Ukwash pa Chisu Chifanyidina
1 Pamanay mupostol Pita kuswir kwa kuyikasikesh ambay nend in ritiy, kuyibangin kwamubachika kuyivurish nich rukat ni kuyikasikesh. (2 Pi. 1:12, 13; 3:1) Ndiy wayikasikesha “awiy atambwila kal ritiy” kudandamen kukul mu ngikadil ya muspiritu chakwel kangal ikala “in usweral, ap akad kusong mabuj ku ronganyin ra Nsalejetu Yesu Kristu.” (2 Pi. 1:1, 5-8, TMK) Rutong ra Pita radinga ra kuyikwash kwikadish kutazuk ni kutondiu kwau kwatambulau kudiokal kud Yehova kwikala kwa kashinsh, chakwel anch atwisha ‘kwikal zwang wakad kufa nich kurutu kwa Nzamb, nich chisambu.’ (2 Pi. 1:10, 11; 3:14) Kud in ritiy avud, dikasikesh dined diamekana kwikal ukwash pa chisu chifanyidina.
2 Nlel, Atulam in Kristu akat kuyibangin chilik chimwing antu a Nzamb. Mu ‘machuku minam ma kwisudiel ma mar nakash,’ atushalapol avud a Yehova afanyidin kurish nich mikadil yikash. (2 Tim. 3:1) Mulong wa kudandamen kwa milong ya nfalang, ya dijuku, ap ya muntu ipend, amwing akutwish kwiyov mwiyovay David: ‘Mulong milong yinakad kutwish kuchind yangombilamu kal bulakan, nshid jam jampandaken kal usu, jambwika kal ku mes, kinimenip kand nawamp, kuvul kwau kupandikenimu nswich ja ku mutu wam; ni muchim wam wadiokala mwivumu.’ (Kus. 40:12) Yipwichik yiney yikutwish kwikal yijim nakash mu chilik cha kwel anch antu mud inay akutwish kudiwul yisend ya usey ya muspiritu ni kwimik kusadil pamwing mu mudimu wa Ukristu. Pakwez, yikalap nchik yikokujol yikwetau, ‘awiy kavuramedinap yijidik ya Yehova.’ (Kus. 119:176) Katat chawiy chisu chifanyidina kud amakurump mulong wa kuyinkish antu mud inay ukwash uswiridinau.—Is. 32:1, 2, NW.
3 Chakwel kuwanyish maswir minam, amakurump ayikasikeshin kusal usu wa pakampwil mulong wa kuyikwash antu alikina katat kamu ak kusadil pamwing mu mudimu wa kulejan. Kusal usu nakash chakwel kuwanyish chinech kuyil kamu katat ni kwiwejinaku djat ni kwisudiel kwa ngond wa Rish. Atulam’a dilejan dia buku ayitin kuyendil antu akad kusalang kand mudimu chakwel kuyinkish ukwash wa muspiritu nich chitongijok cha kuyikwash kusambishiril kand mujikit wau pamwing ni chikumangen. Pikudia kuswir, akutwish kutenchik dilejan dia Baibel dia muntu ipend. Akutwish kuyit antwarubil akwau kupan ukwash. Ang akwit kupan ukwash, usu wey ukez kwikal wa ukwash nakash, nakash kamu ang wapan dikasikesh mutapu umwing uwamp ni wovikena.
4 Kudi diyingish diletina musangar kud etu awonsu chisu chikatay muntu kanang kusambishiril kand mujikit wend pamwing ni chikumangen. (Luka 15:6) Chakin kamu usu wetu wa kuyikasikesh antu akad kusalang kand mudimu ukutwish kwikal ‘dizu dikat kulondau pa chisu chifanyidina.’—Jinsw. 25:11.