Twimburijany Kutentam kwa Yehova
1 ‘Yehova ukatil kutentam.’ (Kus. 37:38) Chawiy lel, ap anch ndiy wakwatin kal mupak wa kushesh mangand minam maburedina kutentam, ndiy watenchikin kal kand chakwel anch apana bil kubabesh. (Mar. 13:10) Chinech chiyinkishin antu chisu cha kukarumuk kudiokal ku yitil yau ni kupand. (2 Pi. 3:9) Ov tusadin usu wa kwimburij kutentam kwa Yehova? Ov mar ma chisak cha ukamuntu matubachikin kuyishimunin antu akwau ruchingej ra Want? (Jinsw. 3:27) Kukat kutentam kukez kutukasikesh kwipan nakash mu mudimu wa kulejan.
2 Tulejanany Pakad Kasolikany: Anch tukat kulejan rutong ra Nzamb kud muntu win mwawonsu pakad kasolikany, ‘tukat kusal yom yitentamina.’ (Mike 6:8) Tufanyidin kurish nich chibachikin chetu cha untu chakad kuwanyin cha kusot kuyirumburish antu akwau mulong wa mutapu umekenau ku mes. (Jak. 2:1-4, 9) Yehova “usotil kuyipandish antu awonsu ni kwez kwijik uyakin.” (1 Tim. 2:4) Dizu dia Nzamb dia uyakin dikutwish kukarumun mwom wa antu mu mutapu umwing ujim. (Heb. 4:12) Kwijik chom chinech kukutwish kutubachik kwisamb ni antu nich ruchingej, ap antu alika kutesh pasak.
3 Nambaz umwing usadining mu makashiny wova wom wa mwin kuland umwing wadinga ni kwez chisu ni chisu, pa kumuman kusu. Chikalap nchik mwamu, pikwamekana mutapu wa kwisamb nend, wapakisha kumushimunin ya Paradis ukaninay Nzamb. Ikundj wamwakula kapamp kamwing anch kakwitiyangap jinsangu ja makasu, anch wadinga mbwambol ni wadinga kabwebu wa mon wa kulewish. Pakwez nambaz kaziyap. Dichuku dimwing ikundj winou wamwipula nambaz yadingay ni kutong piur pa nswich jend jilemp, chawiy lel nambaz wamurumburila nich kalimish yilondinay Bibil piur pa mulong winou. (1 Kor. 11:14) Dichadia, nambaz washimoka nich musangar, kumuman winangina ni nswich ja kukil nawamp! Ndiy wita dilejan dia Bibil, mukadivar wovijanay nend nambaz wasangara kutakel dilejan, ni ikundj winou waya kurutu kushik ku kwipan ni kutambul dibatish. Mud ikundj winou, antu avud amusadidina Yehova nlel akwet muchim wa kujikitish mulong wa kuburen kasolikany, ni kujijaman kwa antu ayiletina uruu wa Want.
4 Yehova ukudiosh katat kamu ak kuburen kutentam pa divu. (2 Pi. 3:10, 13) Mu chisu chikemp chashalaku kal, twimburijany kutentam kwa Yehova nich kuyinkish antu awonsu mutapu wa kwipandish ku kusheshik kwa mangand minam ma Satan maburedina kutentam.—1 Yoh. 2:17.