‘Azurilany Michim Yen’
1. Ov umwing ni umwing wetu ukwet chisend ik?
1 Mu ukadivar wa Ukristu, umwing ni umwing wetu ukwet chisend cha kuletish chirungul mu chikumangen. (1 Pi. 1:22; 2:17) Chirungul chinech chikat kumekan chisu ‘twazurila michim’ mu rukat retu rukurikina kud umwing ni mukwau. (2 Kor. 6:12, 13) Ov mulong wak chidi cha usey kuyijik akadivar ni anambaz etu nawamp?
2. Mulong wak chidi cha usey kufukish urund nau ambay netu akaritiy?
2 Kasikeshany Urund Nakash: Anch twijikijan nawamp nau ambay netu akaritiy, tukuman nich usey ritiy rau, kujijaman kwau, ni ngikadil yau yikwau yiwamp muchifanyidina. Kuturumbukin kwau kukwikal mud tuyom twachamwamu kud etu, ni moj ya urund yikukasikan nakash. Kwijikijan nawamp umwing ni mukwau kukutuwanyish nawamp chakwel kwongojijan ni kukasikeshijan umwing ni mukwau. (1 Tes. 5:11) Tukutwish kwikal ‘ukwash ukasikeshina’ umwing ni mukwau chakwel kwiyep yibachikin yiyimp ya mangand ma Satan. (Kol. 4:11) Mutumena machuku ma nsudiel minam mizwila too mpwich, tujikitishin nakash mud ik pakwikal nau arund awamp pakach pa antu a Yehova!—Jinsw. 18:24.
3. Mutapu ik tukutwisha kwikal ukwash ukasikeshina kud akwetu?
3 Arund a pa muchim akutwish kwikal musul wa pakampwil wa dikasikesh ni rongoj chisu tudia mu yakamish. (Jins. 17:17) Mukristu umwing mband warisha nich kwiyov wakad usey uvurikin anch: “Kwadinga arund ading ni kulond yom yikasikeshina chakwel kwinkwash kuwin yitongijok yiyimp yinadinga nich.” Arund inay adi chiyukish cha Yehova.—Jinsw. 27:9.
4. Mutapu ik tukutwisha kuyijik akwetu tudia nau mu chikumangen nawamp?
4 Tuyisangerany Akwetu: Ov mutapu ik tukutwisha kwazuril michim mu rukat rukurikina mulong wa ambay netu akaritiy? Kuwejinaku ku kuyilangwish akwetu ku yikumangan ya Ukristu, tusalany usu wa kwambamb nau. Pakad kwiyandjik mu milong yau, tumekeshany kuyisanger kwa pakampwil. (Filp. 2:4; 1 Pi. 4:15) Mutapu ukwau wa kwijikijan nau akwetu udi kuyitazukin yakudia. (Luka 14:12-14) Ap ukutwish kwirijek kusal nau mudimu wa chingand. (Luka 10:1) Mutapu tutongina kuyijik akadivar netu nawamp, tukat kufukish umwing wa chikumangen.—Kol. 3:14.
5. Ov mutapu ik umwing tukutwisha kutanduril urund wetu?
5 Ov tusotining ching kusu kutond arund netu a piswimp pakach pa antu a rad retu anch tusotining kutond antu akweta yisakin mud yetwetu? Tufanyidinap kulik yom mud yiney kutek mimbu ku urund tutila mu chikumangen. David ni Yonatan mud kand Rut ni Naomi ata urund ukash kwikalap nchik kushalijan kwa rad ni mashakamin. (Rut 4:15; 1 Sam. 18:1) Ov ukutwish kutanduril urund wey? Kusal mwamu kukutwish kulet yiyukish yakad kutongin.
6. Yiyukish ik yimwing tukutaninamu anch twazuril michim yetu mu rukat rukurikina mulong wa akadivar netu?
6 Ku kwazurilang michim yetu mu rukat rukurikina mulong wa akwetu, tukasikeshijadin umwing ni mukwau ni kulet chisambu mu chikumangen. Chikwau kand, Yehova amwinend utuyukishin mulong wa rukat tumekeshina kud akadivar netu. (Kus. 41:1, 2; Heb. 6:10) Ov ukwitekin rutong ra kwijikijan nau akadivar nawamp anch chiswapel?
[Caption on page 1]
[Study Questions]