Ov, Dis Diey Didi Zwang?

1. Kwikal ni ‘dis didia zwang’ kurumburikin ik?

¹ Mes metu mimedining pa yibachikin ya yisal yetu. Kuwanyin mudi ik kwa mazu ma Yesu malondila anch: “Chawiy anch dis diey didi zwang, ni mujimbu wey ukwizul sens nich kutok”! (Mat. 6:22) Anch dis dietu dia muspiritu didi “zwang”, dimedin pa rutong rumwing—kusal rutong ra Nzamb. Tukutek Want wa Nzamb pa ndond ya kusambish, chawiy yom ya ku mujimbu yakad usey yikutwishap kutuzuwol ap midimu ya makas kuvundangesh mudimu wa kulejan.

2. Ov, chom ik chikutwisha kuzuwol mutapu wetu wa kuman yom, ni chom ik chikutwisha kutukwash?

² Maswir ma Kwishinshikin: Mutapu wetu wa kuman yom ukutwish kuyip nich yom yibaziningau yikatau kutulej ku ma televizion ni maradio ap yom tuswiridina yikwetau kudia antu akwau. Kurutu kwa kulondul mausu ap kulondul rutong riner chifanyidin kwitekin chisu chijim, nfalang, ap usu, yikutwisha kwikal yiwamp chakwel “kuchind usey” ni kwiyipul ayinetu anch: ‘Ov, rutong riner rikutwish kurijek mudimu wam ku mes ma Yehova bil anch rikuukangesh?’ (Luka 14:28; Fil. 1:9-11) Chidi kand cha manangu kushinshikin pa chisu ni chisu mutapu tukutwisha kukepish mashakamin metu ma mwom chakwel tusal nakash mu mudimu wa kulejan.—2 Kor. 13:5; Efes 5:10.

3. Ov, chom ik tukutwisha kwilejin kudiay nambaz umwing watenchika yom chakwel akepisha mashakamin ma mwom wend?

³ Pa chisu chasambishay nambaz umwing mudimu wa uchibol wa rawonsu, ndiy watonda kulam mudimu wend wa machuku mawonsu ap anch mudimu wa chikunku chiswimp wamuletinanga nfalang jivud mulong wa kupwishang nich maswir mend. Ndiy walonda kamu anch: “Kwikil kashalapol ap umwing ukutwisha kuyisadil ant a mudimu aad. Nasala usu wa kulam maswir mam. Najingunina anch yom ya ku mujimbu yikat kunanap ni nifanyidin kusal usu amwinam chakwel niyijidisha mutapu wa kuyikimb.” Mikadil yend mu mwom yasala chakwel atenchika mutapu wa kukepish mashakamin mend, kuswimp mudimu, ni kuman mutapu wa kudandamen mu mudimu wa uchibol.

4. Ov, mulong wak katat chidi cha usey kulam dis didia zwang?

⁴ Kusal yom pakad kulab mu yisu yetu kukusal kand usey ujim wa kulam dis didia zwang. Machuku mawonsu mayila ni kusut am mayil ni kushej kwinsudiel ya ditenchik dia yom ni nsambishil ya mangand masu ma Nzamb. (1 Kor. 7:29, 31) Anch twadandamen mudimu wa kulejan, tukutwish twipandish ayinetu ni antu akwau atuteshininga.—1 Tim. 4:16.