Tukudishany Ukaliweny Wetu mu Mudimu wa Kulejan—mu Kusha Mazu ma Kuchirikin Nich Minsamb

Chidi cha Usey: Anch twatanijan ni muntu umekeshina musangar, tukusot kumuchirikin pa chisu chikezay kwikal ku chikumbu chakwel twichila mem pa mbut ja uyakin jitwakuna. (1 Kor. 3:6) Chinech chitwitining yisu yivud kurutu kwa kudiokal, kusha mazu ma kuchirikin nich minsamb mawiy makeza kutukwash kumuchirikin. Chikwau kand, chiwapining kusha chipul chitukeza kwisambin pa chisu chikwau. Chinech chikez kukasikesh maku ma mwin chikumbu mulong wa kumuchirikin ni kumushil mukand ukweta chipul chakwilau chakwel achitanga nakash. Kusha mazu ma kuchirikin nich minsamb pa chisu chikwau makwashining kuchirikin kand mutu wa mulong kanang twatonda ni mwin chikumbu ukez kwijik yom yichingejinay. Pitukumanijana nend kand, tukutwish kumulej anch tumuchirikidin mulong wa kwakul ku chipul twalangwisha pitwamanijana nend kapamp ka kusambish ni kupwa tukundadamen nich minsamb.

Mutapu wa Kusadil:

Piwirijikina mulong wa mudimu wa kulejan wa ku chikumbu ni chikumbu, rijek kand chipul chilondwilaku mulong wa kwakul pa chisu chikwau. Chikez kwengamidin pa mutu wa mulong wisambinanya udia mu mukand wamushila pa dichuku din diang, ap chikutwish kwikal chipul chakwilau mu umwing wa mikand yetu ya kwilej nich, chiukeza kusadil mulong wa kusambish nich minsamb.
Piukupwisha minsamb yey pamwing ni muntu umekeshina musangar, mwijikisha rusot rey ra kwambamb nend kand ni kupwa muleja chipul chilondwilaku chiwarijeka. Mu materitwar mamwing mudi antu akwatikena ni apakishining kwiyingish mulong wa kulik kuyichirikin kand. Mu mikadil mudi yiney, ukutwish kulond anch: “Ov, yisu ik yimwing yiwanyidininga ya kukutan ku chikumbu chey? [Mulika akula.] Rubing rikwezap er, nikusot kwambamb ney mu kachisu kakemp ni kwakul ku chipul ech . . . Anch ukwikal kand ukwatikena pa chisu nikweza, ukutwish amboku kwingijikish.”
Anch wamulej mwin chikumbu anch nikez kumuchirikin pa chisu chiwanyina, ufanyidin kulimish chisu chinech. (Mat. 5:37) Mu mazu mey ma pwishil ma kumuchirikin, shang mazu ma kuchirikin nich mulong wa minsamb yikwau.

Pakish Kusal Mwamu pa Ngond:

Piurijekina mutapu wey wa kulejan, rijek kand chipul chilondwilaku cha kwakul pa chisu chikwau. Yilejamu in kulejan akwau usadina nau pamwing.