Antu a Mitapu Yawonsu Akez Kupand
1. Ov, kwijikan kwetu ni Nzamb kwimedin pa yik?
1 Ranaken rudimukina ra Nzamb razurila njil ya dipandish. Rusot ra Yehova ridi ra “kuyipandish antu awonsu ni kwez kwijik uyakin.” (1 Tim. 2:3, 4) Kwijikan kwetu ni Nzamb kwimedinap kusu, pa ulombu wetu wa chikit, ndond yetu tudia, ukaliweny wetu, ap kumekan kwetu kwa chifu, pakwez pa kutek ritiy retu mu difut dia yakupesh ya Yesu. (Yohan 3:16, 36) Mud ambay a mudimu a Nzamb, tufanyidin kulik ayinetu kasolikany kawonsu, kakutwisha kubachik michim yetu kulik antu asotilay kwitiyij Yehova.
2, 3. Yik yikutwisha kutukwash kulik kuyirumburish antu kusutil ku mutapu wa kumekan kwau kwa chifu?
2 Twipukany Kurumburish: Yehova ukat kutal mutapu udingau antu mukach, pakad uyimp ap kasolikany. (1 Sam. 16:7) Ndiy ukat kuyiman kand awiy mulong wa yom yikutwishau kusal. Mwamu, ndiy umen antu asotila kumusangarish ndiy mud asangarishina. (Hag. 2:7) Ov, tuyimen akwetu mud muyimenay Nzamb?
3 Antu amwing tusankena mu mudimu akutwish kutunenganesh kusutil ku mutapu wau umekenau (chifu chau). Akutwish kudjal kwa kwisak ap kwakad kufanyin, kwikal ni wedj uvundangena, ap kudjal tuziy ku muzur ap ku milamu. Amwing akutwish kwikal akad chikumbu. Akwau akutwish kutusadil kwa chisum. Pa ndond pa kuyiman antu inay mud kakutwishap ap pakemp kwikal in kwifukwil a Yehova, tufanyidin kwikal nich chitongijok chiwamp, “Mulong etu ayinetu pasak twading ayisup, in kubwambul, [ni] atudimbola.” (Titus 3:3) Mu kwijik chom chinech, tukwikal abachikinau kulejan kud antu awonsu, ap kud antu, akutwisha kumeken ku chifu, anch kafanyidinap.
4, 5. Yom ik twilejina kusutil ku chilakej cha Yesu ni cha Paul?
4 Yilakej ya mu Mivu Chitot ya Kusambish: Yesu wateka chisu cha kuyikwash antu amenau kud akwau mud kakutwishap kwikal in kwifukwil a Yehova. (Luka 8:26-39) Ap chilikishidinay yisal yiyimp, wijika anch antu akutwish kuwil mwi njil yiyimp ya mwom. (Luka 7:37, 38, 44-48) Mwamu, wamekesha chovu, ndiy “wayovila riy, mulong ading mudi amikoku akad kafung.” (Marko 6:34) Ov, tukutwish kulondul sens chilakej chend?
5 Mupostol Paul amwasa mayal, amubula, ni amukasa. (Midimu 14:19; 16:22, 23) Ov, yom mud yiney yamanay yamwikadisha ndiy mwin rukuny ni kulond anch wading ni kusutish kwend chisu chend pakach pa michid yimwing ni yisak ya tubil? Chakapuk chaya mwa. Ndiy wijika anch antu akweta michim yiwamp akutwish kuyitan pakach pa yisak yawonsu ya tubil, ni ndiy wakwata mupak wa kuyitan. Ov, mwamu tukata kuman antu adia mu teritwar wetu adiokila ku mikadil ni yaku kushalijan?
6. Ov, mwikadil wetu ukutwish kwikal ni usu ik padi antu asu ku yikumangan ya chikumangen?
6 Kwak Antu Akwau Nlel: Antu avud pa antu a Nzamb asanger anch ayaka nawamp mu chikumangen kud akadivar ni anambaz alika kwikal abachikinau nich kumekan kwa chifu cha muntu. Ikundj wadinga ni wedj uvundangena ni nswich jilemp jishikina pa makij, udjita masun mikisina, washika ku Chot cha Want mu Allemagne. Wading wijikena kwikal ni chaku chiyimp. Ap mwamu, amwaka ni chirungul ku chikumangan. Washimoka ni rubing rambakedinap wachirika kand. Mu chisu chikemp, ndiy wapwembujola mujimb wend, walika kuna ruwand, ni wamufundisha mbay a uruw wend ku buku. Kulal kulank, awiy ni ampamb au amband adinga ni kumusadil Yehova mud dijuku dinungina.
7. Ov, mutapu ik tukutwisha kumwimburij Nzamb wetu wakad kasolikany?
7 Mu kumwimburij Nzamb wetu wakad kasolikany, tupalangeshany amboku diladikij dia kutambul ukwash wa ranaken rudimukina ra Nzamb kud antu in awonsu.
[Caption on page 3]
[Picture on page 3]
“Nzamb kakwetip kasolikany ka muntu; pakwez ukat kwitiyij kwend kudi wa muchid wawonsu ukata kumwov ndiy wom ni kusal midimu ya kutentam.”—Midimu 10:34, 35.