Ukwash Wey Udi Uswiridikina
1 “Twakujikitishany mulong wa yawonsu utusadidilanya. Chakin kamu mudimu wen utukwashin.” Kulond kwinoku kuwamp kumekeshin kujikitish mulong wa amakurump etu ni ankwash a mudimu. Mutapu didandamedina dirijek dia Nzamb kuya ni kujimb, kudi kuswir kwa amakundj akudila mulong wa kusadil mu yikumangen piswimp 100 000 pa mangand mawonsu. Anch udi mukadivar wabatishau kal, ukwash wey udi uswiridikina.
2 ‘Kusot’: Ov mutapu ik ukutwisha kusot yisend yikwau ya mudimu? (1 Tim. 3:1) Chakusambish, kusutil ku kwikal chilikej chiwamp mu mikadil yawonsu ya mwom wey. (1 Tim. 4:12; Tit. 2:6-8; 1 Pi. 5:3) Ipana nakash mu mudimu wa kulejan, ni yikwasha akwen kusal mwamu. (2 Tim. 4:5) Kubangin kwa kashinsh mu kuwap kwa akadivar mu ritiy. (Rom 12:13) Ikal mwin kwilej Dizu dia Nzamb wa mushiku, ni kudish ‘ukaliweny wa kufundish.’ (Tit. 1:9; 1 Tim. 4: 13) Wanyish nich mushiku yisend yikwinkishinau kud amakurump. (1 Tim. 3:10) Anch udi mutu wa dijuku, ‘takel chikumbu chey mu mutapu uwamp.’—1 Tim. 3:4, 5, 12.
3 Kwikal utondilau chakwel kusadil mudi nkwash a mudimu ap mukurump kwitin mudimu ukash ni spiritu wa kwipan. (1 Tim. 5:17) Chawiy lel, mu kusot ukurump, asin pa kuyisadil akwen mu kwikepish. (Mat. 20:25-28; Yoh. 13:3-5, 12-17) Tongin pa muchim wa kwipan wa Timote, ni pakish kumwimburij. (Filp. 2:20-22) Mud ndiy, el chaku chey chiwamp chikusal kwikal utondilau. (Mid. 16:1, 2) Anch wakudish mikadil ya muspiritu yiswiridikina chakwel kusend yisend yikwau ni kusadil chiyul chin chawonsu chikutwishau kukwinkish akwen mulong wa kukukwash, “[kukul] kwey kukumekan kudi antu awonsu.”—1 Tim. 4:15.
4 Anvaj, Yifumbany an Akemp Kupan Ukwash: An akutwish kusambish kwilej kupan ukwash kudiosh kamu ku wanikanch nakash. Yifumbany kuta matu nakash ku yikumangan, kulejan, ni kwikal chilikej chiwamp mu chaku ku Chot cha Want ni ku shikol. Yifundishany kwipan ni kusanger mu kuyisadil akwau, kusal yom mud kukwash kukomb mu Chot cha Want, kuyikwash amapal, ni yikwau. Yikwashany chakwel amana musangar udiokila ku kupan. (Mid. 20:35) Kufumb mud kwinoku kukutwish kuyikwash kwikal ayibol, ankwash a mudimu ni amakurump a machuku ma kurutu.