Yichirikina Awonsu Amekeshina Chilik Kanang cha Kusanger
1 Antu avud pakach petu adi mu uyakin ilel unou mulong muntu kanang washinshikina kwitiyij kwetu uruu wa Want ni ku—tuchirikin nich kushimpish muchim—pamwing ap tupamp tuvud—mulong wa kukudish kusanger kwinoku. Niyetu tufanyidin kuyichirikin antu awonsu amekeshina chilik kanang cha kusanger. Chakin kamu, kuchirikinamu kusu chidi chikunku cha mudimu wetu wa ‘kwikadish in kwilej.’—Mat. 28:19, 20.
2 Jingunin Kusanger: Ap anch muntu walik kwend kutambul mikand, chifu chend, mutapu wend wa kulond, ap mazu mabudishinay mu kan yikutwish kumekesh chilik kanang cha kusanger kwend uruu wa Want. Pa chilik kanang chinech cha kusanger, tukutwish kumuchirikin. Mukadivar umwing wamuchirikina ikundj umwing tupamp tutan tulondulijadina pakad kumwinkish mikand. Pa kuchirikinamu kwa musamban, muntu winou witiya mikand, ni kupwa dilejan dia Bibil diasambisha.
3 Anch wajingunin kusanger, chirikinamu swa, pamwing ap kwinyim kwa machuku makemp. Kangal wamushil “muyimp” chisu cha kudiosh dizu ukunyina mu muchim wa muntu. (Mat. 13:19) Shinshikin anch ukat kulimish kushilamu kwey piukata kwovijan ni muntu anch ukez kumuchirikin pa chisu kanang.—Mat. 5:37.
4 Mu Kulejan mu Balibal: Ov, wikasikeshin kukudish kusanger utanina mu kulejan mu balibal ap piukata kupan uman wa kukashimwish? Kwisudiel kwa minsamb yey, ukutwish kulond anch: “Nasangar kal mulong wa yom twisamba kal ney. Ov, kwisu nikutwisha kukutan chakwel twambamba kand?” Pa chisu chifanyidina, in kulejan amwing akutwish kumwinkish muntu usangeridina nimero wa telefon ap kumwit chakwel kupanijan umwing ni mukwau manimero ma telefon. Anch antu akat kukuman mu kulejan mu balibal pa ndond yimwing pakad kujing, kakutwishap kulik kukwinkish nimero wau wa telefon ap adres wau. Ap anch alik kukulej mutapu ukutwisha kutanijan nau, ukutwish kudandamen kupakish kukudish kusanger kwau chisu chikwau ukeza kuyisankan mu balibal.
5 Anch twaman mbut twichila mem yikata kuminy ni kukul, chinech chikutuletin musangar. Mu mutapu umwing, tukutwish kusanger nakash pitukata kuchirikinamu ni kuyikwash antu kuya kurutu mu spiritu. (1 Kor. 3:6) Itekina rutong ra kuyichirikin antu awonsu amekeshina chilik kanang cha kusanger.