Sal Yiwamp ni Angan nau Akwen
1 Dorkas “wading wizwil sens nich midimu yiwamp ni riy.” (Midimu 9:36, 39) Spiritu wend wa kupan wamusala ndiy kwikal ukatinau kud antu amwijika ndiy ni kud Yehova Nzamb. Hebereu 13:16 ulondil anch: “Kangal wavuramenany kusal nawamp ni kukwashijan; mulong yakupesh yiniya yawiy yikat kumusangarish Nzamb.” Ov, mutapu ik tukutwisha kusal yiwamp ni kwangan nau akwetu nlel unou?
2 Mutapu umwing tukutwisha kuyikwash akwetu udi kusutil ku kwangan ‘yom yetu ya usey.’ (Jinsw. 3:9) Milambu yetu ya nfalang ku mudimu wa mangand mawonsu yitwishishin kutung Yot ya Want, Yot ya Yikumangan, ni mabiro ma mitiy mu mangand. Kupan kwetu kwakwashin tutikit twa antu kutaninamu ku mafundish ma uteokras ni urund wa muspiritu ukasikeshina.
3 Pan Rongoj ni Ukwash: Chisu chishikedina mar, antu a Yehova adi irijekina “kusal nawamp” kud ambay nau akaritiy pamwing kand ni kud antu akad kwikal mu ritiy retu. (Gal. 6:10) Kupwa kwa kutem kwa chapu cha shimi mu France, ambay a uruw amwing ashichinga piswimp ni chapu alonda anch: “Akadivar netu in Kristu eza pakad kulab mulong wa kutukwash kukomb kapalikany ketu kumwing ni tupalikany twa akwetu mu chikumbu. Amutej netu ashimwoka nakash kuman anch antu avud mwamu eza mulong wa kutukwash.” Nambaz mukwau wawejaku anch: “Amakurump eza ni kutukwash. Eza mulong wa kutukasikesh. Chakin, yiney yawiy twading tuswiridina, kupandikanamu ukwash wa ku mujimbu.”
4 Ap anch kudi mitapu yivud tukutwisha kusal yiwamp kud amutej netu, mutapu wa usey nakash tukutwisha kuyikwash udi kuyinkish ronganyin ra uyakin ripandikena kuwap, rikweta “ruchingej ra mwom wa chikupu” washilayamu Yehova amwinend. (Titus 1:1, 2) Uruu wa Bibil uletin rongoj rakin kud antu adidila mulong wa mikadil ya mangand ni mwikadil wau ayinau wa chitil. (Mat. 5:4) Tusalany lel amboku yiwamp ni kwangan nau akwetu chisu chikweta chikas chetu usu wa kusal mwamu.—Jinsw. 3:27.