Yakul Ku Yipul Yen

◼ Ov, yany ik ya Bibil yitufanyidina kulondul pitusadidina matelefon pa chisu tukumangena ku yikumangan ya Ukristu ni pitwipanininga mu mudimu wa kulejan?

“Kudi Chirung cha Yom Yawonsu” (Mul. 3:1): Chakin kamu matelefon mayinkishining antu mutapu wa kufund jinsangu ap kwambamb umwing ni mukwau chisu chin chawonsu. Pakwez, kuding yisu yimwing yikadiau in Kristu kusot kuyizuwol kusutil ku matelefon mau. Chilakej, yikumangan yetu yiding yisu ya kumutumbish Yehova, ya kutambul malejan ma muspiritu ni kusanger kwongojijan mu ritiy retu. (Kuv. 31:12; Kus. 22:22; Rom 1:11, 12) Ov, tukutwish kufung matelefon metu anch twashik ku yikumangan ni kulam jinsang mulong wa kujitang kupwa kwa Kubudik? Anch kututazuk mulong wa jinsang ja usey kwitining anch tusha telefon wetu wakad kufung, tufanyidin kukepish dizu chakwel kangal twayizuwol antu akwau.

‘Sal Yom Yawosu Mulong wa Rusangu Ruwamp.’ (1 Kor. 9:23): Yisu yimwing, kusadil kwa telefon kudi kwa usey mu mudimu wa kulejan. Chilakej, mukadivar utakedila ukutwish kumusadil chakwel ayitazuka akadivar alejena mu yikunku yikwau ya teritwar. Yisu yimwing, in kulejan akusadin matelefon mau chakwel ayitazuka antu amekeshina musangar ap in kwilej Bibil kurutu kwa kuyichirikin, pakampwil anch antu inay ashich kulemp. Anch tukwet matelefon, tufanyidin kumatenchik chakwel kangal makatul mambamb chisu twambambina ni mwin chikumbu. (2 Kor. 6:3) Chisu tuchingedina in kulejan akwau, pa ndond pa kwisamb ku telefon nau arund netu ap kuyitumin jinsangu, ov, chiwapinap kushinshikin nakash pa mudimu wa kulejan ni pa antu tusadina nau?

Ikal Mwin Kuyibangin Antu Akwau. (1 Kor. 10:24; Fil. 2:4): Tusotinap ap pakemp kupipej chisu chisadikina yikumangan ya mudimu wa chingand nich chitongijok cha kwel anch tukutwish yisu yawonsu kumutazuk mwin kulejan kanang ap kumufund jinsangu chakwel ijika ndond ik chisak chikupanina uman. Anch twalab pakushik, yisu yivud chisak afanyidin kuchitenchik kand. Chakin kamu, mikadil yikat kutushiken pakad kuchingejin yikutwish ya tulabish kushik. Pakwez, anch twitekin chaku cha kushikang pa chisu, tukat kumekesh anch tulimishining ditenchik dia Yehova, mukadivar ukat kutakel ni ambay netu in kulejan.