Yehova Ukez ‘Kuyiyingish Antwend’

“Nzamb kakuteship kudi aend atonday, akata kumudidil ndiy muten ni uchuku?”—LUKA 18:7.

1. Ov, nany udia musul wa dikasikesh kudi ey, ni mulong wak?

MU MANGAND mawonsu, Atuman a Yehova asangaredin urund wa akadivar ni anambaz au in Kristu amusadidila kal Yehova mivu yivud mu kushinshaman. Ov, uyijaku amwing a antu inay akatishena? Pamwing ap wamuvurik kal nambaz umwing ipal, wabatishau pasutil kal mivu yivud ni kakatap kujingang ku yikumangan ku Chot cha Want. Ap ukutwish wavurik mukadivar ipal ukwashina nich kushinshaman mijikit ya chingand rubing ni rubing ni wasadil kal mwamu mu kusut kwa makum ma mivu. Chakin kamu, antu inay avud ashinshamena atongining anch, ing Armagedon weza kal. Pakwez, mulong wa kwel anch mangand minam makad kutentam madandamedin kwikalaku ukepishinap ruchingej rau mu kushilamu kwa Yehova ni uziyishinap mupak wau wa ‘kujijaman ni kushik kwisudiel.’ (Mateu 24:13) Kujimb kwa ritiy rimekeshinau atushalapol inay ashinshamena a Yehova kudi chakin kamu musul wa dikasikesh mulong wa chikumangen chawonsu.—Kuseng 147:11.

2. Mwikadil ik ukata kutunenganesh?

² Pakwez, pa yisu yimwing, tukutwish kuman yom mutapu windjing. Atuman amwing asala mujikit mu mivu yivud, pakwez ritiy rau mudiay Yehova raziya pakemp-pakemp, ni alika kushal mu chikumangen cha Ukristu. Chikat kutwovish ushon anch ambay inay a pakur amulika kal Yehova, ni tusotin kamu kudandamen kuyikwash nich muchim wetu wawonsu ‘amikoku inay apumbukina’ umwing ni umwing chakwel achirika kand mu ditang. (Kuseng 119:176; Rome 15:1) Ap mwamu, yom yindjing yikat kushiken—amwing pashinshamenau oku akwau ni yawiy akat kushadish ritiy—yiney yikat kulangwish yipul. Chom ik chikata kuyikwash Atuman amwing kudandamen nich ritiy mu kushilamu kwa Yehova oku akwau akat kushadish ritiy? Chom ik chikutwishay kusal muntu ni muntu ipend chakwel kushinshikin anch kwitiy kwetu anch kusejin piswimp kwa “Dichuku Dijim dia [Yehova]” kudi kwakin? (Sofoniy 1:14) Tushinshikinany katat chishimu chimwing chidia mu rusangu rafunday Luka.

Dibabesh Kudi Aom “Pakwezay Mwan a Muntu”

3. Nany ukutwisha kwisakin pakampwil chishimu cha mwadia-mufu ni nzuj, ni mulong wak?

³ Mu Luka shapitre wa 18, mudi chishimu cha Yesu cha mwadia-mufu ni nzuj. Chishimu chinech chifaniken ni cha mwin kwakan mwin kudandamen, chitwisambinang mu mutu wa mulong wasambelang. (Luka 11:5-13) Pakwez, mwikadil wa mufund wa Bibil ukweta chishimu cha mwadia-mufu ni nzuj umekeshin anch chiyitadin pakampwil antu akwikal aom “pakwezay Mwan a muntu” mu usu wa Want, wasambisha mu muvu wa 1914.—Luka 18:8.a

4. Chom ik chisambinay Yesu kurutu kwa kuta chishimu chidia mu Luka shapitre wa 18?

⁴ Kurutu isambina chishimu chinech, Yesu walonda anch uman wa kwikalaku kwend mu usu wa Want ukez kwijikan kwawonsu “mudi mulaylay” piukata “kulaylay ku mutambu umwing wa diur, wend umunyikin ku mutambu ukwau.” (Luka 17:24; 21:10, 29-33) Chikalap nchik mwamu, antu avud ashicha mu machuku ma “disudiel dia mangand” kakezap kuta matu ku uyakin winou. (Daniel 12:4) Ov, mulong wak? Mulong wa diyingishin dia chilik chimwing ni dia antu adingaku mu machuku ma Noa ni ma Lot adiburila yibabesh ya Yehova. Pa machuku minima, antu ‘adinga ni kudia, kuna, kuland, kulandish, kukun, kutung, ni kushik ku dichuku diayijiyishau awonsu.’ (Luka 17:26-29) Afa mulong akwatikana nakash nich mijikit yiney ya pichuku-pichuku ni kijikap chadinga rusot ra Nzamb. (Mateu 24:39) Nlel, antu avud mwamu mudiau, akwatiken nakash mu milong ya pichuku-pichuku chawiy akangeny kuman uman ulejena anch nsudiel ya mangand makad kumwijik Nzamb yidi piswimp.—Luka 17:30.

5. (a) Yesu wayibabesha anany, ni mulong wak? (b) Chom ik chayishikija antu amwing ku kushadish ritiy rau?

⁵ Choviken, Yesu wadinga ni kwiyakamish anch kangal mangand ma Satan meza mayizuwola in kwilej end, mu chilik cha kuyishikij ku kusot ‘kuchirikin ku yom yashala kwinyim.’ (Luka 17:22, 31) Chakin kamu, chom chinech chayishikena in Kristu amwing. Mu kusut kwa mivu antu inay adinga ni impu yikash mulong wa dichuku dikezay Yehova kusudish mangand minam mayimp. Pakwez, pamanau anch Armagedon kezinap pa muten wadinga utongidinau, awiy aziya. Ruchingej mu kusejin piswimp kwa dichuku dia dirumburish dia Yehova raziya. Aziya mu mujikit ni pakemp-pakemp akwatikana nakash mu milong ya mangand ya mwom ni asha chisu chikemp mulong wa milong ya mu spiritu. (Luka 8:11, 13, 14) Mu kusut kwa chisu, ‘achirika ku yom yashau kwinyim’—cha ushon mudi ik!

Maswir ma ‘Kulembil Yisu Yawonsu’

6-8. (a) Rumburil chishimu cha mwadia-mufu ni nzuj. (b) Mutapu ik wasadilay Yesu chishimu chinech?

⁶ Chom ik tufanyidina kusal chakwel kushinshikin anch ruchingej retu rikash mu kuwanyin kwa kushilamu kwa Yehova riziyinap? (Hebreu 3:14) Yesu wipula chipul chinech kupwa kamu kwa kuyibabesh in kwilej end anch kangal achirik ku mangand ma Satan.

⁷ Luka ufundin anch Yesu “walonda chishimu kudi awiy kwimpwishil, chakwel awapidil kulembil wakad kulik.” Yesu walonda anch: “Kwading mu ul umwing nzuj wakad kumwovang Nzamb wom, kakumubangagukup ni muntu; ni mu ul mwinamwa mwading kand mwadia-mufu; ndiy wading ni kwez kudiay ndiy ni kulond anch, ‘Nkatwilap mulong nend mukankuny nam.’ Ndiy kasalap, pasut chisu kamu; pakwez kwinyim ndiy walond mu muchim wend anch: ‘Anch kinimwovilip Nzamb wom, ap kinikumubangukup muntu; pakwez mulong wa mwadia-mufu mwinou ukata kwingakamish nikumukatwil mulong wend, ap wez kudandamen kwingakamish.’”

⁸ Kupwa kwa kulond rusangu riner, Yesu warumburila mutapu risadila anch: “Teshany mwalonday nzuj wakad kutentam. Nzamb kakuteship kudi aend atonday, akata kumudidil ndiy muten ni uchuku, pakwez ndiy ushimpishil muchim padi awiy? Nakulejany anch: Ukuyikatwil milong yau swa-swa. Pakwezay Mwan a muntu kand, ov ukez katan ritiy pansh?”—Luka 18:1-8.

“Nkatwilap Mulong”

9. Chitong ik chijim chikasikeshidinau mu chishimu cha mwadia-mufu ni nzuj?

⁹ Chitong chijim cha chishimu chinech choviken patok. Achijimbwil patok kudi antu in awonsu isambidinau mu chishimu ni kudi Yesu amwinend. Mwadia-mufu wilemba anch: “Nkatwilap mulong.” Nzuj niyend walonda anch: “Nikumukatwil mulong wend.” Yesu wipula anch: ‘Ov, Nzamb kakez kuyiyingishap antwend?’ Ni piur pa Yehova, Yesu walonda anch: “Ukuyikatwil milong yau swa-swa.” (Luka 18:3, 5, 7, 8) Ov, pa chisu ik cha pakampwil chikezay Nzamb ‘kuyikatwil milong yau’?

10. (a) Machuku ma kufundakesh meza chisu ik mu mivu chitot ya kusambish? (b) Chisu ik ni mutapu ik ukezay Nzamb kuyikatwil atushalapol end a nlel milong?

¹⁰ Mu mivu chitot ya kusambish, “machuku ma kufundakesh” mashika mu muvu wa 70 C.C. pasheshau Yerusalem ni tempel wend. (Luka 21:22) Mulong wa antu a Nzamb nlel, akez kuyikatwil milong yau pa “dichuku dijim dia [Yehova].” (Sofoniy 1:14; Mateu 24:21) Pa chisu chinicha, Yehova ukez “kuyimesh mar awiy akumeshinanya en mar”, “[Yesu Kristu] ukez kwezil mu kasu ka muzwizu mulong wa kulejan kadimu kudi antu akata kumulik Nzamb, ni kulik kuziyil ku rusangu ruwamp ra Nsalejetu Yesu.”—2 Tesalonika 1:6-8; Rome 12:19.

11. Mutapu ik ukezau kukatul milong “swa-swa”?

¹¹ Ov, mutapu ik lel tufanyidina kutesh kushinshikish kwa Yesu anch Yehova ukez kutukatwil milong yetu “swa-swa”? Dizu dia Nzamb dilejen anch “ndiy [Yehova] ushimpishil muchim,” ukez kukatul milong swa-swa pichikushika chisu. (Luka 18:7, 8; 2 Pita 3:9, 10) Mu machuku ma Noa, pimeza Mabeb, antu ayimp ayishesha pakad kulab. Chawiy chimwing, mu machuku ma Lot, chisu chanaka ruval wa kasu kudiokal mwiur, antu ayimp afa. Yesu walonda anch: “Mwamu kand muchikwikala mu dichuku dia kumekan kwa Mwan a muntu.” (Luka 17:27-30) “Kusheshik kukez kuyikashimwish,” kand antu ayimp. (1 Tesalonika 5:2, 3, MM) Chakin kamu, tufanyidin kwikal nich ruchingej rikash anch Yehova kakezap kulikin mangand ma Satan mikalaku ap dichuku dimwing kupandakanamu muchidia kutentam.

“Ukuyikatwil Milong Yau”

12, 13. (a) Dilejan ik piur pa Nzamb didia mu chishimu chatay Yesu cha mwadia-mufu ni nzuj? (b) Ov, mulong wak tukutwisha kwikal nich kashinsh anch Yehova ukez kutesh malembil metu ni kutukatwil milong?

¹² Chishimu cha Yesu cha mwadia-mufu ni nzuj chikasikeshidin kand uyakin ukwau. Mu kurumburil mutapu usadila chishimu, Yesu walonda anch: “Teshany mwalonday nzuj wakad kutentam! Nzamb kakuteship kudi aend atonday?” Chakin kamu, Yesu kadingap ni kumwilikej Yehova ni nzuj mudi kulond anch Nzamb ukuyisadil in kwitiyij mu mutapu wawiy umwing. Pakwez, Yesu wayileja in kwilej end dilejan piur pa Yehova kusutil ku kukasikeshin kushalijan kudia pakach pa nzuj winou ni Nzamb. Mu mutapu ik ukwau ushalijadina?

¹³ Nzuj wisambidinau mu chishimu cha Yesu wadinga “wakad kutentam,” pakwez, “Nzamb udi nzuj utentamina.” (Kuseng 7:11; 33:5) Nzuj kadingap ni kubangin chikalap nchik yisakin ya mwadia-mufu, pakwez Yehova ukat kumubanginang muntu ni muntu. (2 Jinsangu 6:29, 30) Nzuj kasotap kumukwash mwadia-mufu, pakwez Yehova usotil—inge, ukwet impu yikash—ya kuyikwash antu amusadidila Ndiy. (Isay 30:18, 19) Dilejan ik didiamu? Anch nzuj wakad kutentam wamutesha mwadia-mufu ni wamukatwila milong, Yehova ukutesh malembil ma antwend ni chakin kamu kuyikatwil milong yau!—Jinswir 15:29. 

14. Ov, mulong wak tufanyidinap kushadish ritiy mu kwez kwa dichuku dia dirumburish dia Nzamb?

¹⁴ Chawiy lel, antu akata kushadish ritiy rau mu kwez kwa dichuku dia dirumburish dia Nzamb arumbukin nakash. Ov, mulong wak? Mulong chilikinau kwitiyij mutapu wa kashinsh anch “dichuku dijim dia [Yehova]” didi piswimp, amekeshin mu yisal yau anch idjidjekin, anch chifanyidin kumuchingejin Yehova anch ukutwish kuwanyish kushilamu kwend nich kushinshaman. Pakwez, kwikil muntu ap umwing ukutwisha kutadikij kushinshaman kwa Nzamb. (Yob 9:12) Chipul chijim chitufanyidina kwiyipul chawiy ech, Ov, tukez kushal ashinshamena? Ni wawiy kamu mutu wa mulong walangwishay Yesu kwisudiel kwa chishimu piur pa mwadia-mufu ni nzuj.

“Pakwezay Mwan a Muntu Kand, Ov, Ukez Katan Ritiy Pansh?”

15. (a) Chipul ik chipulay Yesu, ni mulong wak? (b) Chipul ik tufanyidina kwiyipul ayinetu?

¹⁵ Yesu wipula chipul chimwing chiwamp nakash: “Pakwezay Mwan a muntu kand, ov, ukez katan ritiy pansh?” (Luka 18:8) Dizu “ritiy” dilejen anch Yesu wisambina, ridiap ritiy mu kulond kujim, pakwez wisambina ritiy rimwing ra pakampwil—ritiy mudi radingay nich mwadia-mufu. Yesu kakulap ku chipul chend. Wachipula mulong wa in kwilej end atongina piur pa ngikadil ya ritiy rau. Ov, radinga riyila mu kuziy pakemp-pakemp, chakwel anch ikala mu chak cha kuchirikin ku yom yashau? Ap anch ading ni ritiy mudi ramekeshay mwadia-mufu? Nlel, tufanyidin twiyipul ayinetu anch, ‘Ritiy ra mulad ik rimenay “Mwan a muntu” mu muchim wam?’

16. Ritiy ra mulad ik radingay nich mwadia-mufu?

¹⁶ Chakwel anch twikal mukach mwa antu akezau kukatwil milong kudi Yehova, tufanyidin kumwimburij mwadia-mufu. Ritiy ra mulad ik radingay nich? Wamekesha ritiy rend padandamenay “kwez kudiay [nzuj] ni kulond anch, Nkatwilap mulong.” Anch mwadia-mufu winou wadandamena chakwel amukatwila milong kudi ikundj wakad kutentam, atushalapol a Nzamb nlel akutwish kwikal nich ruchingej anch akez kuyikatwil milong kudi Yehova—ap anch yalab kupandakanamu mutuchingejina. Chikwau kand, amekeshin ruchingej mu kushilamu kwa Nzamb padandamedinau mu malembil—inge, kusutil ku “kumudidil ndiy [Yehova] muten ni uchuku.” (Luka 18:7) Chakin, anch mwin Kristu walik kulembil chakwel amukatwila milong, ukumekesh anch washadish kal ruchingej rend mudiay Yehova anch ukuyikamunin atushalapol end.

17. Mayingishin ik mitukweta ma kudandamen mu malembil ni kulam ritiy retu mu uyakin wa kwez kwa dichuku dia dirumburish dia Yehova?

¹⁷ Mikadil ya pakampwil ya mwadia-mufu yitulejin anch tukwet mayingishin makwau ma kudandamen mu kulembil. Tushinshikinany kushalijan kumwing kudia pakach pa mikadil yend ni yetwetu. Mwadia-mufu wadandamena kuya kudiay nzuj ap anch kwadingap muntu wa kumukasikesh kusal mwamu, pakwez Dizu dia Nzamb ditukasikeshin kudandamen “mu kulembil.” (Rome 12:12) Mwadia-mufu kadingap nich kashinsh anch akumusadil yadinga yisotilay, pakwez Yehova watwinkishin kal kashinsh anch ukez kutukatwil milong yetu. Kusutil kudi muprofet wend, Yehova walonda anch: “Ap anch chisu chalabap nchik, ey chingel, chikuwanyin kwau. Kichikulabap, bwat.” (Abakuk 2:3; Kuseng 97:10) Mwadia-mufu kadingap ni nkwash wa kumulondil chakwel kuwejin usu ku kwit kwend, pakwez etu tukwet mwin kutukwash mukash, Yesu, “ushich ku chikas cha katatuku cha Nzamb, ndiy ukat kutulondilang.” (Rome 8:34; Hebreu 7:25) Chawiy, ap anch mwadia-mufu, chikalap mwikadil wend ukash, wadandamena kumulej nzuj nich ruchingej anch akez kumukatwil mulong, ni yetu tufanyidin kulam ritiy retu mu uyakin wa kwez kwa dichuku dia dirumburish dia Yehova!

18. Mutapu ik malembil makeza kukasikesh ritiy retu ni kutukwash chakwel atukatwil milong?

¹⁸ Chishimu cha mwadia-mufu chitulejin anch malembil ni ritiy yiyiling pamwing ni anch kudandamen mu malembil kukutwish kurishish usu usotila kuziyish ritiy retu. Chakin, chom chinech chirumburikinap anch kumekan kwa chifu kwa kulembil wawiy mwom wa kukangesh kushadish ritiy. (Mateu 6:7, 8) Anch twovil ja kulembil mulong twajingunin kal anch twimedin nakash padiay Nzamb, pawiy pinipa makata malembil kutusejish nakash kudi Nzamb ni kukasikesh ritiy retu. Mulong ritiy riswiriken mulong wa kupand, kwikil chinshilend anch Yesu wamana anch chidi cha usey nakash kuyikasikesh in kwilej end anch “alembilang yisu yawonsu wakad kushadish ruchingej”! (Luka 18:1, MM; 2 Tesalonika 3:13) Chakin, kwez kwa “Dichuku Dijim dia [Yehova]” kwimedinap pa malembil metu—dikez kwez tulembila ap bwat mulong wa dichuku dined. Pakwez, kutukatwil kwetu milong ni kupand kwetu kwi njit ja Nzamb kwimedin pa ritiy ritukweta ni pa mwom wa malembil utukweta.

19. Ov, mutapu ik tumekeshina anch twitiyijin nich kujijaman anch Nzamb ukez ‘kuyiyingish antwend atonday’?

¹⁹ Mudi chivurish, Yesu wipula anch: “Pakwezay Mwan a muntu kand, ov, ukez katan ritiy pansh?” Ov, chisu chakul ku chipul chinech chikash? Tukwet musangar mudi ik anch mamiliyon ma atushalapol in ritiy a Yehova adia mu mangand nlel amekeshin kusutil ku malembil mau, ku kushimpish kwau muchim, ni ku kulamat kwau anch chipul cha Yesu chitwishikin kutan chakul anch inge! Mwawiy, kwikalap nchik kuburen kutentam kutuletidina mangand ma Satan, twitiyijin nich kujijaman anch Nzamb ukez ‘kuyiyingish antwend atonday.’

[Mazu madia kwishin kwa paj]

Ov, Uchivurikin?

• Chom ik chayisala in Kristu amwing ashadisha ritiy rau?

• Ov, mulong wak tufanyidina kwikal nich ritiy rikash mu kwez kwa dichuku dia dirumburish dia Yehova?

• Mayingishin ik tukweta ma kudandamen mu malembil?

• Mutapu ik kudandamen mu malembil kutukingin ku kushadish ritiy retu?

[Chipich chidia pa paj wa 19]

Chom ik chikasikeshidinau mu chishimu cha mwadia-mufu ni nzuj?

[Chipich chidia pa paj wa 21]

Mamiliyon ma antu nlel mitiyijin nich kujijaman anch Nzamb “ukuyikatwil milong”