Tufanyidin Kulimish Wintakel wa Yehova
Ov, uvurikin chom ik piuteshina majin am makur Kora, Datan, ni Abiram? Wintombuj! Pantaliken nich ik? Pantaliken nich wintakel watenchikay Nzamb. Yom yivud ya chibudikin chiyimp cha mwom wau ayifundin mu Kuchind mwimbu wa 16, ni rusangu riner arishinshikidin mu mutu wa mulong “Tuziyilany Nich Kushinshaman ku Wintakel Watenchikay Nzamb” udia mu La Tour de Garde wa Kafumpul-Mashind 1, 2002. Ukuman anch chidi cha ukwash kutang malejan minam ni kuman mu manangu kujimb kwa mulong urumburilau mu band video Respect Jehovah’s Authority. Ukuman kupwitijan kwalanka pakach pa an ashinshamena a Kora ni tatukwau ntombuj, wadinga ni kupwitijan nend Mwant Mujim mwin mangand mawonsu. (Kuch. 26:9-11) Rusang riner rifanyidin kutukasikesh etu awonsu tuwejinaku sens kushinshaman kwetu kudiay Yehova.
Pautadina band video, kimb uman ulejena anch Kora ni akwau antombuj awa ku kupakiu kwa kushinshaman mu yom musamban ya usey: (1) Mutapu ik wakanganau kulimish wintakel watenchikay Nzamb? (2) Mutapu ik wilikidinau akwachik nich chibud, ris, ni mukau? (3) Mutapu ik wimenau kusu pa kuburen kuwanyin kwa antu atonday Yehova? (4) Mwikadil ik wa kwinan wakudishau? (5) Mulong wak walikau kusanger yisend yau ya mudimu? (6) Mutapu ik watekau arund ni majuku kurutu kupandakanamu kushinshaman kud Nzamb?
Shinshik mutapu masadila malejan twilejidina ku dram wa Bibil winou ku kuman kwetu pakampwil wintakel utenchikinay Nzamb ilel unou: (1) Mutapu ik tufanyidina kwitiyij mipak yikwatinau amakurump mu chikumangen, ni mulong wak? (2) Mutapu ik tukutwisha kubwik yovil yiyimp yitukweta? (3) Mutapu ik tufanyidina kuman kuburen kuwanyin kwa antu atondinau mulong wa kutakel? (4) Yom ik tufanyidina kusal anch spiritu wa kwinan wasambish kukul mu michim yetu? (5) Mutapu ik tufanyidina kwiyov mulong wa yisend yimwing yitwinkinau? (6) Nany wakad kufanyin kwikal pa ndond ya kusambish pa kushinshaman kwetu kud Nzamb, ni chisu ik chikutwisha kwikal kupakiu kukash kud etu?
Kupwish kwa kwisambin rusangu riner mu chikumangen, ov, ukutwishap kand kutal band winou? El aweja pa manangu mey mayingish matufanyidina kulimishin chisu chawonsu wintakel wa Yehova!—Kus. 18:25; 37:28.