Tutakelany Malejan ma Bibil Mayila Kurutu Chikunku 9: Kuyirijek in Kwilej Kupan Uman wa Chikashimwish
1 Chisu chijikay Andre ni Filip anch Yesu wadinga Mesia washilaumu, awiy katwishap kulik kuyilej akwau rusangu risangareshina. (Yohan 1:40-45) Chawiy chimwing nlel, pasambishinau in kwilej Bibil kutek ritiy mu yom yilejinau, ayikasikeshin kulond piur pa yom yilejinau. (2 Kor. 4:13) Mutapu ik tukutwisha kuyikasikesh kupan uman wa chikashimwish ni kuyirijek chakwel atwisha kamu kusal nawamp?
2 Ukutwish kamu kwey kumwipul mwin kwilej anch wayilejinap kal akwau yom yilejinay mu Bibil. Pamwing kud arund ni yid ya dijuku akutwishay kutazuk kwibomb nend ku dilejan. Mwipula anch umwing wa ambay nend a mudimu, a shikol, ap antu akwau a chijiken amekeshinap kal kusanger mu rusangu ruwamp. Mu mutapu winou ndiy ukutwish kusambish kupan uman. Mukwasha kwov maswir ma kusadil kujingunin ni kwikal wilimishina ni mwin masip chisu chilondilay nau akwau piur pa Yehova ni ntong jend.—Kol. 4:6; 2 Tim. 2:24, 25.
3 Kulond ya Yitiyij Yau: Chidi cha usey nakash kuyiy in kwilej Bibil kusadil Dizu dia Nzamb mulong wa kulond ya yitiyij yau. Pa manans ma kutond chisu cha dilejan, mwipula mwin kwilej anch: “Mutapu ik ukutwisha kusadil Bibil mulong wa kurumburil uyakin winou mu dijuku diey?” ap kand “Mufund ik wa Bibil ukutwisha kusadil mulong wa kumekesh chinech kud murund?” Tal mutapu wakwilay, ni muleja mutapu wa kwimen pa Mifund mu kufundish kwend. (2 Tim. 2:15) Kusutil ku kusal mwamu, ukwikal mwin kumurijek mwin kwilej kupan uman wa chikashimwish ni, anch wawanyish yitinau, mu mudimu utenchikinau wa kulejan pamwing ni chikumangen.
4 Chidi cha manangu kuyirijek in kwilej Bibil kurishish rupompat. (Mat. 10:36; Luka 8:13; 2 Tim. 3:12) Chisu chipwilau akwau yipul ap kulond mulong wa Atuma a Yehova, chinech chikutwish kuyinkish in kwilej mutapu wa kupan uman. Broshir Les Témoins de Jéhovah : Qui sont-ils ? Quelles sont leurs croyances ? ukutwish kuyiwanyish awiy kwikal ‘irijekina ku kwakul.’ (1 Pi. 3:15) Ukwet nsangu ja kashinsh jikutwishau kusadil antu asu mulong wa kuyikwash nawamp arund ni yid ya dijuku kwov kurumburik kwa yitiyij ni mijikit yetu yimedina pa Bibil.