Tukwatany chiyul cha kuchirikinamu!
1 “Yidi misamb yiwamp mud ik! Nifanyidin kuvurik kuchirikinaku kand.” Ov walondap kal mazu minam, ni kupwa wavuramen ndond yishichay muntu? Anch mwawiy, wij anch mutapu umwing kusu ukutwisha kutal nawamp anch uchirikidinamu kudi kufund.
2 Fund yawonsu: Anch misamb yiwisambinany ni muntu umwing wamekeshina kusanger yichidi mu manangu mey, itekina chisu cha kufund jinsangu jawonsu jifanyidina mulong wa kuchirikinamu. Fund dijin dia muntu ni mutapu wa kumwijik. Fund adres wend, pakwez kangal kutongin adres wa kutongin—tal nawamp anch yiufundina yidi yakin. Fund mutu wa mulong wisambidinany nend, maverse mawonsu utanginany, ni mukand wapanina.
3 Anch wamusha muntu nich chipul cha kwakul pa kuchirikinamu kukwau, uwapidil kuchifund. Ov wateshin rusangu kanang piur pa muntu wisambina nend, dijuku diend, ap difukwil diend? Anch mwawiy, yifunda. Piukuya ni kumutal, piukuyambambina ukumekesh anch umutongidin muntu winou. Kupwa, wejaku dichuku ni chisu chiwamusankena kapamp ka kusambish ni chisu walonda anch ukuchirik. Anch wafund pakad chilim, ukuvurik nawamp ni ukuvuramenap ap pakemp kukan kwey kwa kuchirik.—1 Tim. 1:12.
4 Anch wapwish kufund yawonsu, yiteka pamwing ni yom yikwau ya mudimu wa chingand—sakosh wa mikand, buku Comment raisonner, ni mikand—chakwel yikwikal chisu chawonsu tayad. Chiwapin kufund ndond yiwaburenanga kutan antu pa dipapel dia mudimu wa ku chikumbu ni chikumbu, dipapel diukwaurila nich piukata kufund milong ya kuchirikinamu kusu. Mwaning, ap anch wafund nawamp mulong wa kuchirikinamu, chijim kutal nawamp anch uchirikidinamu!
5 Mutongina muntu: Chisu wirijekina mulong wa mudimu wa kulejan, chirikin yiwafundina piur pa kuchirikinamu. Tongin muntu ni muntu ni mutapu uwamp wa mambamb ukutwisha kusadin piukuya ni kumutal. Tongin mutapu wa kukulish kusanger kwa muntu mulong wa dilejan dia Baibel. Kwirijek mud kwinoku kukutwish kukubudishin mabuj mavud chiudia kashalapol wa rusangu ruwamp ni, chad lel, musangar wey.—Jnsw. 21:5a.
6 Chawiy lel anch watan muntu mwin kutesh, kangal watong anch ukutwish kuvurik swa kuchirikinaku. Pakwez, yifunda, chirikin yiwafundina, dandamen kutongin muntu (ukwisambany nend), ni kukwat chad lel chiyul cha kuchirikinamu!