Chom ik Chirumburikina Kulond Anch “Dis ku Dis”?
Chakul cha Bibil
Chijil cha “dis ku dis” chading pakach pa Yijil ya Nzamb yapanay kudi Moses mulong wa Isarel wa pakur ni achijimbula kudiay Yesu mu Mafundish mend ma pa Mukandu. (Mateu 5:38, Kubudik 21:24, 25; Kuvurik Yijil 19:21) Chijil chinech chading chirumburikin anch muntu ufishinau nich afanyidin kumupup kukwatijan ni yisal yend.a
Chijil chinech achisadinang nakash anch muntu wamusal mukwau nayimp kwa kwisotin. Piur pa dipup diafanyinau kumupup nich mwin kusalan nayimp, Chijil cha Moses chading chilondin anch: “Difup ku difup, dis ku dis, dizeu ku dizeu. Mwamu mukez kumusalau muntu mwawonsu ukeza kumusha mukwau ulim.”—In Levi 24:20.
Chijil cha “dis ku disu” chading ni chitongijok ik?
Chijil cha “dis ku disu” chamwinkap muntu mbil ya kufundakesh amwinend. Pakwez, chayikwasha anzwij atondau kumupup muntu kukwatijan ni yom yasalangay, ni kangal asala kwa chisum nakash ap kwa usweral.
Chijil chamukwasha kand muntu wading ukimbina kumusal mukwau nayimp chakwel alika kusal mwamu. Chijil chading chirumburil anch: “Chad akwau ashilap [antu ading kusadin kutentam kwa Nzamb] akez kwov wom anch atesh mwamu, niyau akez kulik kusal kuyip pakach pen.”—Kuvurik Yijil 19:20.
Ov, in Kristu afanyidin kusadin chijil cha “dis ku disu”?
Bwat, chijil chinech chiyitadinap in Kristu. Chading pakach pa yijil yamwinkau Moses, ni chijil chinech chapwa kusutil rufu ra Yesu.—Rom 10:4.
Ap mwamu, chijil chinech chitukwashin kwijik mutapu utonginingay Nzamb. Chilakej, chimekeshin anch Nzamb ukatining kutentam. (Kuseng 89:14) Chimekeshin kand anch Nzamb umen anch mwin kurumbuk afanyidin kumupup “mudi mudia yisalijok [yend].”—Jeremiy 30:11.
Yitongijok ya makasu piur pa chijil cha “dis ku disu”
Chitongijok cha makasu: Chijil cha “dis ku dis” chading chikash nakash.
Win yakin: Chijil chinech chadingap chipanina mbil ya kusadin kutentam mu mutapu uyimp ap wa chisum nakash. Pakwez, mu kuchisadin nawamp, anzwij atondau amupupang muntu ching anch ashinshikin yom nawamp ni kuman kamu anch wasalang kwa kwikatin. (Kubudik 21:28-30; Kuchind Michid 35:22-25) Chijil cha “dis ku dis” chakwasha mulong wa kwipuk kumupup muntu nayimp.
Chitongijok cha makasu: Chijil cha “dis ku dis” chasalang anch kufundakesh kudandamena.
Win yakin: Chijil cha Moses achinach chading chilondin anch: “Kangal wez wafundakesh ap kuyilamin akwen rukuny mu muchim wey.” (In Levi 19:18) Pa ndond pa kuyikasikesh in Isarel kwifundakesh ayinau, Chijil chading chiyikasikeshin antu kumuchingejin Nzamb ni mu dirumburish diend diatekay mulong wa kupwish milong.—Kuvurik Yijil 32:35.
a Mbil yiney ya chijil, yitazukinau kand anch lex talionis mu dizu dia Latin, yadingaku kand mu yom ya dirumburish dia antu a michid yikwau ya pakur.