Mutapu ik tukutwisha kujikish mu ritiy?
1 Kudiosh kutwasambishina kwikal ku mutambu wa dirijek dia Yehova, kuya kwetu kurutu muspiritu kwatuletidin musangar ujim! Pakwez, chitufanyidin kudandamen kuya kurutu muspiritu mulong wa kushal ‘andjikina mij, atunginau, ni ikasikeshina mu ritiy.’ (Kol. 2: 6, 7) Avud pakach petu ayil kurutu muspiritu, pakwez amwing apumbukin kal mulong alikin ‘kwiman dang mu ritiy.’ (1 Kor. 16:13) Ov mutapu ik tukutwisha kwipuk chak chinech?
2 Mijikit ya muspiritu ya chisu ni chisu: Twitekinany program umwing muwamp wa mijikit ya muspiritu mu dirijek dia Yehova, mulong dirijek dined dikat kudimukin nakash nswir jetu muspiritu. Yikasikesh yitukata kutambul pa chisu cha yikumangan ni yikunguril yikat kukwash kukul kwetu ni kujijaman kwetu muspiritu. Ching anch kamu tukat kukumangan chisu ni chisu chakwel kumenaku ukwash. (Heb. 10:24, 25) Anch tukat kwitekinaku pakad kujing chisu cha kutang Baibel, Tour de Garde ni Réveillez-vous! ni mikand yisambidin “yakudia yikash” yidiokila mu Dizu dia Nzamb, ‘mij’ yetu ya muspiritu yikwandam nawamp ni kujikish. (Heb. 5:14) Twitekinany rutong ra muspiritu ra kushiken ni kwikasikesh kurishiken; kuwap kukwikal kwa chikupu. —Filp. 3:16.
3 Ukwash wa ambay akudila kal: Tujimbishany urund wetu ni antu akudila kal muspiritu adia mu chikumangen. Twijikijanany nawamp nau amakurump, mulong adi antu ija nawamp mutapu wa kutukasikesh. (1 Tes. 2:11, 12) Twikalany ni chaku cha kutambul chiyul chawonsu ap ukwash ukutwishau kutwinkish. (Efe. 4: 11-16) Ankwash’a midimu asotin ni yawiy anch ambayau ikala akash, imena dang mu ritiy; kangal walimish muchim kukimb yikasikesh yau.
4 Ov ukwet kuswir kwa ukwash mu chingand? Isamba nau amakurump ni kuyit ukwash. Chitwishikin anch utambula ukwash wa program “Ayibol Ayikwashin Akwau.” Ov akubabatishin katat? Kwilej buku Notre ministère ni kusadin yiyul yidiamu kukukwash kuya kwey kurutu mu kukul muspiritu. Ov udi nvaj ? Dandamen kukasikesh chisu ni chisu mwom wa muspiritu wa aney.—Ef. 6:4.
5 Anch twandjik mij ni kujikish mu ritiy, tukwikal ni urund wa piswimp ni Yehova ni tukusanger wimbay wa rukat nau akadivar ni anambaz netu. Wawiy mutapu tukutwisha kurish nich yoziu ya Satan ni kukasikesh ruchingej retu mu machuku ma kurutu mamwing ma chikupu. —1 Pita 5:9, 10.