Tutakelany Malejan ma Bibil Mayila Kurutu Chikunku 3: Kusadil Mifund Nawamp
1. Mulong wak tufanyidin kukasikeshin Mifund chisu tutakedila malejan ma Bibil?
1 Rutong retu mu kutakel malejan ma Bibil ridi ra ‘kwikadish in kwilej’ kusutil ku kuyikwash antu kwov kurumburik ni kwitiy malejan ma Dizu dia Nzamb ni kumasadil mu mwom wau. (Mat. 28:19, 20; 1 Tes. 2:13) Pa chinech, dilejan difanyidin kwimen pa Mifund. Kwinsambishil, chikutwish kwikal cha ukwash kuyilej in kwilej mutapu wa kuman mikand kanang mu kopi wau wa Bibil. Mutapu ik, lel, tukutwisha kusadil Mifund chakwel kuyikwash antu mud inay aya kurutu muspiritu?
2. Mutapu ik tukutwisha kukwat mupak mu kutond mikand ya Bibil tukutanga ni kwisambin?
2 Tond Mikand ya Kutang: Mu kwirijek kwey, jingunin mutapu ik ukwatijadina mufund ni mufund wa Bibil ujimbwilau mu dilejan nich dinans disambidinau, ni tond mifund ukutanga ni kwisambin chisu cha kwilej. Nakash, chidi chiwamp kutang mifund yilejena yitiyij yetu ya dishin ya Bibil. Mifund yilejena rusangu ra mikadil yiswiridikinap kwau pamwing kuyitang. Shinshikin maswir ni mikadil ya mwin kwilej umwing ni umwing.
3. Kusadil kwa yipul kukwet ukwash ik, ni mutapu ik tukutwisha kusal mwamu?
3 Sadil Yipul: Pa ndond pa kumurumburil mwin kwilej mikand ya Bibil, mwela ndiy akurumburilay. Ukutwish kumulej kusal mwamu kusutil ku kusadil yipul ya manangu. Anch kusadil kwa mufund wa Bibil kwoviken, ukutwish kwey kumwipul mutapu ukasikeshidina mufund yom yilondilau mu paragraf. Mu yisu yikwau, chipul cha pakampwil ap yipul yilondulijadina yikutwish kwikal yiswiridikina chakwel kumushikij mwin kwilej ku dipwishil diwamp. Anch yirumburil yikwau yiswiridikin, yikutwish kwikalaku kupwa kwa kwakul kwa mwin kwilej.
4. Kurumburil kwa mifund tutangina kukwet usey ik?
4 Yipipesha: Chibind muwamp wa ut wa nseu uswiridining nseu yimwing kusu chakwel kushiken rutong rend. Chawiy chimwing, mulej muwamp kaswiridinap kwend mazu mavud mulong wa kukasikeshin dinans kanang. Ukutwish kusamburish rusangu mutapu upipela, wovikena, ni udia salal. Yisu yimwing, ukutwish kuswiriken kukimbijol mu mikand ya win Kristu chakwel kwov kurumburik kwa mufund kanang ni kuurumburil kamu nawamp. (1 Tim. 2:15) Pakwez ipuk kusot kurumburil yom yawonsu ya mufund ni mufund wa Bibil pa dilejan. Rumburil kusu yom yiswiridikina mulong wa dinans dia kushinshikin.
5, 6. Mutapu ik tukutwisha kuyikwash in kwilej kusadil Dizu dia Nzamb mu mwom wau, chad chom ik tufanyidin kwipuk?
5 Kuyisadil Nawamp: Pachifanyidina, mukwasha mwin kwilej chakwel kuman mutapu mifund ya Bibil yimutadila pakampwil. Chilikej, chisu wisambidinany Hebereu 10:24, 25 nend mwin kwilej wakad kal kukumanganangap ku yikumangan ya Ukristu, ukutwish kwisambin chimwing cha chikumangan ni kumuladikij chakwel kwez kukumangan. Pakwez ipuk kumushindil. Lik dizu dia Nzamb dimubachik kusal chisal chiswiridikina chakwel kumusangarish Yehova.—Heb. 4:12.
6 Pituwanyishina mudimu wa kwikadish in kwilej, lik tumekeshany “kuziyil ku ritiy” kusutil ku kusadil kwetu kuwamp kwa Mifund.—Rom 16:26.