Kwifukwil Mu Dijuku Kudi Kwa Usey Mulong Wa Kupand!
TONGIN mutapu ukeza kulet wom “njit [ja] pa dichuku dijim dia Nzamb wa dikand diawonsu.” (Kuburik 16:14) Mu kulond kwamushena kwa uprofet, muprofet Mike wafunda anch: “Mikandu yikez kengurik kwishin kwa yidjatil yend, mudi nsil yikat[au] kwenguril mu kasu. Akez kayichil mu jinkurubuk, mudi mem makata kukurumuk piur pa yinanginang.” (Mike 1:4) Riyind ik rikash rikeza kuyishiken antu akad kumusadil Yehova? Dizu dia Nzamb dilondil anch: “Pa dichuku dinidia mijimbu yifila ya afu ajipay [Yehova, NW] yikez kamekan, kudiokal ku mutambu wa ngand djat ni kumutambu ukwau.”—Yeremiy 25:33.
Pa kutesh yibabesh yiney, mitu ya majuku—yivud yau yidi kwau nvaj umwing ulidina an—akusal nawamp anch ipul chipul chinech piur pa anau akudila kal mu chilik cha kutwish kutongijok anch: ‘Akez kupand ku Armagedon?’ Bibil ulondil patok anch akez kupand anch adi aom ni akash muspiritu mu chilik chiyifanyidina nich reng ra mivu yau.—Mateu 24:21.
Usey wa Kwikal ni Chisu cha Kwifukwil mu Dijuku
Chiudia nvaj, shinshikin anch usadil yom yawonsu yiukutwisha mulong wa kuyilil aney kukwatijan ni “kuyikand ni malejan ma Mwant.” (Efes 6:4) Kiuvuramedinanyap usey wa kwilej Bibil pamwing ni anen. Tusotil anch ansand etu ikala mudi in Kristu adinga ku Filipoi, ajikitishau kudiay Paul mulong wa kusot kwau kumuziyil Yehova. Ndiy wafunda anch: “Chawiy akarukat nam, mudi muwadingany ni kuziyil pinadinga nen, ni katat kand chinidia kulemp kudi en, sadilany dipandish dien nich wom ni kwakam.”—Filipoi 2:12.
Aney akat kusadil yijidik ya Yehova ap anch udiakwap? Asadiling nchik padingau ku shikol? Mutapu ik ukutwisha kuyikwash aney chakwel itiyija yijidik ya Yehova chakwel anch yiyitakela ap anch udiakwap?
Kwifukwil mu dijuku kukutwish kwasal yom yivud mu kukudish ritiy ra mwaney pa mulong winou. Chawiy lel, el twisambinany manans masatu majim chakwel usala anch dilejan diey dia Bibil dikal nich yibudikin yiwamp.
Ilejany Pakad Kujing
Bibil ulejen anch Nzamb wadinga ni kuyitazuk anend angel eza ku mes kwend pa chisu chatonday. (Yob 1:6) Niyey sal chilik chimwing pantaliken nau aney. Tekany dichuku dijikena mulong wa urel wa Kwifukwil mu Dijuku ni salany mwamu wakad kujing. Chikwau, yitekinany chisu chikwau mulong kusu yom yikwau yikutwisha kushikenaku pakad kuyichingejin.
Mu kusut kwa angond, kangal wikalany ni chaku cha kusutish urel wa kwilej. Vurikany anch, anen awiy antu akusambish ufanyidinany kwilej nau Bibil. Pakwez, Satan ukusot kuyikadish diloz diend dia kurish nich. (1 Pita 5:8) Anch walikany kwikal nich urel wa Kwifukwil mu Dijuku mulong kwau wa kutal televizion ap yom yikwau ya mangand, Satan ukukuwinany.—Efes 5:15, 16; 6:12; Filipoi 1:10.
Sadilany Malejan Makusadil Pichiku Pichiku
Urel wa Kwifukwil mu Dijuku ufanyidin kwikal urel wa usey nakash. Salany wikala urel wa malejan. Mutapu ik? Pa yisu yimwing, tondany mitu ya milong mudia jinsangu jikutwisha kwisambin yom yikutwishau kutanijan nich mwaney ku machuku ap mbing jidia kurutu. Chilakej, ukutwishany watenchikany yikunku ya kwiyijidish mu mudimu wa kulejan. Ansand akad kusanger kusal yom yisadilingau nawamp. Kwiyijidish minsamb ni kutongijokin piur pa mutapu tukutwisha kupandakan yikangesh kukutwish kwayikwash ikala nich kashinsh pa chisu chiyilau ni kusal mitapu kushalijan ya mudimu wa kulejan Want.—2 Timote 2:15.
Ukutwishany kand kwikalany nich yikunku ya kwiyijidishany piur pa kuyikwash anen chakwel amana mutapu wa kura nich yipwichik ya arund. Shapitre wa 15 udia mu buku Les jeunes s’interrogent — Réponses pratiques, Volim wa 2, ukutwish wamusadilany mudi mufulandal wa minsamb mu dijuku. Kamutu “Kura Nich Chipwishik cha Chisak” kadia pa paj wa 132 ni wa 133 katwinkishin yiyul ni kayinkishin anen mutapu wa kulond yakul yitonginay anch yawiy yifanyidinay kusadil. Mulong umwing wa mazu madia kwishin kwa paj wa 133 uyikasikeshin ansand anch: “Iyijidishany pamwing ni nvaj ap ni murund waswila kal.” Chisu ni chisu, salany anch usambishany kwiyijidish pa urel wa Kwifukwil mu Dijuku.
Kwifukwil mu dijuku kuyinkishin anvaj mutapu wa kukasikeshin usey wa kwikal nich jintong ja muspiritu. Pa mulong winou, buku Les jeunes s’interrogent, Volim wa 2, ukwet jinsangu jiwamp mu shapitre wend wa 38, ulondil anch: “Que vais-je faire de ma vie ? (Ik Nikusal ni Mwom Wam?)” Piwisambidinany shapitre winou, mukwasha mwaney asangera anch kukungin mwom wend pa kumusadil Yehova chawiy chom chipandakenamu kuwap. Kudish mu muchim wa mwaney impu ya kwikal chibol, kusadil ku Bethel, kuya ku Shikol ya Diyiy dia Mudimu, ap kusal mudimu ukwau wa chisu chawonsu.
Dizu dia kubabesh: Anvaj amwing akweta yitongijok yiwamp akat kukasikeshin nakash pa yom yisotinau anch anau ikala mu chilik cha kudiburil yom yisadilau ayinau. Chakin, chidi chiwamp kuyikasikesh anen chakwel itekina jintong jinej jiwamp mudi kusal mudimu ku Bethel ni mudimu wa umishoner. Pakwez, anch wasalany mwamu, dimukany kangal wayisarumunany anen nich kupandakesh yom uchingejidinany kusal ni mu chilik cha kuyiziyish muchim. (Kolosay 3:21) Vurikany chisu chawonsu anch anen ansand ap ayangadim afanyidin kumukat Yehova ni michim yau ayinau—chidiap ni michim yenen. (Mateu 22:37) Komb, kimbany mitapu ya kuyijikitish anen mulong wa yisadilau, ni ipukany kukasikeshin pa yom yakadiau awiy kusal. Kasikeshin kusanger pa yom yawonsu yasalay kal Yehova. Salany chakwel michim ya anen yisangera kuwap kwa Yehova.
Salany Kwikal Kusangareshina
Chom cha usey cha kasatu chikusala anch urel wa Kwifukwil mu Dijuku wikala uwamp chidi kusal kwikal kusangareshina. Mutapu ik ukutwisha wasal mwamu? Pamwingap ukutwishany pa yisu yimwing wateshany madram ap kutal minsamb ya video umwing wapalangeshinau kal Atuman a Yehova. Ap ukutwish watangany en awonsu chikunku cha Bibil, chid ni chid cha dijuku chikutwish chatang chikunku.
Mu Chinong cha Kalam ni Réveillez-vous ! mudi mitu ya milong yiwamp yitukutwisha kusadil mu minsamb ya mu dijuku. Chilakej, ukutwish wasadilany mutu wa mulong udia pa paj wa 31 mu nimero ni nimero wa Réveillez-vous ! ulondila anch: “Ukwakul Nchik?” Mu manimero makwau ma Chinong cha Kalam cha antu awonsu mudi mutu wa mulong wa kwilej ulondila anch: “Mulong wa Ansand Etu.” Ma plan minam malondulijadin nich mitu yisambidina piur pa ansangarum ni ayangadim yikweta mutu wa mulong ulondila anch: “Ilejany Anen.”
Mitu ya milong yilondila anch: “Ansand Ipwil” yikata kubudik mu Réveillez-vous ! yikutwish yikal ya usey nakash kudiau anvaj akweta ansand ni ayangadim, mudi mudia buku Les jeunes s’interrogent, Volim wa 2. Anch ukat kusadil buku winou, kangal wamatikany mushet ulondila anch: “Utongin Nchik?” kwisudiel kwa shapitre ni shapitre. Mushet winou ukwet malejan makash kupandakanamu kwau kuchirikin kwa malejan. Yipul yidia mu mushet winou ukutwish wayisadilany mudi minsamb mu dijuku.
Pakwez, babalany, kangal wasalany minsamb ya dijuku yikal mudi yikunku ching ya yipul ni yakul. Chilakej, kangal wayishindilany anen chakwel atanga nich dizu piur yom yifundinay pa dipaper dilondila anch: “Yinitongidina Kusal” ap mu yikunku yikwau ya yipul ni yakul yidia mu buku. Mu “Chijikish Kudi Anvaj,” buku winou ulondil pa paj wa 3 anch: “Chakwel anch uyikasikeshany anen afunda mu mabuku mau nich uyakin wawonsu, yisala chakwel afundang yom yau ya ujindj. Kupwa akutwish akulejan patok yom yafundinau.”
Anch wasalany anch majuku men mifukwila pakad kujing, mu mutapu uwamp, usangareshina, Yehova ukukuyukishany nakash. Chisu chinech cha pakampwil mu dijuku chikez kusal anch antu ukatinanya ikala aom ni akash muspiritu.
[Kamushet kadia pa paj wa 31]
Ikalany in Kutongin ya Kusal
J.M., udinga mu États-Unis ulondil anch: “Pitwadinga ni kwilej ni ayangadim etu, am ni nfumwam twadinga ni kurijek yom ya kwilej ku chikumangan cha chikumangen ni kupwa twadinga ni kuyit ayangadim etu afatwala yifatul yilejena malejan minam. Pa yisu yimwing, twadinga ni kuchirikin jinsangu jidia mu Bibil ap kwiyijidish minsamb ya kusadil mu mudimu wa kulejan. Twadinga ni kusal chakwel dilejan diambatana nich mivu yau, ni yom yisangaredinau, yiwamp ni ya kuyiletin mazang.”
Y.T., udinga mu Japon ulondil anch: “Chakwel anch nimukwasha mwan ikundj wa mband nadinga kwilej nend Bibil atesha kurumburik kwa mutapu wadingau ni kusadil muvungur pa yisu yafundau Bibil, twachapa mukand wa Isay ni twajimangesha mashapitre ni maverse mawonsu. Kupwa twanunga mapaper dimwing ni dikwau pa kulep. Nsand winou wapakisha kusal mudi mwasalay Yesu padingay mu sinagog mu Nazaret. Rusangu ridia mu Luka 4:16-21 rilondil anch Yesu ‘wautangurila muvungur wa Isay, chad wabudikin pa ndond’ padia rusangu radingay ni kukimb. (Isay 61:1, 2) Pakwez, pasotay nsand winou anch asala niyend mwamu, chamukasikena kutan Isay shapitre wa 61 pasadilay muvungur winou ulemp wakad mashapitre ni maverse. Washimoka pa kutongin pa ukaliweny wa Yesu wa kusadil mivungur, chawiy nsand winou washikena ku kulond anch: ‘Yesu wadinga ushimokishena nakash!’”
[Chipich chidia pa paj wa 30]
Yikunku ya kwiyijidish yikutwish yayikwash aney kuman mutapu wa kura nich yipwichik ya arund
[Chipich chidia pa paj wa 31]
Salany usu chakwel urel wa Kwifukwil mu Dijuku wikal usangareshina