Ikal Nich Dis Didia Zwang

1. Chirumburikin ik kwikal nich dis didia zwang, ni mulong wak chidi cha usey?

Mu Mafundish mend ma pa Mukandu, Yesu wapwitina manangu ku usu ukash ukutwisha kwikal nich dis dia chifanakesh ap dia muspiritu pa mashakamin ma mwom wetu wawonsu. Ndiy walonda anch: “Chawiy anch dis diey didi zwang, ni mujimbu wey ukwizul sens nich kutok. Pakwez anch dis diey dikuyipil, ni mujimbu wey wa kabuj ukujalijan nich mididim.” (Mat. 6:​22-23) Dis didia zwang didi dis diasidina pa rutong rumwing​—⁠kusal rusot ra Nzamb​—⁠dikatap kuzuwol mulong wa yakamish yipandakena ya yom ya ku mujimbu. (Mat. 6:​19-21, 24-33) Ov, yom ik yikutwisha kutukwash kulam dis didia zwang?

2. Ov, Dizu dia Nzamb dikasikeshidina mutapu ik kuman kwa yom ya ku mujimbu?

² Kudish Kusanger mu Yiukweta: Kudimukin muchifanyidina maswir ma dijuku diey chidi chisend cha mu Mifund. (1 Tim. 5:⁠8) Pakwez chinech chitinap anch twiyandjik mu kudandamen kukimbijol yom yipandakena kuwap nakash ni ya ufun. (Jinsw. 27:20; 30:​8, 9) Pa chinech, Mifund yituyudil kusanger “yakudia ni yakudjal,” yom ya ukwash wa mwom. (1 Tim. 6:8; Heb. 13:​5, 6) Kutesh chiyul chinech kukutwish kutukwash kutadishin dis dietu pa yom yifanyidina.

3. Yom ik yikutwisha kutukwash kwipuk kwitwik chamwamu yisend yilimina?

³ Chidi cha manangu ku mutambu wetu kwipuk kwandam chamwamu mu mabaz ni kusot mapit mitina chisu chivud ni kubangin kukash. (1 Tim. 6:​9, 10) Ov, mutapu ik tukutwisha kuchisal? Pitushinshikidina mutapu wa kusal, tulembilany pa mulong winou nich kashinsh ni win-yakin kutal anch chikutwishap kukangesh mijikit yetu ya muspiritu. Kwat mupak wa kutek yom ya muspiritu pa ndond ya kusambish mu mwom wey.​—⁠Filp. 1:10; 4:​6, 7.

4. Ov, mulong wak tufanyidina kukimb mitapu ya kupipesh mulad wa mwom wetu?

⁴ Pipesh Mulad wa Mwom Wey: Ukwash ukwau wa kujijaman ku chipwichik cha yom ya ku mujimbu udi kukimb mitapu ya kupipesh mulad wa mwom wey. Mukadivar umwing wamana anch dijuku diend dikutwish kwend nawamp pakad yom yipandakena ya ku mujimbu walonda anch: “Nikutwish katat kusal yom yivud nakash mu chikumangen mulong wa kuyisadil akadivar nam. Nitiyij kal anch Yehova uyiyukishin atushalapol end awonsu anch atakej kurutu difukwil diakin pa ndond pa yisakin yau.” Ov, ukutwish kusanger yiyukish yivud anch wapipesh mulad wa mwom wey?

5. Ov, mulong wak chitin kusal usu chisu chawonsu chakwel kulam dis dietu didia zwang?

⁵ Tuswiridin kusal usu chisu chawonsu chakwel kujijaman ku chibachikin cha Satan, cha dipit diend dia mangand, ni cha mujimbu wetu wakad kuwanyin. Pa ndond pa kulik mes metu mawayiway, el tumatadishany masina pa kusal rusot ra Nzamb ni pa richingej retu ra usey ra mwom wa chikupu.​—⁠Jinsw. 4:25; 2 Kor. 4:⁠18.