Tumekeshany Kusanger kwa pa Kampwil —Ku Kutalijan Mes ni Mes
1 Chisu tulejena uman kud antu awonsu ni ku chikumbu ni chikumbu, chisu chivud kurutu kwa kusambish kulond tukat kutalijan mes ni mes. Mu chisu chinech chikemp, tukutwish kujingunin kwi mpal yau mutapu wovilau patumanau kal ni ap mu mwikadil ik udiau. Chilik chimwing, ni yawiy akutwish kujingunin yivud ku mutambu wetu. Mband umwing walonda mwamu pezau ni kumutal kud Kaman anch: “Yinivurikina mulong wa rumwemu rend chadinga chisambu. Kusanger kwam kwavuvurika.” Chovil chinech chamubachika mband winou kutesh rusangu ruwamp.
2 Kutalijan nau antu mes ni mes udi mutapu uwamp wa kusambish kulejan uman chisu tulejena uman mu mikombil ap mu jindond jikwau mudia antu avud. Mukadivar umwing wayitala antu ezina kudiay ndiy. Chisu chatalijanau mes ni mes, ndiy wamwemwetisha ku kan ni kupwish wapan magazet. Pasadilay mulad winou, ndiy wambamba nawamp nau antu avud ni wapana kand mikand yivud.
3 Tujinguninany Yovilau Antu Akwau: Kutalijan mes ni mes kukutukwash kujingunin yovilau antu akwau. Chilakej, anch muntu katuteshinap nawamp ap ukisin yom kanang twalondila, chisu chivud yikumeken ku chifu chend. Anch ukwatiken ap yamuswedish kal, tukuyijingunin ku kutal chifu chend. Mwamu tukutwish kuswimp ap kwiswipish mambamb metu. Kwikal adimukidina yovil ya antu akwau udi mutapu uwamp wa kumekesh kusanger kwetu kwa pa kampwil kudi awiy.
4 Win Yakin ni Kashinsh: Mu yaku yivud, kumutal muntu ku mes kumekeshin kashinsh ka muntu. Tesh mutapu wakulay Yesu pamwipulau kud in kwilej end anch: “Ing ukapandishau lel nany?” Bibil ulondil anch: “Yesu wayital neng, walond anch: Chinech chikasiken kudi antu, pakwez kudi Nzamb yom yawonsu yikasikenip.” (Mat. 19:25, 26) Chakin kamu kashinsh mu kutal kwa Yesu kakasikesha mazu mend. Chilik chimwing, kutalijan mes ni mes kukutukwash kulejan uruu wa Want nich win yakin ni kashinsh.—2 Kor. 2:17; 1 Tes. 1:5.