Ov Ukutwish Kupan Ukwash?
1 Chisu chawonsu Yehova ukat kukimb mitapu ya kuyikwash atushalapol end ashinshamena. ( 2 Jins. 16:9; Is. 41:10, 13) Mu kumufanikesh mud kafung, Isay wafunda anch: ‘Nich chikas chend ukez kukumangej pamwing an a amikoku; ni ukez kuyisend mwin nkond yend. Ndiy ukez kuyendish pakemp pakemp akata kwamwish.’ (Is. 40:11) Tushinshikinany mitapu yimwing mu tukutwisha kwimburijin kusanger kwa rukat ra Yehova.
2 Kuyikwash Antu Asu: Tukutwish kuyikwash antu asu kusutil ku kuyitazuk kusanger niyetwetu pamwing urund ukasikeshina. (Jinsw. 13:20) Nich kuvurik mutapu wa mukasikeshau kud akwau pasambishay kwibomb ku chikumangen, mukadivar walonda anch: “Yisu yivud, dijuku dimwing diangandjika mu dilejan diau dia dijuku. Chisu nasambisha kuya kurutu, ambay a uruw ayibol ansand anladikijanga kwibomb nau mu mudimu dichuku diakabuj. Chisu chawonsu twadinga nich mambamb mawamp ma muspiritu.” Wawejinaku kand anch: “Kurutu kwa kwikal mwin Kristu, nadinga ni kuyang mu kwipuwangej Diakatan ni Diampos uchuku. Pakwez chisu nasutishang pamwing nau akadivar chawanyisha maswir mam ma urund.” Kusanger kwa rukat ra chikumangen kwamukwasha mukadivar winou kwikal wiminya dang ni kukasikan mu ritiy, ni pinap ukat kusal mud chid cha dijuku dia Betel.—Kol. 2:6, 7.
3 Kukasikeshijan Muntu ni Mukwau: Tukutwish kujingunin mutapu wa kuyikwash akadivar netu chisu chirishinau nich mikadil yikash. Ov ukutwish kwirijek chakwel kupan uman wa ku telefon ni mukadivar udia chilim ap kumuladikij chakwel kukutwalaku ku dilejan dia Bibil, pamwing ap kuya nend mwin kwilej ku chikumbu chend? Ov nvaj ukweta an akemp ukutwish kuswiriken ukwash payilau mu mudimu? Ov kudi akadivar akad kuzangurok akutwisha kusanger ukwash wey pa chisu chisadilau kuchirikin kusu ap pa chisu chipaninau mu mulad kanang wa mudimu? Kuyisanger akadivar netu nich rukat kukutubachik kukimb mitapu ya kuyikasikesh.—Rom 14:19.
4 Chitwimburijina ranaken ra Yehova piur pa atushalapol end, tukat kukasikeshijan muntu ni mukwau, kukwash chikumangen chakwel kwikungin mu rukat, ni kumutumbish Tatukwetu wa mwiur.—Ef. 4:16.