Program Musu wa Chitentam cha Pakampwil cha Dichuku Dimwing

Dis didi chitang chipandakena kuwap. (Kus. 139:14) Pakwez, dikutwish kwasin ching pa chom chimwing chisu ni chisu. Mwamu kamu chidia mu mutapu wa kashinsh ap wa chirumbidij. Chakwel kulam kuman kwetu kuwap kwa muspiritu, tufanyidin kukumangejin manangu metu pa kusal rusot ra Nzamb. Pa kuman kampuw ka mangand ma Satan kiwejidinaku nakash kupandakanamu pasak, chiwapin mud ik anch program wa chitentam cha pakampwil cha dichuku dimwing wa muvu wa mudimu wa 2006 ukwisambin mutu wa mulong “Lam Dis Diey Zwang”!​—⁠Mat. 6:⁠22.

Yom ik tukutwisha kusal chakwel kutambul yiyukish yidiokila kud Yehova? (Jinsw. 10:22) Chipul chinech akuchishinshikin mu chikunku “Angul Yiyukish ya Kulam Dis Didia Zwang.” Minterview makukasikeshin mutapu tukutwisha kutaninamu ku kusadil yijidik ya Bibil. Diskur dia kusambish dia mwin kulond ngendj, “Lam Dis Didia Zwang mu Mangand Minam Mayimp,” dikutubabesh ku yom yikutwisha kuvundangesh mwom wetu ni kushesh pakemp pakemp mwom wetu wa muspiritu. Tukwilej kand chirumburikina kutond “mutambu uwamp.”​—⁠Luka 10:⁠42.

Mutapu ik ukutwishau anvaj ni antu akwau kuyikasikesh ansand in Kristu kwasin manangu pa yom ya muspiritu? Yikunku “Anvaj Asina Kamu Jinseu Jau Nich Diloz” ni “Ansand Awanyishina Ntong ja Muspiritu” yikwikal nich yitongijok ya anvaj ni ansand piur pa chipul chinech chijim. (Kus. 127:⁠4) Diskur dia nsudiel dikusalay mwin kulond ngendj dikwisambin mutapu tukutwisha kudandamen kuya kurutu pamwing ni dirijek dia Yehova, muntu ni muntu ipend, mu majuku ni mu chikumangen.

Twikala a katat mu uyakin ap asadina kal makum ma mivu mu kumusadil Yehova, chidi cha usey anch ‘tulama dis dietu zwang.’ Program wa chitentam cha pakampwil cha dichuku dimwing ukutukwash kamu kusal mwamu.