“En Udiany Arund Nam”

“En udiany arund nam anch wasalany yom yinajidika kudi en.” —YOH. 15:14.

1, 2. (a) Arund a Yesu adinga mu mashakamin ik kushalijan ma mwom? (b) Mulong wak chidia cha usey anch twikala bil arund a Yesu?

AMAKUNDJ adinga mu kapalikany ka piur pamwing ni Yesu adinga mu mashakamin ma mwom kushalijan. Pita ni mwanamakwend Andre adinga amuta ansh. Mateu wadinga mwin kulambwish yitad—wadinga ni kusal mudimu umwing wadinga ukisinau kudi Ayuda. Amwing, mudi Yakob ni Yohan, adinga amwij Yesu kudiosh kamu mu wanikanch wau. Akwau, mudi Natanyel, padinga pasut kal mivu yikemp kudiosh pamwijikinay. (Yoh. 1:43-50) Ap mwamu, awonsu adingap pa dichuku dinidia dia musambu wa Kusut kwa Yehova pa uchuku winiwa mu Yerusalem adinga itiyijin anch Yesu wadinga Mesia wakanau, Mwan wa Nzamb mwom. (Yoh. 6:68, 69) Chimeken anch ova musangar nakash pa kumutesh walond anch: “Am nakutazukany kal anch arund, mulong yom yawonsu yinatesha kudi Tatuku yawiy yinijikishila kal kudi en.”—Yoh. 15:15.

² Yesu wayileja atwimbuy end ashinshamena mazu minam ni masadil chilik chimwing kudi in Kristu awonsu azizidilau many nlel ni, mu kulond kuya kulemp, masadil kand padiau ambay nau “amikoku akwau.” (Yoh. 10:16) Chikalap nchik mashakamin metu, tukutwish twitapil dilau dia kwikal arund a Yesu. Urund wen ni Yesu udi wa usey nakash mulong kwikal arund nend kutwikadishin kapamp kamwing arund a Yehova. Chakin kamu, chikasiken kumushejin Yehova pakad kumushejin bil Kristu. (Tang Yohan 14:6, 21.) Chom ik lel tukutwisha kusal chakwel twikala arund a Yesu? Kurutu kwa kwisambin mulong winou usey nakash, el tushinshikinany bil chilakej cha Yesu amwinend pa mulong wa kwikal murund muwamp chakwel tumana yitukutwisha kwilejin ku mutapu wasalau in kwilejend pa mulong wa urund nend.

Chilakej cha Yesu cha Kwikal Murund Muwamp

3. Yesu wijikana mulong wa chom ik?

³ Mwant Salomon mwin manangu wafunda anch: “mpich ukwet arund avud.” (Jinsw. 14:20) Chom chinech chamanau chidi kulond kamu mu wiswimp mudingau antu akad kuwanyin akwatininga urund nich chitongijok cha kusot chom chikutwishau kutaninamu pakad kutongin chom chikutwishau awiy kupan. Yesu kamekeshap kuziy kwinoku kwa chiuntu. Kadingap ni kulond mwikadil wa nfalang ukwetay muntu ap mudia mashakamin ma mwom wa muntu. Chakin, Yesu wamwovila nsangarum mpich rukat ni chawiy wamutazuka chakwel ikala mwin kwilej wend. Pakwez, Yesu wamwela nsangarum winou anch aya bil akalandisha yom yend ni kuyangenay atuzwendj. (Marko 10:17-22; Luka 18:18, 23) Yesu kadingap wijikena mudi muntu ukata kulondul pa madjimb ma mapit ni ntumb, pakwez wadinga wijiken anch udi murund wa antu a chamwamu adingau ni kupipesh.—Mat. 11:19.

4. Mulong wak chitwishikin kulond anch arund a Yesu adinga ni kurumbok?

⁴ Chakin kamu, arund a Yesu adinga antu in kurumbok. Dichuku dimwing Pita wakanganya kuman yom mu mutapu wa muspiritu. (Mat. 16:21-23) Yakob ni Yohan amekesha mwikadil wa manangu wa kwisotin ching ayinau pamwitau Yesu anch ayinkisha jindond jijim mu Want. Chisal chau chayovisha atwimbuy akwau ku muchim fu, ni kudiosh pinipa, kukakalijan mulong wa kusot kwikal mujim kuyipandakan akwau kwasambisha. Pakwez, Yesu, nich kushimpish muchim wapakisha kuyidiosh chitong chinech mu arund nend ni kayijimenap swa.—Mat. 20:20-28.

5, 6. (a) Mulong wak Yesu washala murund wa atwimbuy avud? (b) Mulong wak Yesu wakatula urund nenday Yudas?

⁵ Yesu kakwatap urund ni antu inay akayitil mulong anch wadinga uziyil ap anch kadingap ni kuman kuburen kuwanyin kwau. Pakwez, ndiy watonda kutal ching pa ngikadil yau yiwamp. Chilakej, Pita, Yakob ni Yohan alala tul pa ndond pa kumukwash Yesu pa chisu chadingay mu yoziu yikash. Chakin kamu Yesu wova ushon. Ap mwamu, wamana anch adinga nich manangu mawamp, ni walonda anch: “Muchim ukatil . . . , pakwez mujimbu uziyil.”—Mat. 26:41.

⁶ Pakwez, Yesu wakatula urund wend nenday Yudas Isakariot. Ap anch Yudas wadinga umeken ku mes anch udi murund, Yesu wadinga wamana kal anch muntu winou wadinga pa kusambish murund walikidin kal yitongijok yijondila yandama mu muchim wend. Mulong Yudas washikena ku kwikal murund wa mangand, chawiy wiyikadisha amwinend mukankuny wa Nzamb. (Yak. 4:4) Chawiy lel, Yesu wadinga wamudiosh kal Yudas pa chisu Chalonday anch atwimbuy end 11 ashinshamena adi arund Nend.—Yoh. 13:21-35.

7, 8. Mutapu ik wamekeshay Yesu rukat mulong wa arund nend?

⁷ Yesu kadingap ni kwiman pa kurumbuk kwa pakur kwa arund nend ashinshamena ni wadinga ni kusal mulong wa kuwap kwau. Chilakej, wamwilembila Tatukwend chakwel ayilama pa chisu cha yoziu. (Tang Yohan 17:11.) Yesu wamekesha anch wadinga uyiteshin mulong wa mimbu yau. (Marko 6:30-32) Ni wadinga usangaredin kichidiap kusu kuyilej yom yadingay ndiy utongidin pakwez kand wadinga ni kuta matu chakwel atesha yadingau niyau ni kutongin.—Mat. 16:13-16; 17:24-26.

⁸ Yesu wadinga mwom ni wafa mulong wa arund nend. Chakin, wadinga wij anch ufanyidin kupan mwom wend mudi chom chitinau kukwatijan nich mbil mulong wa kuwanyish chijil ja kutentam cha Tatukwend. (Mat. 26:27, 28; Heb. 9:22, 28) Pakwez, Yesu waladika mwom wend mulong wa rukat rend. Ndiy walonda anch: “Kwikil muntu ukweta rukat rujim rupandaken riner, ra kuladik kupand kwend mulong wa arund nend.”—Yoh. 15:13.

Mutapu ik Witiyijau in Kwilej Urund wa Yesu?

9, 10. Mutapu ik wasalau antu pa kuman muchim wa kupan wa Yesu?

⁹ Yesu wadinga ni kusadil chisu chend, rukat rend ni yom ya ku mujimbu yadingay nich. Mudi chibudikin, runtu radinga ni kwez kudiay ndiy ni niyau adinga nich musangar wa kumwinkish yom yau. (Luka 8:1-3) Kudiokal ku yom yimenay Yesu amwinend, chawiy chashikenay ku kulond anch: “Panany, ni yen akez kakwinkishany; pandikeshany, ni akez katul ku mend kwen chanyikeshau chishikuruka, chabatamishau, chikata kusompwok. Mulong chilik chawonsu chiukwilikanya nich chawiy chikeza kanilikinau nich ni yen.”—Luka 6:38.

¹⁰ Chakin kamu, antu amwing asota kwikal arund a Yesu mulong kusu wa kutaninamu kwau ayinau. Arund inay a makasu amusha Yesu pateshau nayimp chom kanang chalonday. Pa ndond kumwitiyij Yesu ap anch kudi chom chakanganau kutesh nawamp, ashikena ku mupak uyimp ni amwomba nyim amusha. Pakwez, atwimbuy adinga ashinshamen. Urund wau ni Kristu auteka mu choziu chisu ni chisu, pakwez asala usu wau wawonsu mulong wa kumukwash pa yisu yiwamp ni yiyimp. (Tang Yohan 6:26, 56, 60, 66-68.) Pa uchuku wend wansudiel panap pansh padingay muntu, Yesu wamekesha anch uyisangaredin arund nend, chawiy chalonday anch: “En udiany in kudandamen nam mu yoziu yam.”—Luka 22:28.

11, 12. Yesu wayinkisha in kwilej kashinsh mutapu ik, ni mutapu ik wasalau niyau?

¹¹ Kupwa kamu kwa Yesu kuyijikitish in kwilejend mulong wa kujijaman kwau, amakundj inay amusha. Mu yisu yikemp, ayova antu wom mu chilik cha kukepish rukat rau mulong wa Kristu. Pakwez, Yesu wayilikishina kakwau kand. Kupwa kwa rufu rend ni kusanguk kwend, weza kumekan kudi awiy ni wayinkisha kashinsh anch adi arund nend. Chikwau kand, wayinkisha mudimu wa kusal—kuyikadish antu a “ku michid yawonsu” in kwilej ni chakwel ikala atuman end djat “ni kwisudiel kwa mangand.” (Mat. 28:19; Mid. 1:8) Mutapu ik wasalau in kwilej?

¹² In kwilej ipana ni muchim umwing ni mupim umwing mu kulejan uruu wa Want. Nich ukwash wa spiritu utumbila wa Yehova, pakad kulab izwisha malejan mau mu Yerusalem. (Mid. 5:27-29) Ap wom wa rufu kiwayikangeshap kand kuziyil kwi mbil yayinkishau kudi Yesu ya kuyikadish antu in kwilej. Mu kusut kwa makum makemp ma mivu kudiosh patambwilau mbil yiney ya Yesu, kambuy Paul washikena ku kufund anch rusangu ruwamp arilejen kal “kudi awonsu atangilau mwishin mwa diur.” (Kol. 1:23) Chakin kamu, in kwilej inay amekesha anch asangera nakash urund wadingau nich nenday Yesu!

13. In kwilej a Yesu alikina malejan mend mikala ni usu mu mwom wau mu mutapu ik?

¹³ Antu ikala in kwilej niyau asala anch malejan ma Yesu mikala mu mwom wau. Kudi avud au, chayita kukarumuk kujim mu mashakamin mau ni piur pa untu wau. In kwilej amwing asu adinga pa kusambish in utum, in masandj, in kukwachik maar ap ij. (1 Kor. 6:9-11) Akwau adinga afanyidin kukarumun yitongijok yau pantaliken nau antu a ulombu wa chikit ukwau. (Mid. 10:25-28) Chikalap nchik mwamu, awiy amuziyila Yesu. Adjibwila kwa untu wau wa pasak ni amudjala muntu musu. (Efes 4:20-24) Ashikena ku kwijik nawamp “chiyul cha Kristu,” kutesh nawamp ni kwimburij nawamp mutapu wend wa kutong ni wa kusal yom.—1 Kor. 2:16.

Urund Wetu ni Kristu Nlel

14. Yesu washilamu anch ukusal chom ik pa chirung cha “kwisudiel kwa mangand”?

¹⁴ In Kristu avud adingaku mu mivu chitot ya kusambish adinga amwij Yesu ayinau ap anch amwing au amumana kupwa kwa kuvumbuk kwend. Pakwez etu kitwitapilap dilau dined dia kumuman. Mutapu ik lel tukutwisha kwikal arund a Kristu? Njil yimwing yidi ya kuziyil ku umutakel utwinkishinay kusutil ku chisak cha kashalapol ushishamena ni kubabal, chidia cha anamakwend a Yesu azizidilau many achidia ni katat unou panap pansh. Yesu washilamu anch pa chirung cha “kwisudiel kwa mangand,” anch ukez kumutek “piur pa yom yend yawonsu yikwetay.” (Mat. 24:3, 45-47) Nlel, antu avud asotina kwikal arund a Kristu kadiap yid ya chisak chinech. Kwitiyij kwau umutakel utambwilau kusutil ku chisak cha kashalapol ushishamena ni kubabel kukwet usu ik pa urund wau ni Kristu?

15. Chom ik chidinga chijingidij chimekeshina anch muntu ou udi mukoku ap mpemb?

¹⁵ Tang Mateu 25:31- 40. Yesu wayitazuka antu akusala chisak cha kashalapol ushishamena ni kubabal anch anamakwend. Mu chishimu chalonday cha kuyauril amikoku ni ampemb, Yesu walonda patok anch mutapu utukata kuyisadil anamakwend udi kamu kumusadil ndiy amwinend. Chakin kamu, ndiy walonda anch chijingidij chijim chikeza kutek kushalijan pakach pa mukoku ni mpemb chikez kwikal mutapu ukusalay muntu pantaliken ni “umwing wau akadivar [nend] akemp ang.” Chawiy lel, njil ya kusambish yikatau kumekeshin antu akweta ruchingej ra kushakam pansh anch asotil kwikal arund a Kristu yidi kusutil ku kuchikwash chisak cha kashalapol ushishamena.

16, 17. Mutapu ik tukutwisha kumekesh anch tudi arund a anamakwend a Kristu?

¹⁶ Anch uchingejidin kushakam panap pansh mu Want wa Nzamb, mutapu ik lel ukumekesha anch udi murund wa anamakwend a Kristu? El tushinshikinany yom yisatu kusu. Cha kusambish, chidi kusutil ku kusal mudimu wa kulejan ni muchim wawonsu. Kristu wayinkisha anamakwend mbil ya kulejan rusangu ruwamp mu mangand mawonsu. (Mat. 24:14) Pakwez, atushal a anamakwend a Kristu adia pansh nlel unou edin kwikal nich yisend yilimina pa kusend chisend chinech pakad ukwash wa arund nau a amikoku akwau ashinshamena. Chakin kamu, chisu chawonsu chisadilau amikoku akwau mudimu wa kulejan, akat kuyikwash anamakwend a Kristu kuwanyish mudimu wau utumbila. Chisak cha kashalapol ushishamena ni kubabal chikat kusanger nakash urund winou, mudi mwadingay Kristu.

¹⁷ Chom cha kaad chikutwishau kusal amikoku akwau mulong wa kuyikwash anamakwend a Kristu chidi kuyikwash nich nfalang mulong wa kusal mudimu wa kulejan. Yesu wayikasikesha in kwilej chakwel ikala arund a “dipit diakad kutentam.” (Luka 16:9) Kichidiap anch tukutwish twaland urund wetu wa kuland ni Yesu ap ni Yehova bwat. Pakwez, anch twasadil mapit metu mulong wa kukwash nich yisak ya Want, tukumekesh urund wend ni rukat rend, kichidiap kusu ku kulond ku kan chamwamu, pakwez ku “midimu ni yakin.” (1 Yoh. 3:16-18) Tukat kupan ukwash winou wa nfalang pitukata kusal mudimu wa kulejan, pitukata kupan milambu ya nfalang mulong wa mudimu wa kutung ni kulam yikumbu mu tukata kukumangen ni pitukata kupan nfalang mulong wa mudimu wa kulejan pa mangand mawonsu. Nfalang jitukata kupan jikala jikemp ap jivud, chakin kamu Yehova ni Yesu akat kusanger kupan kwetu kwa kwikatin.—2 Kor. 9:7.

18. Mulong wak tufanyidina kuziyil ku umutakel uletinau amakurump a chikumangen udiokila mu Bibil?

¹⁸ Cha kasatu chidi anch etwawonsu twimekeshin anch tudi arund a Kristu kusutil ku kusal mu kwovijan ku kulondul umutakel uletinau amakurump mu chikumangen. Amakundj inay ayitonda kudi spiritu utumbila mwishin mwa umutakel wa Kristu. (Efes 5:23) Kambuy Paul wafunda anch: “Ziyilany ni kwikepish kudi in kutakel en.” (Heb. 13:17) Pa yisu yimwing tukutwish twaman anch chidi chikash kuziyil ku umutakel utwinkishinau amakurump udia mu Bibil. Twij nawamp kurumbok kwau ni chom chinech chikutwish chayipish yitongijok yetu ni mutapu tukutwisha kuman chiyul chau. Chikalap nchik mwamu, Kristu, Mutu wa chikumangen, usangaredin kuyisadil amakundj inay aburedina kuwanyin. Chawiy lel, mutapu utukusala pantaliken nich ulabu wau ukwet chibudikin pa urund wend ni Kristu. Anch twatek kurumbok amakurump kwang, chad twasanger kulondul umutakel wau, tukumekesh anch tumukatin Kristu.

Kutukutwisha Kuyitan Arund Awamp

19, 20. Ik tukutwisha kutan mu chikumangen, ni chom ik tukushinshikina mu mutu wa mulong ulondwilaku ou?

¹⁹ Yesu udandamedin kutubangin kichidiap kusu kusutil kudi atufung in rukat atulamina pakwez kand chidi kusutil kudi amaku, akadivar ni anambaz netu a muspiritu adia mu chikumangen. (Tang Marko 10:29, 30.) Pawasambisha kukumangan pamwing ni dirijek dia Yehova, mutapu ik wasalau anamakwey a ku mujimbu? Akukwasha nich ruchingej chakwel usala usu wa kumushejin piswimp Nzamb ni Kristu. Pakwez Yesu wababesha anch pa yisu yimwing “akankuny ayimp a muntu akez kwikal ching antu a mu dijiku diend.” (Mat. 10:36, MM) Chongojin mudi ik pa kwijik anch tukutwish twayitan mu chikumangen antu akwikala arund netu a piswimp kuyipandakanamu anamakwetu a ku mujimbu!—Jinsw. 18:24.

²⁰ Mudi muchimekedina mu kulangwish kwa Paul kudia kwisudiel kwa mukand wend wafundinay chikumangen cha Rome, ndiy wavuramena majin mavud ma arund nend a piswimp. (Rome 16:8-16) Kambuy Yohan wapwisha mukand wend wa kasatu ni mazu manam: “Yilangwisha arund pa dijin pa dijin.” (3 Yoh. 14) Chimeken patok anch niyend wadinga ni arund a piswimp nakash. Mutapu ik tukutwisha kwimburij chilakej cha Yesu ni cha in kwilejend a kusambish kusutil ku kukwat urund uwamp ni akadivar ni anambaz netu a muspiritu? Mutu wetu wa mulong ulondwilap ou ukwakul chipul chinech.

Ukwakul Nchik?

• Chilakej ik chashay Yesu pa mulong wa kwikal murund muwamp?

• Mutapu ik witiyijau in kwilej urund wa Yesu?

• Mutapu ik tukutwisha kwimekesh anch tudi arund a Kristu?

[Chipich chidia pa paj wa 21]

Yesu wadinga ni kusot kwijik yom yadingau arund nend ni kutongin kwovu

[Chipich chidia pa paj wa 23]

Mutapu ik tukutwisha kumekesh anch tusotil twikala arund a Kristu?