Ikalany ni Chiyul Chimwing Chadinga Kand mu Yesu
1. Ov chiyul ik chamekeshay Yesu?
1 Ap anch kand kal tumumanangap Mwan a Nzamb, pakwez kusutin ku rusangu rifundinau ra mwom wa Yesu ni ra mudimu wend, twashikena kal chakin kamu ku kumukat. (1Pi. 1:8) Mu kuziyin ku rusot ra Tatukwend, ndiy washa ndond yend ya ntumb mwiur ni weza pansh. Mud muntu, ndiy wipana mu kuyisadin antu akwau ni wapana mwom wend mulong wa ukwash wa antu. (Mat. 20:28) Dizu dia Nzamb ditukasikeshin anch: “Ikalany ni chiyul chimwing chadinga kand mu Kristu.” Ov mutapu ik lel tukutwisha kwimburij spiritu wend wa kwipan?—Fil. 2:5-8.
2. Chakamish ik chiyishikedina in Kristu avud, ni yik yikutwisha kuyikwash kuchiwin?
2 Pitwovila Kuziy: Ap chadingay Yesu uwanyidina, niyend waziyanga. Dichuku dimwing, padingay “waziyang kal mulong wa weny,” ndiy wapana uman wovikena kud mband mwin Samaria (Yohan 4:6) In Kristu avud nlel niyau chakamish chinech chikat kuyishiken. Kupwish kwa kusal mudimu uziyishena nakash mu rubing, chikutwish kwikal chikasikena kwikal nich usu wa kusal mudimu wa kulejan. Pakwez, anch twalejan chisu ni chisu, tukuman anch mudimu wa Ukristu ukat kutukasikesh muspiritu.—Yohan 4:32-34.
3. Ov mutapu ik tukutwisha kwimburij yovil ya Yesu mulong wa kulejan?
3 Dichuku dikwau kand, Yesu nau in kwilej end aya kwi ndond kwa ayinau chakwel iswedishaku. Pakwez, antu avud ijika kuyilau ni aya mau ashik kurutu kwau. Pa ndond pa kujiman, Yesu “wayovila riy” ni wasambisha “kuyilej yom yivud.” (Mar. 6:30-34) Kubutul ni kutakel malejan ma Bibil kwitin kand kwikal nich chiyul mud chinech. Chitin usu chisu chawonsu ni rukat rakashinsh mulong wa antu. Anch utakedinap dilejan dia Bibil katat, kangal walik kusal usu wa kukimb kwikal nich dilejan ap dimwing kusu.
4. Ov mutapu ik mudimu wa uchibol nkwash utukwashin kwimburij chiyul cha Kristu?
4 Tutekany Kurutu Yisakin ya Muspiritu: Mudimu wa uchibol nkwash ukutwish kutukwash kutongin nakash pa mijikit ya mu spiritu. Nambaz umwing changadim wafunda anch: “Makwend a murund nam umwing watukasikesha etu awonsu aad kusal nend mudimu wa uchibol nkwash mwi ngond umwing. Nasangara nakash patwibomba nend. Nasangara kuyijik akadivar ni anambaz nawamp nakash, ni pakad kulab ikala kud am mud dijuku. Nasangara kand kwikal nich chisu cha kwambamb nau antu akwau piur pa Yehova ni kuyifundish uyakin upandikena kuwap wa Want. Yom yiney yawonsu yansala kwiyov udia piswimp nakash ni Yehova ni dirijek diend.”— Kus. 34:8.
5. Ov mulong wak tufanyidin kudandamen kusal usu wa kwimburij chiyul chadinga mu Yesu?
5 Etu awonsu tukat kurish nich mujimbu wetu wakad kuwanyin ni maswir metu ma kumusangarish Yehova. (Rom 7:21-23) Tufanyidin kurishish spiritu wa kulik kwikasikesh wa mangand. (Mat. 16:22, 23) Yehova ukutwish kutukwash kuwin kusutil ku spiritu wend utumbila. (Gal. 5:16, 17) Mutapu tuchingedina kukwolik kwetu mwi ngand yisu yitentamina ya Nzamb, mwamu twikalany lel ni chiyul chimwing chadinga kand mu Yesu mu kutek yisakin ya Want ni ya akwetu kurutu kwa yisakin yetu.— Mat. 6:33; Rom 15:1-3.
[Caption on page 1]
[Study Questions]