Babalany mu Kusadil kwa Chisu Chen
1. Ov chom ik chirishinau nich antu ndond yawonsu nlel?
1 Mu chirung cha chisu chinech ni midimu ya kusal yidiaku, antu avud amen anch akwet yivud ya kusal pakwez chisu cha kuyisal chikepin. Ov chikukasikedin kulam chaku chiwamp muspiritu? Ov utongin anch ukwet chisu chijim cha kusal mudimu wa kulejan? Mutapu ik upandikena kuwap tukutwisha kusadil chisu chetu?—Kus. 90:12; Filp. 1:9-11.
2, 3. Ov jinsangu ja winchij jikwet ubaj ik, ni mutapu ik ukutwishay umwing ni umwing wetu kwisop amwinend?
2 Kujingunin Yom Yishadishina Chisu: Etu awonsu tufanyidin kushinshik mutapu tusadidina chisu chetu. Baibel ubabeshen anch: “Babalany mudi muukata kwendany, kangal wendany mudi antu akad kubabal, pakwez ching mudi ababela; lamany chisu cha muten, mulong machuku mayimp madi kwaku.” (Ef. 5:15, 16) Tushinshikinany milong yidiokila ku kuya kurutu kwa winchij mu jinsangu. Ap anch chifanyidin kusadil kompyut ni mashiny makwau makweta usey, makutwish kwikal mupit anch tubabelap mu kusadil kwa chisu chetu.—1 Kor. 7:29, 31.
3 Umwing ni umwing wetu ufanyidin kwiyipul anch: ‘Ov nikat kusutish muten dichuku ni dichuku mu kutangol ap kwakol ku jinsangu ja E-mail jakad usey? Ov nikat kutazwok chisu ni chisu ku telefon ap kutumol jinsangu ja milong yakad usey? (1 Tim. 5:13) Ov nikat kukimbol pa Internet pakad rutong ap kuswimpol kwau chamwamu yinitadila ku televizion? Ov kukwatikan nich masengan minam kwasambish kal kwinsheshin chisu cham cha kwilej Dizu dia Nzamb?’ Yom mud yiney yikutwish kushesh ukash wetu wa muspiritu.—Jinsw. 12:11.
4. Kuswimp ik kwamekeshay nsand umwing, ni mulong wak?
4 Kusadil Chisu Nich Manangu: Kusadil mashiny kusotin kukwat chisu chetu ni manangu metu. Nsand wiyandjika nakash mu masengan ma kompyut walonda anch: “Yisu yimwing anch nasengan kurutu kwa kuya ni kulejan ap ku chikumangan cha Ukristu, chading ni kwinkasiken kukung yitongijok yam pamwing. Nading ni kutong chisu chawonsu mutapu nikutwisha kusengan nawamp chisu nikuchirika ku chikumbu. Kwilej kwamwinam ni kutang kwa Baibel kwayipa. Musangar wam mu mudimu wa Nzamb wasambisha kukep.” Pijikay anch uwapidil kuswimp, wadiosha masengan mawonsu mu kompyut wend. Ndiy wavurika anch, “chading chikash.” “Nadingap nitongina anch niyandjikin kal nakash mu masengan. Pakwez nova musangar wa kuwin pakwijik anch nasala mwamu mulong wa ukwash wam.”—Mat. 5:29, 30
5 Chikutwish kwikal cha ukwash kukwat mipak mud yiney anch kudi kuswir kwa kwitenchik ku mitambu yikwau. Ov ukutwish kwitekinaku chikunku cha saa dichuku ni dichuku chakwel kudiokal ku midimu yakad kwau usey? Chinech chidi chisu uswiridina dichuku ni dichuku chakwel kutang Baibel mwawonsu mu muvu umwing. Chikwikal chakin kamu difut dia muspiritu mud ik! (Kus. 19:7-11; 119:97-100) Itekina chisu cha kashinsh cha kutang Baibel, cha kurijek yikumangan, ni cha mudimu wa chingand. (1 Kor. 15:58) Kusal mwamu kukez kukukwash kulam chisu ni kukez kukukwash kand ‘kwijik mud mudia rusot ra Yehova.’—Ef. 5:17.
5. Mutapu ik tukutwisha kwitekin chisu mulong wa midimu ya muspiritu, ni tukutaninamu mutapu ik mu kusal mwamu?
[Caption on page 1]
[Study Questions]