Ukwash Uswapela Kutan

1. Mutapu ik ukutwishay muntu kuziy muspiritu?

¹ Anna, nambaz ukweta ikundj wakad kwitiyij ni ukweta mudimu umusendina chisu chivud nakash, wamana anch chimukasikedin nakash kukumangan ku yikumangan ya Ukristu pakad kujing, kwipan mu mudimu wa kulejan, ni kwilej Dizu dia Nzamb. Ap anch wading uchimukatil Yehova, ndiy wikala wakad kusal mudimu wa kulejan. Cha musangar, amakurump in ranaken amukwasha muspiritu.

2. Mutapu ik ukutwishau in Kristu awonsu kumekan kwikal ukwash uswapela kutan?

² Kwitiy ukwash wa muspiritu upaninau ku chikumangen cha Ukristu kumekeshin kutek ruchingej mudiay Yehova amwinend. Mu kwimburij rukat ra kubangin ra Yesu Kristu, amakurump mu chikumangen akimbining mitapu ya kupan dikasikesh ni ukwash kud antu amena yikokujol mu mijikit ya muspiritu. (1 Tes. 5:14) Yisu yivud, mutapu wa dizu dia dikasikesh dimedina pa Mufund ukasikeshina dikutwish kwikal diswiridikina kamu. Kukimb kuyikwash antu adia mu mwikadil uyimp wa mar kuyitadil in Kristu awonsu, kangal kusu kwau amakurump. Chakin umwing ni umwing wetu wamen kal usu wa mutapu wa ‘dizu dikat kulondau pa chisu chifanyidina.’​—⁠Jins. 25:11; Isa. 35:​3, 4.

3, 4. Chom ik chifanyidina mu kuyikasikesh akwetu, ni mutapu ik tukutwisha kusal mwamu?

³ Sambel: Kumekesh kusanger kwa rukat mudiau antu aswiridina ukwash kwitin anch etu tusambel, kumekesh rongoj, ni kwikal in kashinsh. Chisu chijikay Jonatan mwikadil wa mar wa David, ndiy ‘watumbuka ni waya kudiay David ku Horesh, mulong wa kukasikesh chikas chend.’ (1 Sam. 23:​15, 16) Sadil kwitudish mulong wa kuyikwash antu akwau. Mazu mabachikinau nich kubangin kwa kashinsh makat kulet yibudikin yiwamp nakash. Chikwau kand, Yesu wamekesha patok mushiku winou, usu udandamedina witina kumwisak mukadivar wa muspiritu ap nambaz. (Luka 15:⁠4) Kwikal nich maswir ma kashinsh ma kumukwash muntu mukwau kukutubachik kudandamen kupan ukwash ap anch kuya kurutu kumekenap swa.

⁴ Chikasikeshin mud ik chisu tusambedila kuyiladikij akwetu, mud antu adia mu dilejan dietu dia buku, kututwal mu mudimu! Chisu tumukwashina mbay netu kashalapol wa Yehova kuya mu mudimu, tukutwish kusadil mutapu wa kumukasikesh muntu winou. Yisu ya musangar mud yiney tusadila pamwing mu mudimu wa Yehova yidi yikasikeshina pakampwil kud awiy achirikidina kwisikan kwau kwa muspiritu.

5. Mu mikadil yimwing, amakurump akutwish kupan ukwash ik?

⁵ Chitenchik cha Rukat: Antu akad kwipan mu mudimu wa kulejan ap kwinung ku chikumangen mu yisu yimwing akutwish kwikal nich kuswir kwa ukwash ukwau mulong wa kukasikesh ritiy rau. Dilejan dia Bibil dia muntu ipend mu buku mud Mwifukwila Nzamb Umwing Kusu Wakin, Approchez-vous de Jéhovah ap Chom ik Chakin Kamu Chifundishinay Bibil? dikutwish kamu kwikal diswiridinau. Mulong muntu amubatishin kal, chisu chivud dilejan diswiridinap kudandamen chisu chilemp. Komite wa Mudimu wa Chikumangen ufanyidin kubabal chakwel kushinshik nany ukutwisha kutaninamu ku chitenchik chinech.​—⁠Tal Mudimu Wetu wa Want wa Kalang 1998 ni Kalang 2000 Yakul ku Yipul Yen.

6. Mutapu ik wachirikinay nambaz umwing usu wa muspiritu?

⁶ Anna, wajimbulangau kwinsambishil, witiya ni kujikitish pamwinkishau kud amakurump nambaz ukudila kwilej nend Bibil. Dilejan dita kwau kwilej yikunku yinying chakwel kumukwash kand kusej piswimp ni Yehova. Wasambisha kand kukumangan ku yikumangan ya chikumangen ni wikala kand nich maswir ma kumushiman Yehova Nzamb patok. Nambaz ukudila wamukwasha kand mu mudimu kusutil ku kumusend kuya nend ku malejan makwau ma Bibil kushik ni pakasikanay kamu ni kulejan ku chis ni chis. Ukwash wa kudimuk wawiy kamu wadingay nich kuswir chakwel kuchirikin kand mijikit yend ya muspiritu.

7. Yiyukish ik yikata kudiokal ku kuyikasikesh akwetu muspiritu?

⁷ Kuyikasikesh antu adia mu maswir kuletin yiyukish kud awonsu. Muntu ukasikeshinau ukat kusangar kusej piswimp ni Yehova ni kwikal wipanina ku mijikit ya dirijek Diend. Amakurump asanger kuman kuya kurutu mud kwinoku kwa muspiritu. (Luka 15:⁠6) Chikumangen chinungin mu umwing pamekeshinau awonsu rukat ra kashinsh umwing ni mukwau. (Kol. 3:​12-14) Mayingishin mawamp mud ik tukweta ma kumwimburij Yehova, ukwash uswapela kutan!​—⁠Ef. 5:⁠1.