen mudi antu amwing adia ayibid, adia mu maseku (rupital), ap akwachikina nakash. Kusadil kwau mu mudimu wa kulejan uruu wa Want kukwet mipak yovikena mulong wa mwikadil wau. Pamwing ap yisu yikwetau ya kupan uman yikutwish kumekan ching anch kwez antu ni kuyendil, ayej akwau, ap in kuyikwash ayej. Chikalap nchik mwamu, chawonsu chikutwishau kusal chimeken mud chipan chimwing chipandakena usey mu kukwatikesh mudimu winou wawonsu wa kulejan. (Mat. 25:15) Ap anch apan uman mu aminit 15 kusu, afanyidin kupan rapor wa aminit inay, ni akudandamen kuyichind mud in kulejan akata kusal mudimu wa Want.
7 ‘Amakundj mud yipan’ inay akat kudimukin kamu nakash maswir ma muspiritu ma akadivar nau pa chisu chinech cha muvu—pa chirung chinech cha Chivurikish. Chidi kamu chisu chifanyidina mud ik mulong wa amakurump kusal usu wa pakampwil chakwel kuyikwash antu awonsu apumbukina ap ikadila kal akad kutulang rapor wa mudimu kuman kand kakwau musangar ni chisambu cha mu manangu chikata kudiokal ku urund wa chirungil mu chikumangen! Kudi diyingish dia kashinsh dia kusangar chisu tuyimena antu mud inay adia “anamakwetu in ritiy” kwikal ku yikumangan ya chikumangen ni kubudikin kand mu mudimu wa kulejan mulong wa kukasikesh kand ritiy rau mu yakupesh ya difut yapanau nich rukat kud Kafung Muwamp.—Gal. 6:10; Luka 15:4-7; Yohan 10:11, 14.