Chisu ik—Chifanyidina Kuyichirikin Antu Asangaredina?
1. Chom ik chikwau chidia mu kuyikadish in kwilej?
1 Mu kuyikadish in kwilej mudi kand kumuchirikin muntu umekeshina anch usotil kwilej ditenchik dia Want wa Yehova. (Mat. 28:19, 20) Chisu chivud, chisu chiwamp cha kuchirikinamu chengamidining pa program wetu ni pa program wa muntu amwinend. Ov, mulong wak tufanyidina kuchirik swa kupwa kwa kwez kwetu kwa kusambish?
2, 3. Mulong wak tufanyidin kusal usu wa kuchirik swa-swa mudi muchitwishikina?
2 Mulong wak Chifanyidina Kuchirik Swa? Mudimu wa kulejan “Rusangu Ruwamp ra Want” udi piswimp ni kupwa, ni nsudiel ya ditenchik dined dia yom diasej kal piswimp nakash. (Mat. 24:14, Manswik Masu; 1 Pita 4:7) Chawiy lel, ap anch “dichuku dia dipandish” dichidiaku mulong wa antu asangaredina, tufanyidin kutesh chiyul cha ‘kulejan dizu nakash,’ chikwatina kand ni ku kuchirik swa-swa mudi muchitwishikina mulong wa kukudish kusanger.—2 Kor. 6:1, 2; 2 Tim. 4:2.
3 Satan usadil usu wend wawonsu chakwel ashesha mbut ya Want yitukutwisha kukun mu muchim wa muntu usangaredina. (Marko 4:14, 15) Yid ya dijuku, ambay a mudimu, ni antu akwau chisu ni chisu akat kuyiswingish antu asangaredina. Kuchirikang swa kututwishishining tuwejina kand pa minsamb yetu yasutila kurutu kwa antu akwau atwisha kudiosh ka risis ka musangar mu muchim wend.
4. Mutapu ik tukutwisha kapamp ka kusambish kutek mufulandal wa kuchirik kand?
4 Kanijanany: Chiding chiwamp kukwat yitenchik yiwamp ya kumuchirikin kurutu kwa kupwish mambamb ma kapamp ka kusambish. Mwipula chipul chiukeza kwakul piukuchirika. Chiwapining kufund yom nawamp pa mulong winou. Anch program wey wakutwishish, ukutwish wamwit chakwel weza diamashik ap pa kusut kwa machuku makemp. Anch wamanijanany kapamp ka kusambish kwinsudiel kwa rubing, pamwingap ukutwish witiyij anch umwendila kand kwinsudiel kwa rubing rezinaku er. Anch wakanijanany, wanyish mazu mey.—Mat. 5:37.
5. Kuchirikinamu kwetu pakad kulab kutukwashining nchik kuwanyish mudimu watwinkishay Yesu wa kuyikadish in kwilej?
5 Tukweting mayingishin mawamp ma kuyichirikin swa antu asangaredina mudi muchitwishikina. Chawiy lel, kanijanany ni chirikany swa, mulong “kwashal kal chisu chiswimp.” (1 Kor. 7:29) Anch twayichirikin swa-swa antu asangaredina uruu wa Want, usu wetu ukutwish wasong mabuj mawamp.