Lamany Urund Mu Mangand Makad Rukat

“Yom yiney nakujidikany en anch, katijanany muntu ni mukwau.”—YOH. 15:17.

1. Mulong wak in Kristu a mu mivu chitot ya kusambish adinga aswiridin kwikal arund a piswimp?

PA UCHUKU wend wa nsudiel panap pansh, Yesu wayikasikesha in kwilejend ashinshamena chakwel ikala arund muntu umwing ni mukwau. Pa urel winou, ndiy walonda anch rukat rikwimekeshinau muntu umwing ni mukwau rawiy rikeza kuyijikish anch adi in kwilejend. (Yoh. 13:35) Atwimbuy adinga afanyidin kwikal arund a piswimp umwing ni mukwau anch adinga asotil anch ajijamena yoziu yadinga yiyichingedina kurutu ni mulong wa kuwanyish mudimu wadinga usotinay Yesu kuyinkish chakwel ausala. Chakin kamu, in Kristu a mu mivu chitot ya kusambish ijikana mulong wa kwipan kwau kukash kudi Nzamb ni kudi muntu umwing ni mukwau.

2. (a) Chom ik tufanyidina kusal ni mulong wak? (b) Yipul ik tukushinshikina?

² Nlel, udi musangar mudi ik wa kwikal chid cha dirijek dia pa mangand mawonsu dikweta yid yilondwila chilakej chashau in Kristu adingaku mu mivu chitot ya kusambish! Tufanyidin kukwat mupak wa kuziyil kwi mbil ya Yesu ya kwimekeshin rukat rakin muntu umwing ni mukwau. Pakwez, mu machuku manam ma kwisudiel, antu avud adi akad kushinshaman ni akangeny kumekesh rukat. (2 Tim. 3:1-3) Urund ukatau kumekesh uding kwau wa ku mes ni wa kwisotin ayinau. Chakwel anch tulama chijiken chetu mudi in Kristu akin, tufanyidin tupandakana chovil chinech. El tushinshikinany yom yiney: Chom ik chidia mufulandal wa urund wakin? Mutapu ik tukutwisha kwikal ni arund awamp? Chisu ik tufanyidina kukatul urund? Ni mutapu ik tukutwisha kulam urund uwamp?

Chom ik Chidia Mufulandal wa Urund Wakin?

3, 4. Wisu mufulandal wa urund ukash, ni mulong wak?

³ Urund ukash wengamidin pa kumukat Yehova. Mwant Salomon wafunda anch: “Ap muntu wamupandakan muntu udia amwinend, pakwez antu aad akumubombaken, amupandakanamu. Moj wa chibab ukasiken kukatuk swa.” (Mul. 4:12) Anch Yehova wikal nsak wa kasatu mu moj wa urund, urund winou ukwikal wa chikupu.

⁴ Chakin, ap antu akad kumukat Yehova akutwish niyau akwat urund uwamp. Pakwez anch antu ikal pamwing ni kukwat urund ni Nzamb, urund wau ukwikal ukash. Anch kwikal kupwitijan, arund awamp akusalijan yom mu mutapu ukutwisha kumusangaresh Yehova. Anch akankuny a Nzamb asotil kuyauril, akankuny inay akat kushiken ku kuman anch urund ukwetau in Kristu akin udi ukash. Mu rusangu rawonsu ra muntu, atushalapol a Yehova amekeshin kal anch akutwish ap kufa kupandakanamu kutungunijan matung umwing ni mukwau.—Tang 1 Yohan 3:16.

5. Mulong wak urund wa Rut ni Naomi wadinga ukash mwamu?

⁵ Pakad kwidjidjek, urund utukutwisha kusanger nakash udi urund ni antu amukatina Yehova. Tushinshikinany chilakej chenday Rut ni Naomi. Amband inay akwata urund umwing usangareshina nakash wisambidinau mu Bibil. Chom ik chasala anch urund wau wikala ukash mwamu? Rut walonda patok diyingish dia urund wau pamwelay Naomi anch: “Antu ey akwikal antu am, ni Nzamb wey Nzamb wam. . . . Yehova ansadila mwamu ni kuwejinaku ching anch rufu rawiy rikutwaurila ey ni am.” (Rut 1:16, 17, NW) Chakin kamu, Rut ni Naomi adinga amukatin Nzamb nakash, ni alikina rukat riner rikala nich usu pa mutapu wadingau ni kwisadil umwing ni mukwau. Mudi chibudikin, Yehova wayiyukisha awonsu aad.

Mutapu wa Kwikal ni Arund Awamp

6-8. (a) Chom ik chikata kusal anch urund wikala wa chikupu? (b) Mutapu ik ukutwisha kwikal wa kusambish mu kuta urund?

⁶ Chilakej cha Rut nenday Naomi chimekeshin anch urund uwamp kiudiap kwau urund wakad mufulandal. Kukatijan ni Yehova wawiy mufulandal. Pakwez urund ukash udi chibudikin cha mudimu ni cha kwipan kukash. Ap anakamuntu amusadidila Yehova mu chikumangen cha Ukristu niyau afanyidin kusal usu nakash chakwel ikala arund a piswimp. Mutapu ik lel ukutwisha kwikal ni arund awamp?

⁷ Ikal wa kusambish. Kambuy Paul wayikasikesha arund nend adinga mu chikumangen cha in Rome chakwel ‘ayakang aeny.’ (Rome 12:13) Kumasadil mudi movikena, kurumburikin kusal yom yivud chimwing ni chimwing. Chawiy chimwing, kwikal mwin kuyakang aeny kwitining kusal tuyom tukemp tukemp, pakwez chisu ni chisu. Kadiap muntu windjing ukwikala nich muchim wa kuyak aeny pa ndond yey. (Tang Jinswir 3:27.) Njil yimwing ukutwisha kumekeshin muchim wa kupan yidi kusutil ku kuyitazuk antu kushalijan adia mu chikumangen chakwel udiany pamwing. Ov, ukutwish wasal chikala chaku chey cha kuyitazwok antu adia mu chikumangen chen?  

⁸ Njil yikwau ukutwisha kusadil chakwel wikala wa kusambish mu kukwat urund yidi kusutil ku kuyang mu mudimu wa kulejan ni antu kushalijan. Anch washikany ku chikumbu cha yen ni wamutesh mukwen uyila nend walond yom yidia mu muchim wend piur pa kumukat kwend Yehova, ukutwishap widjidjek kand pakwez ukumushejin muntu winou piswimp.

9, 10. Chilakej ik chashay Paul, ni mutapu ik tukutwisha kumwimburij?

⁹ Jimbany mu rukat. (Tang 2 Korint 6:12, 13.) Ov, wiyovilap kal anch mu chikumangen mwikil muntu ap umwing ukutwisha kwikal murund ney? Anch mwamu wovila, ov, chidi mulong ey yey ukepishina mutapu wa kumuman muntu ukutwisha kwikal murund ney? Kambuy Paul washa chilakej chiwamp pa mulong wa kujimb mu rukat rend. Pa chisu chimwing, kadingap ni kutongin kukwat urund ni antu akad kwikal Ayuda. Pakwez, washikena ku kwikal “mupostol wa in mangand.”—Rome 11:13.

¹⁰ Chikwau, Paul kadingap ni kukwat urund ching ni antu akweta mivu yend. Chilakej, ndiy ni Timote adinga arund a piswimp ap anch ashalijadin ku mivu ni mashakamin ma mwom wau wa pasak. Nlel, ansand avud akat kusanger urund ukwetau ni antu amakurump adia mu chikumangen. Vanessa ukweta mivu 20 ni kusut ulondil anch: “Nikwet murund nam unikatininga nakash ukweta mivu 50 ni kusut. Nikat kumulejang yom yawonsu yinikutwisha kumulej murund ukweta mivu yam. Ni ukat kwinbangin nakash.” Mutapu ik ukatau kushiken ku kukwat urund mudi winou? Vanessa ulondil anch: “Padinga ni kusot kwikal ni urund mudi winou kinachingelap anch wiyezina.” Ov, udi tayad kukwat urund ni antu amakurump kukupandakanamu? Chakin kamu Yehova ukukuyukish mulong wa usu wey.

11. Chom ik tukutwisha kwilejin ku chilakej chenday Yonatan ni David?

¹¹ Ikal ushinshamena. Salomon wafunda anch: “Murund ukat kumekesh kukat machuku mawonsu. Mwanamaku wavadika mulong wa kukwash mu yom yikash.” (Jinsw. 17:17) Pafunday mazu minam, Salomon wadinga ni manangu mend urund wadingay nich tatukwend, David ni Yonatan. (1 Sam. 18:1, NW) Mwant Saul wadinga ukatin anch mwanend Yonatan amuswikana mwi nkwas ya want wa Isarel. Pakwez Yonatan witiyija anch Yehova wamutondin kal David mulong wa chisend chinech. Pakad kwikal mudi Saul, Yonatan kadingap ni kumwovil David ris. Kovap kuyip ku muchim mulong wa ntumb yamutumbishau David, ni kitiyijap kapamp kamwing yitongijok yadingay nich Saul ya kusot kumujip David. (1 Sam. 20:24-34, NW) Ov, tudi mudi Yonatan? Anch arund netu atambul yisend, ov, tukat kuyisanger? Padingau mu yisu ya mar, ov, tukat kuyongoj ni kuyikwash? Anch twatesh anch akat kumulondin murund yom yiyimp, ov, tukat niyetu kuyitiyij? Ap anch, mudi mwadingay Yonatan, tukat kumuchidij murund netu?

Pichifanyidina Kukatul Urund

12-14. Chikokujol ik chikatau kwikal nich antu amwing ilejina Bibil, ni mutapu ik tukutwisha kuyikwash?

¹² Anch mwin kwilej Bibil wasambish kukarumuk mu mwom wend, ukutwish wasambish kura pa mulong wa kutan arund. Ukutwish wikal ni arund asangaredinay pakwez akad kushakam kukwatijan nich malejan ma Bibil. Pamwingap wadinga pasak ni kusutish chisu chilemp pamwing nau. Pakwez, katat, waman kal anch yom yisadilau yikutwish yikal nich usu uyimp padi ndiy, chawiy lel watesh anch chifanyidin kukepish urund ni antu inay. (1 Kor. 15:33) Ap mwamu, ukutwish wiyov anch, ang wakatul nau kamu urund kapamp kamwing, ukumekan mudi kashinshamenap.

¹³ Anch ukat kwilej Bibil ni ukwet mulong winou, ijik anch murund muwamp ukusanger anch uwapisha mashakamin ma mwom wey. Ukutwish pamwingap wasot kwinung ney pamwing mu kwilej piur pa Yehova. Ku mutambu ukwau, arund ayimp “akat kunisalany” mulong kiukat “kuyilondulanyip mu tuyimp twau.” (1 Pita 4:3, 4) Chakin kamu arund inay awiy adia akad kushinshaman kudi ey, kiyeyap bwat.

¹⁴ Pakatau in kwilej Bibil kuyilik kudi arund nau a pasak akad kumukat Nzamb, yid ya chikumangen yikutwish yikal arund nau. (Gal. 6:10) Ov, uyij antu akata kukumangan ku yikumangan yen achidia ni kwilej Bibil? Pa yisu yimwing ukat kwikal nau mu urund uwamp?  

15, 16. (a) Mutapu ik tufanyidina kusal anch murund walik kumusadil Yehova? (b) Mutapu ik tukutwisha kumulej Nzamb anch tumukatin?

¹⁵ Chad tukusal nchik anch murund tudinga nend mu chikumangen wakwat mupak wa kumulik Yehova, pamwingap washiken mu chilik cha kumwopat mu chikumangen? Mwikadil winou udi ukash nakash. Pisambinay piur pa mutapu wasalay pantaliken nend murund walika kumusadil Yehova, nambaz umwing ulondil anch: “Niyova mudi chid chimwing chidia mu mujimbu wam chafa kal. Nadinga ni kutong anch murund nam udi mukash mu uyakin, komb kwau bwat. Nasambisha kwiyipul anch wadinga ni kumusadil Yehova mulong wa kusangaresh kwend kusu dijuku diend. Chad nasambisha kushinshikin yibachikin yam. Ov, nadinga ni kumusadil Yehova nich muchim umwing?” Mutapu ik wasalay nambaz pa mulong winou? Ndiy ulondil anch: “Namudjibwila Yehova chisend chinech. Nakwata mupak wa kumulej Yehova anch nimukatin, kichidiap anch mulong ndiy wangikish kal arund adia mu dirijek.”

¹⁶ Tufanyidinap kuchingejin kushal murund wa Nzamb anch tudi kand murund wa antu adia arund a mangand. Mwin kwilej Yakob wafunda anch: “Kiwijanyip anch urund wa mangand udi ukankuny ni Nzamb? Chawiy wawonsu ukukwat urund ni mangand wiyikadish kal amwinend mukankuny ni Nzamb.” (Yak. 4:4) Tukutwish twamekesh rukat retu kudi Nzamb kusutil ku kuchingejin anch Ndiy ukez kutukwash tuwina kushadik kwa murund anch twashinshaman kudiay Ndiy. (Tang Kuseng 18:25.) Nambaz twisambinang kwiur oku, walonda mu wiswimp anch: “Nashikena ku kwilej anch tukutwishap kumusal muntu amukata Yehova ap kutukat etu ayinetu. Udi muntu amwinend ndiy ukutonda kusal mwamu.” Chad chom ik tufanyidina kusal chakwel tulama urund ukash ni antu adia mu chikumangen?

Lamany Urund Uwamp

17. Mutapu ik wisambiningau arund awamp?

¹⁷ Kwisambang kwa patok kukat kusal urund wikala ukash. Piutangina rusangu ridia mu Bibil piur pa Rut ni Naomi, David nenday Yonatan, Paul ni Timote, ukujingunin anch arund awamp alondining yom patok pakwez nich kulimishijan umwing ni mukwau. Pa mulong wa mutapu tufanyidina kwisamb ni akwetu, Paul wafunda anch: “Lik kulond kwen kwikala ni ranaken machuku mawonsu, kutadila mudi mungu.” Paul wadinga wisambidin pinap piur pa mutapu tufanyidina kwisambin ni antu “adia pol,” charumburik anch, antu akad kwikal akadivar netu in Kristu. (Kol. 4:5, 6) Chakin kamu, anch antu akad kwitiyij afanyidin kalimish pitulondila nau, chad chikwikal chipandakena mudi ik kudi arund netu adia mu chikumangen!

18, 19. Mutapu ik tukutwisha kuman chiyul chin chawonsu chikutwishay murund netu mwin Kristu, ni chilakej ik chatushilau amakurump adinga ku Efes?

¹⁸ Arund awamp akwatining nich usey chitongijok cha umwing ni mukwau, chawiy minsamb pakach pau yiding yikasikeshina ap anch ya pa chisu chau. Mwant Salomon mwin manangu wafunda anch: “Many ni mananash makat kusangarish muchim, ni yiyul ya murund yikat kusangarish kand muchim.” (Jinsw. 27:9) Ov, mwamu umeninga yiyul yikwinkishiningau kudi arund ney? (Tang Kuseng 141:5.) Anch murund walond chom kanang pantaliken nich chom kanang chiusadila, usadiling nchik? Ov, umening yilondilay mudi uman ulejena anch ukukatin bil anch ukat kujimanang?

¹⁹ Kambuy Paul wasangera urund wend wa piswimp ni amakurump adinga mu chikumangen cha ku Efes. Chimeken anch wadinga uyij amwing a amakundj inay pa chisu chitiyijau. Pasalay chikumangan chend chansudiel pamwing nau, ndiy wayiyula kamu patok. Mutapu ik wasalau? Arund a Paul kajimanap. Pakwez, awiy asangera nakash anch ukat kuyibangin, ni adila mansoj mulong ndiy wayileja anch kakumumanap kand.—Mid. 20:17, 29, 30, 36-38.

20. Chom ik chikusalay murund mwin rukat?

²⁰ Arund awamp kakatap kusu kwitiyij yiyul yiwamp pakwez ayipanining niyau. Chakin kamu, tufanyidin kushinshikin chisu cha kutal ‘pa milong yetu ayinetu.’ (1 Tes. 4:11) Tufanyidin kand kwijik anch muntu ni muntu udia pakach petu “ukez kilondil amwinend kudi Nzamb.” (Rome 14:12) Pakwez pichifanyidina, murund mwin rukat ukumuvurish nich kalimish murund nend yijil ya Yehova. (1 Kor. 7:39) Chilakej, chom ik ukusala anch waman anch murund udia mujich ukat kwizez ni muntu wakad kwikal mwin kwitiyij? Pakad kwov wom wa kushesh urund wen, ov, ukwidjidjek pa kubudish chitongijok piur pa kwiyakamish kwey? Ap anch murund ney wadiul kwend chiyul chey, chom ik ukutwisha wasal? Murund muwamp ukukimb ukwash wa rukat wa atufung chakwel amukwasha murund uyila nayimp. Chitining kukapuk chakwel kusal mwamu. Pakwez, kwikil chom chiyimp chikeza kuushiken urund wengamidina pa kumukat Yehova.

21. Chom ik tukeza etu awonsu kusal pa yisu yimwing, pakwez mulong wak chidi cha usey anch tulama urund ukash mu chikumangen?

²¹ Tang Kolosay 3:13, 14. Pa yisu yimwing, tukutwish twayishikij arund nend ku kwikal ni “mulong” netu, ni anch niyau asal ap alond dizu dikutwisha kutujimesh. Yakob wafunda anch: “Etu awonsu tukat kurumbuk mu yom yivud.” (Yak. 3:2) Pakwez, chom chisadila anch urund wikalaku chidiap uvud wa tupamp tukata kumurumbukin murund pakwez mu chilik ik tukata kulikishijadin. Chidi cha usey mudi ik anch twakasikesh urund wetu kusutil ku kwisambang patok ni kulikishijadin umwing ni mukwau! Anch twamekesh rukat mudi riner, ukwikal “mwoj uwanyidina ukasila yawonsu pamwing mu kwovijan.”

Ukwakul Nchik?

• Mutapu ik tukutwisha kwikal ni arund awamp?

• Chisu ik chifanyidina urund kufa?

• Chom ik tufanyidina kusal chakwel twikala nich urund ukash?

[Chipich chidia pa paj wa 25]

Chom ik chadinga mufulandal wa urund ukash wadingau nich Rut nenday Naomi?

[Chipich chidia pa paj wa 26]

Ov, ukat kumekesh chisu ni chisu muchim wa kuyak aeny?