Tulamany Chitongijok cha Kuswapej!
1 Yesu wijika anch chisu chadingay nich cha kuwanyish mudimu wa Tatukwend pansh chadinga chikemp. (Yoh. 9:4) Chawiy, wasala mudimu wend nich chitongijok cha kuswapej, ni kuyifumb in kwilej end kusal mutapu umwing. (Lu. 4:42-44; 8:1; 10:2-4) Yom ya ukwash wa ku mujimbu yadinga yikwet usey wa kaad kud ndiy. (Mat. 8:20) Mwamu, ndiy watwisha kupwish mudimu wamwinkishau kusal kud Yehova.—Yoh. 17:4.
2 Chisu Chidi Chikemp: Chisu cha kulejan rusangu ruwamp ku “mangand mawonsu” chidi kand chikemp. (Mat. 24:14) Uprofet wa Bibil ulejen anch twashikin kal palemp mu chisu cha kwinsudiel. Piswimp kamu ap, ‘ukufundakesh kudi awiy akad kumwijik Nzamb, ni kudi awiy akad kuziyil ku rusangu ruwamp ra Nsalejetu Yesu . . . akez kayitanyish mar, . . . kuyijiyish chikupu.’ (2 Tes. 1:6-9) Dirumburish dinidia dikez kukashimwish nakash. (Lu. 21:34, 35; 1 Tes. 5:2, 3) Antu aswiridin kuyibabesh ya mwikadil wau wa kusheshik. Chidi chisend chetu cha kuyikwash kukimb kwitiyik kwa Yehova pikuchidia chisu ap.—Sof. 2:2, 3.
3 Tusalany Yawonsu Tukutwisha: Pijau anch “kwashal kal chisu chikemp,” atushalapol a Nzamb akat kutek mudimu wa kulejan pa ndond ya kusambish. (1 Kor. 7:29-31; Mat. 6:33) Amwing alikin kal mapan mavud ma kumen nfalang ap mijikit ya muntu ipend mulong wa kuwejinaku kwipan kwau mu mudimu. (Mar. 10:29, 30) Akwau adandamedin kwikal nich ‘yivud ya kusal mu mudimu wa Mwant’ kwikalap nchik kupakiu kwakad kupwang. (1 Kor. 15:58) Antu avud alejen rusangu ruwamp mu makum ma mivu pakad kuziy. (Heb. 10:23) Yehova ukat kubaz nakash kwipan kwinoku kwawonsu mu kukwash yisakin ya Want.—Heb. 6:10.
4 Kukungin mwom wetu pa difukwil dia Yehova, dikweta mudimu wa kulejan, kutukwashin kuvurik dichuku dia Yehova. Kukat kutuchidij ku kwikal azuwodilau nich mangand ma Satan ni kukasikesh mupak wetu wa kulam chaku chitumbina. (2 Pi. 3:11-14) Chakin kamu, kusal mudimu wetu nich chitongijok cha kuswapej kukutwish kutupandish, ayinetu ni kuyipandish antu akututesha.—1 Tim. 4:16.