Ov Tukakutalang Kusu ku Chifu?
1 Pitukata kusal mudimu wetu wa kulejan, chitongijok cha kusambish tukwetinga piur pa antu amwing chiding cha kwipuk kwisambin nau rusangu ruwamp. Chilikej, ov mutapu ik tukusala anch ikundj umwing uswejina ukat kututal nich dis dimwing diyimp pituyila ni kutal muntu ushichay nend usangerina uyakin? Nambaz umwing chibol wamana chinech wakwata chiyul cha kwisamb n’ikundj mud winou. Wamwakula nayimp ku moy wend. Pakwez, cha kushimok, watesha uruu wa Baibel ni witiya nich musangar kwilej. Nambaz katalap kusu ku chifu, ni chinech chamutwishisha ikundj winou ni mukajend kusambish kwilej uyakin.
2 Nambaz mukwau wading ni kwov wom wa chifu cha nsand umwing wadinga ni nswich jilemp, pakwez wajijamana kumwinkish uman ukemp kusu chisu chawonsu chadingay ni kwez ku makashing kwadingay ni kusal mudimu. Usu wasalay wasonga mabuj, mulong nsand winou udi katat Kaman mwin kubabatishiu. Ov chom ik chikutukwasha kwipuk kuswakal kulond anch kanang ap kampand kakwitiyap bwat?
3 Tulondulany Chilikej cha Yesu: Yesu wading wij anch ukupan mwom wend mulong wa muntu mwin mwawonsu. Chawiy lel, kadingap ni kubang chifu cha muntunend. Wading wij anch ap antu adinga ni yaku yiyimp akutwish kwikal tayad kukarumuk anch ayinkish ukwash ufanyidina ni kuyikasikesh. (Mat. 9:9-13 ) Wasala usu wa kuyikwash ampich ni atuzweny. (Mat. 11:5; Marko 10:17-22) Kangal twayirumburishany antu tukata kusankan mu mudimu wa chingand mulong kusu wa chifu chau, mulong chinech chikutwish kutukangesh kujingunin ngikadil muwamp wa muchim. (Mat. 7:1; Yohan 7:24) Ov chom ik chikutwisha kutukwash kulondul chilikej chipandikena kuwap cha Yesu?
4 Kusutin dilejan dietu dia Baibel, twij anch Dizu dia Nzamb dikwet usu wa kukarumun mutapu wa kutong wa muntu, ngikadil wend, ni untu wend. (Efe. 4:22-24; Heb. 4:12) Chawiy lel, tufanyidin kwikal ni yitongijok yiwamp ni kutek yawonsu mu makas ma Yehova, Ndiy ukata kutang mu michim ya antu. —1 Sam. 16:7, NW; Midimu 10:34, 35.
5 Tulikany kulejan kwetu rusangu ruwamp kud antu a mitapu yawonsu, chikalap nchik chifu chau, kuwejina ku mudimu ujim wa kwangul mu machuku minam ma kwisudiel. —1 Tim. 2:3, 4.