Ditenchik Disu Mulong wa Tupalikany twa Mabuku twa ku Chot cha Want
Pasut kal katat mivu yivud, yikumangen ya pa mangand mawonsu yikat kutambul ukwash udiokila ku kusadil kapalikany kau ka mabuku ka ku Chot cha Want, kapalikany kadingau ni kutazuk pa kusambish anch kapalikany ka mabuku ma Shikol ya Mudimu wa Uteokras. Pasak, chamekana kwikal cha usey nakash anch chikumangen ni chikumangen chikala ni kapalikany kach ka mikand. Pakwez katat, nich Yot ya Want yivud yisadidilau kud yikumangen yivud, yikumangen yimwing yidi ya jindim ja wingendj, chipandiken kuwap kwikal kusu nich kapalikany ka mikand kakweta mikand yawonsu yifanyidina ni mikand yawonsu ya katat mu rudim ni rudim ra chikumangen chikata kusadil Chot cha Want. Mu Yot ya Want yikweta tupalikany twaad twa kutangin, kamwing ni kamwing kakwikal nich kapalikany ka mabuku ma rudim ni rudim ra chisak chikata kukumangan kwinikwa.
Tuchingejin anch ditenchik dined dikez kukwash kulam ndond ni kwipuk kushesh nfalang. Chikwau kand, kubomb pamwing tupalikany twa mabuku twa yikumangen yaad ap yivud chikez kwikal chipandikena kuwap mulong wa kwikal nich kapalikany kamwing ka mabuku kawamp nakash ni kafanyidina. Anch ambombin tupalikany twa mabuku pamwing, mikand yidiamu yivud akutwish kuyilam ni kwez kuyisadil pakezau kutung Yot ya Want yikwau yisu. Ang Chot cha Want chikwet ordinater ukweta Watchtower Library pa CD-ROM, antu amwing akutwish kuman chom chinech cha mudimu kwikal cha ukwash nakash.
Mukadivar umwing, ukusadil mud mwin kulam kapalikany ka mabuku ka Chot cha Want chimwing ni chimwing, nakash kamu umwing wa atulam’a Shikol ya Mudimu wa Uteokras. Chimufanyidin kuwejinaku pakemp-pakemp mikand yifanyidina ku mikand yidiaku, nich kufund mukach mwa chibur cha buku ni buku chakwel kulejan anch udi wa kapalikany ka mabuku ka ku Chot cha Want. Kupwa kwa muvu umwing, chimufanyidin kushinshikin kapalikany ka mabuku mulong wa kwijik anch kudi mikand yiburedinamu ni mulong wa kushinshikin kand mikand ang yidi nawamp. Mikand yidia mu kapalikany ka mabuku kinak chifanyidinap kuyisend kuya nich pol pa Chot cha Want.
Kapalikany ka mabuku ka ku Chot cha Want akat kudandamen kukasanger nakash kud antu awonsu adia mu chikumangen. Tumekeshany amboku muntu ni muntu anch tukwatin ditenchik dined nich usey nakash mu kuyilam nawamp ni kuyisadil mulong wa kukimbijol “ronganyin ra Nzamb.”—Jinsw. 2:5.