Kukun Yivud Kuletining Yiyukish Yipitishina
1 Etu awonsu tukat kuchingejin nich musangar ujim kuwanyin kwa kushilamu kujim kudia mu Dizu dia Nzamb. Djat ni katat, Yehova ukat kupan yiyukish yivud yikata kuwejin musangar ku mwom wetu. Pakwez, mutapu tukata kutaninamu ukwash muntu ni muntu ipend, wengamidin nakash pa usu tukata kusal. Mud mwalonday mupostol Paul, “mwin kukun yivud ukez kwangul kand yivud.” (2 Kor. 9:6) Tushinshikinany mitapu yaad mutukutwisha kusadil mazu minam.
2 Mudimu Wetu Ayinetu: Kusalang mudimu wa kulejan rusangu ruwamp kud antu akwau chisu chin chawonsu tukutwisha kupan uman kukat kuletang yiyukish yivud. (Jinsw. 3:27, 28) Cha musangar, antu avud akat kukun yivud nich kujimbish kusadil kwau mu mudimu, kuwejinaku kusal mudimu wa uchibol nkwash ap wa rawonsu. Etu awonsu tukutwish kukun yivud nich kuchirikin nawamp kamu kukudish kusanger kwawonsu kwamekena ni mu kupan dilejan dia Baibel pichitwishikina. (Ro. 12:11) Anch twiyijidish ayinetu mu mitapu yiney tukez kupan uman ukasikeshina ni kuvudish nakash musangar mu mudimu wetu.
3 Kupan Ukwash ku Yisakin ya Want: Paul wisambina “kukun yivud” kwambatan nich yipan ya mapit. (2 Kor. 9:6, 7, 11, 13) Nlel, kudi yom yivud tukutwisha kusal ya ku mujimbu ni mwi njil ya mapit chakwel kupan ukwash ku yisakin ya Want. Tukutwish kukwash mu kutung kwa Yot ya Want ni Yot ya Yikumangan. Tukutwish kand kwikal tayad kukomb ni kulam nawamp ndond jinej ja difukwil diakin. Chikwau kand, tukutwish kupan milambu ya nfalang mulong wa kufutin yikal ya chikumangen ni mudimu wa kulejan Want wa pa mangand mawonsu ni wa kwikadish in kwilej. Chitusadila etu awonsu chikunku chetu, tukwet musangar ujim nakash mud ik wa kuman yiyukish yivud ya Yehova pa mudimu upaninay kusal!—Mal. 3:10; Luka 6:38.
4 Dizu dia Nzamb ditukasikeshin anch ‘tusala yom yiwamp, ni kwikal ampich mu midimu yiwamp, kwikal in makas monikina, ni kwikal tayad kuyikwashap akwau nich mapit metu.’ Anch tukat kuta matu ku kubabesh kwinoku, tukat kusanger yiyukish yipitishina katat. Pa chisu chawiy chimwing, tukat ‘kurijek yipau [yetu] yikeza kwikal dishin diwamp ku chirung chikeza kwez ni kutambul mwom udia wakin.’—1 Tim. 6:18, 19.