Yakul Ku Yipul yen

◼ Chom ik tufanyidina kuvurik chisu tusadidina matelefon ma kusend ku makas?

Matelefon minam makutwish kutukwash kwisamb ni antu akwau adia piswimp ni ndond yawonsu yitukutwisha kwikal. Ap anch yom yiney yidi ya ukwash nakash, tufanyidin kudimuk kuyisadil mu yisu yakad kufanyin, matelefon ma kusend ku makas makutwish kuvundangesh mudimu wetu wa kulejan ap yikumangan ya Ukristu. Ov chinech chikutwish kushiken mutapu ik?

Shinshikin chibudikin chikwikalaku anch telefon wetu wadil chisu tupanina uman mu mudimu wa chingand. Yom ik yikutwishay kutong muntu twisambina nend? Chitongijok ik chikwikalay nich anch twimik mambamb chakwel twakula bil ku telefon? Chakin kamu kitusotinap kusal chom chin chawonsu chikutwisha kuyikangesh antu akwau kutesh uruu wa Want. (2 Kor. 6:⁠3) Chawiy lel, anch tusendil telefon tuwapidil kumufung chakwel anch kangal watwimik ap kuyivundangesh antu akwau chisu tudia mu mudimu wa chingand.

Ov chikwikal mutapu ik chisu tuchingedina antu akwau apanina uman? Anch twitekinaku chirung mulong wa mudimu wa chingand, ov tuwapidilap kutek manangu metu pa mujikit winou? Mulong wa kulimish mudimu wetu utumbila, tubanginany amboku milong ya muntu ipend yakad usey ya wingend-a-mushing ap yisakin ya chisak mu yisu yindjing. (Rom 12:⁠7) Chakin kamu, chinech chitukangeshinap kusadil telefon mulong wa kupan uman ap kutazuk muntu chakwel kovijan nend mulong wa kuchirikin kupan uman.

Tufanyidin kubabal kamu nakash piur pa kusadil matelefon ma kusend ku makas chisu twendishina motak, mulong kushinshikin kumwing kumekeshin anch kusalang mwamu kuwejidin nakash chak cha kusadik kwa maakisida. Tufanyidin kushinshikin nakash yijil yin yawonsu yijidikina kusadil matelefon ma kusend ku makas chisu twendishina motak.

Tukat kuyang ku yikumangan ya Ukristu, ku yikumangan ya munyimuku, ni ku yikunguril mulong wa kumwifukwil Yehova, ni kwikal afundishinau kudiay ndiy. Ov kusanger mulong wa kutumb kwa yisu yiney kufanyidinap kutubachik kufung matelefon metu chakwel anch kangal mez matuvundangesh ni kuyizuwol kand antu akwau? Anch kudi mulong umwing witina kubangin kwetu swa-swa, tufanyidin kubudik pol kulemp ni ndond ya chikumangan. Chikwau kand, tufanyidin kutenchik chakwel kubangin milong yetu ya pakampwil ni milong ya ku mujimbu mu yisu yikwau yakad kwikal yitondilau mulong wa difukwil.​—⁠1 Kor. 10:⁠24.

El mutapu tusadidila matelefon ma kusend ku makas ap chom chin chawonsu cha kutumin nshing kumekesh kalimish pantaliken nau antu akwau ni kusanger kujim kwa yom ya muspiritu.