Yikwasha Antu Akwau Kumushiman Yehova
1 Kudi uruu umwing wa usey nakash uyilejinau antu mu mangand mawonsu, uruu winou udi anch: “Mwovany Nzamb wom, panany uyaj kudi ndiy! Mulong chisu chend cha kuyirumburish antu chashik kal. Mwifukwilany ndiy watanga diur, ni mangand, ni karung, ni misul ya mem!” (Kuj. 14:6, 7) Didi dilau ditwitapidila kal ku mutambu wetu kusadil pamwing mu mudimu winou wa kulejan. Chom ik chiswiridinau antu kwijik piur pa Yehova chakwel anch amwova wom ni amwifukwila ndiy?
2 Dijin Diend: Antu afanyidin kwijik kusutin ku dijin, kushalijan kudia pakach pa Nzamb umwing kusu wakin ni anzamb akwau a makasu ifukwidilau nlel. (Kuv. 4:35; 1 Kor. 8:5, 6) Chakin kamu, in kufund a Baibel asadila dijin dijikena nawamp dia Yehova tupamp 7000 ni kusut. Pitusadidila nawamp manangu chakwel kwijikish dijin dia Nzamb, tufanyidinap kudijindjik ap pakemp ap kwov wom wa kudisadil. Rusot ra Nzamb ridi anch antu awonsu ashikena ku kwijik dijin diend.—Kus. 83:18.
3 Untu Wend: Chakwel kumushiman Yehova, antu afanyidin kwijik anch udi Nzamb wa mutapu ik. Tufanyidin kuyirumburil rukat rend ripandikena, manangu mend mapandikena, kutentam kwend kuwanyidina, ni dikand diend diawonsu, pamwing ni ranaken rend, rukat rend ridimukina, ni ngikadil yikwau yipandikena kuwap. (Kub. 34:6, 7) Afanyidin kand kwilej kwikal nich wom ufanyidina pantaliken ni Nzamb, kumushiman ndiy, ni kujingunin anch mwom wau wengamidin pa kwikal nich kwitiyik kwa Yehova.—Kus. 89:7.
4 Kusej Piswimp ni Nzamb: Chakwel apanda ku dirumburish dia Nzamb diezina, antu afanyidin kutazuk pa dijin dia Yehova nich ritiy. (Rom 10:13, 14; 2 Tes. 1:8) Chinech chitin yom yivud kulik kusu kwijik dijin ni ngikadil ya Nzamb. Tufanyidin kuyikwash antu kukudish urund wau nend Yehova, ni kutek ruchingej rau mudiay ndiy ni muchim wau wawonsu. (Jinsw. 3:5, 6) Anch asadil yilejinau, ni kukarumukin kud Nzamb mu malembil ma kashinsh, ni kuman ukwash wend mu mwom wau, ritiy rau rikez kukul, ni kuyikwash kusejin piswimp ni Yehova.—Kus. 34:8.
5 Tulejanany dijin dia Nzamb nich mushiku ni kuyikwash antu akwau kutek ruchingej rau mwi ndiy ni kumwov wom. Tukutwish kwikal tayad kuyikwash antu avud kushiken ku kumwijik Yehova ni kumutumbish mud ‘Nzamb wa dipandish diau.’—Kus. 25:5.