Yikwashany Anen Kuya Kurutu mu Mudimu

¹ Anvaj in Kristu akwet chisend chijim nakash cha kufumb anau mu mudimu kudiosh ku wanikanch wau. Chinech chikutwish kusadik mu mitapu yivud. An amwing akutwish kuchirikin kujimbul mukand wa Bibil ufanyidina ap anch kand kal ijika kutang. Chinech chikutwish kwikal nich chibachikin cha usu padiau in kutesh. Payilau anikanch ni kupam, akutwish kusal yivud nakash mu mudimu. Mutapu ik ukutwishanya en anvaj kuyikwash anen kwipan mu kulejan uman? Natong yiyul yilondwila ey yikukukwashany kand.

² Kupwa kwa kupan moy, ukutwish walond anch:

◼“Mwanam, [dijin diend], ukwet mufund wa usey nakash usotilay kukulej.” Mwaney ukutwish kulond anch: “Mukand winou mu Kuseng wanfundishin dijin dia Nzamb. [Mwan watang ap wajimbul Kuseng 83:18.] Magazet minam malondil piur pa yom yikusalay Nzamb mulong wetwetu. Ov, nikutwish kukushilam?” Ukutwish kupwish mambamb ni kurumburil mutapu upaninau ukwash ku mudimu wa mangand mawonsu.

³ Ap ukutwish kupakish minsamb yiney:

◼“Walankany. Nimufundishin changadim wam, [dijin diend], kumekesh kubangin mulong wa antu akwau mu chisak. Ndiy usotil kukulej uruu wiswimp wa Bibil.” Ndiy ukutwish kulond anch: “Mutapu umwing nisotila kuyikwash antu udi kusutil ku kupan ruchingej ra Bibil ra dikez. [Mwan watang ap wachirikin kujimbul Kujingunik 21:⁠4.] Magazet minam marumburil yikusala Want wa Nzamb mulong wetwetu. Nitongin anch ukusangar kumatang.”

⁴ Chisu ni chisu kusadil mazu makusambish nich minsamb maswapela kukuyitwishish an kwikal nich kashinsh mu ukaliweny wau wa kulejan uruu wa Want. Kusadil yikunku yimedina pa kulond patok ni dizu diwanyidina ku kuyiwanyish kulond mu mikadil kushalijan. Kufundish kuwamp kuyila kurutu ni kujikitish kwa kashinsh kukuyikwash an akemp kumekesh ritiy rau.

⁵ Nich dikasikesh mud dined, anikanch avud ikel awanyishina yitinau mud in kulejan akad kubatishau. Udi musangar ujim nakash kuman anetu akat kuya kurutu mu mudimu wa Ukristu!​—⁠Kus. 148:​12, 13.