Mutapu ik—Tukutwisha Kupan Uman kud Anamakwetu?
1. Mulong wak kujingunin kuswiridikin chisu tupanina uman kud anamakwetu?
1 Ukutwish kwikal musangar ujim mud ik wa kwandam mwi ngand yisu nau akatish netu, mu kubombakan nau pamwing mu difukwil dia Yehova! Ruchingej riner ra musangar rikutwish kwikal ra kashinsh, kusutil ku uman wetu tupanina kud anamakwetu. Pakwez, kusal mwamu mu mutapu wa kukasikesh, kwitin kujingunin. Kalam wa munyimuku wamana anch: “Yibudikin yiwamp akat kuyiwanyish kud antu akata kulangwish maswir ma kwijik ma anamakwau kusutil kupan uman mu chilik kanang.” Ov mutapu ik tukutwisha kuchisal?
2. Mutapu ik kuyisanger kwakin anamakwetu kukutwisha kutukwash kulangwish maswir mau ma kwijik?
2 Kulangwish Maswir mau ma Kwijik: Shinshikin chakusambish ku mutapu ukutwisha kusosil kusanger kwa anamakwey. (Jinsw. 15:28) Ov yom ik yidia yakamish yau? Ov milong ik yirishinau nich? Pamwing ukutwish kuyilej mutu wa mulong kanang ap kujimbul mufund usangareshina mu mutu wa mulong uyikwatina pakampwil. Anch anamakwey kashichap piswimp, pamwing ukutwish kusal chinech kusutil ku mukand ap ku telefon. Pakad kuyishindil, kun mbut ja uyakin, ni tal kudiay Yehova chakwel asongisha mbut.—1 Kor. 3:6.
3. Mutapu ik kusanger kukwetau anamakwetu mu etu kukutwish kutwazuril njil ya kupan uman?
3 Yesu wamuleja muntu wopatay ayilembil avud anch: “Yang ku chikumbu chey kudi arund ney [anamakwey MM], ukayileja yom yijim yakusadilangay ey kudi Mwant [Yehova NW], ni mudi mwakwovilangay riy.” (Mar. 5:19) Tongijok bil mwafanyinau kwiyov anamakwend a muntu winou! Ap anch ukutwishap kuman chom chin chawonsu mudi disengan, chawiy chimwing anamakwey akat kusanger mijikit yey ap mijikit ya an ey. Kujimbul diskur diwasadila ku Shikol ya Mudimu wa Uteokras, chikumangan wakumangena, ku Betel wayila ni kutal, ap chinship cha pakampwil kukutwish kukwazuril njil ya kuyilej chom chikwau piur pa Yehova ni dirijek diend.
4. Mipit ik tufanyidina kwipuk chisu tupanina uman kud anamakwetu?
4 Twikal in Kujingunin: Chisu tupanina uman kud anamakwetu, twipuk kuyilej yom yivud kapamp kamwing. Mu kuvurik chisu chasambishay kwilej Bibil, mukadivar umwing witiyija anch: “Nading ni kumulej makwam mu kumukidikesh nich yirumburil piur pa yom yivud yinilejanga mu Bibil, ni chinech chisu ni chisu chashikijanga kwi ntad, nakash nend tatukwam.” Ap anch chisu chimekeshinay mwanamakwetu kusanger mu uruu wa Bibil, twakul mu mutapu wa kukasikesh kusanger kwa muntu usotila kwijik yivud. (Jinsw. 25:7) Yisu yawonsu tumekeshany kalimish, ranaken, ni kushimpish, mud mutukata kumekesh chisu tulondila nau angendj mu mudimu wa kulejan.—Kol. 4:6.
5. Yom ik tufanyidina kusal anch anamakwetu kakwilap nawamp chisu tuyilejina uman?
5 Pa chisu chimwing, anamakwend a Yesu atonga anch warumbangang kal. (Mar. 3:21) Pakwez, kwinyim, amwing ikala in kwitiy. (Mid. 1:14) Anch usu wa kusambish usadila mulong wa kuyilej anamakwey uyakin kautambwilap nawamp, kangal walikap. Mikadil ni yitongijok yikutwish kuswimp. Dandamen kukimb chisu chikwau cha kulond dinans dikutwisha kulangwish maswir mau ma kwijik. Ukutwish kwikal nich musangar wa kuyikwash kutan njil yitwadila ku mwom wa chikupu.—Mat. 7:13, 14.