Mutapu wa Kulam Mushiku
1 Mushiku wa Apolo mu kusal kwa mudimu wend ukutwish kutuvurish etu ambay nend in Kristu nlel unou tukweta mushiku wa pa kampwil mu mudimu wa kulejan. (Midimu 18:24-28) Komb, atuyudil etu awonsu anch: “Kangal wikalany ni usweral ku mudimu wen; ikalany ni mushiku mu muchim.” (Rom 12:11) Yom ik yikutwisha kutukwash kwikal nich mushiku mu mudimu wa Ukristu ni kuulam?
2 Ronganyin Rikasikeshin Mushiku: Kupwa kwa Yesu kumekan kud in kwilej end aad ndiy “wayirumburila yom yawonsu yalondau mulong wendendiy mu Mikand ya Nzamb,” awiy alonda anch: “Ov, michim yetu kiyaswanangap mwivumu padingay ni kuturumburil mwi njil?” (Luka 24:27, 32, Manswik Masu) Chilik chimwing, komb michim yetu yikatap kuswan nich kuzangijal chisu tuwejidina chovu cha Dizu dia Nzamb? Chakin, ronganyin rikat kukasikesh ritiy. Rom 10:17 urumburil anch: “Kwitiy kukat kudiok ku kutesh.” Anch michim yetu yizwil chakin nich ruchingej mu kushilamu kwa Yehova, kitukutwishap kulik kulond yom yitwilejina!—Kus. 145:7; Midimu 4:20.
3 Tukutwishap kuchingej kusu ronganyin twatambwila ku ukwash wa dilejan dia kusambish chakwel kulam rukat retu tumukatila Nzamb ni mushiku wa usu tukweta mu kusal mudimu wend. Tufanyidin kudandamen kutanduril chovu chetu cha uyakin ni kumukat Nzamb chipandakena. Anch bwat, mudimu tumusadidila ukutwish kwikal wa manshindangen. (Kuj. 2:4) Dizu dia Nzamb ditukasikeshin “kukudil mu ronganyin ra Nzamb.”—Kol. 1:9, 10.
4 Yaku Yetu ya Kwilej: Chawiy lel, chidi chiwamp kushinshikin yaku yetu ya kwilej. Chilakej, tukutwish kutek tushony pa yakul yidia mu dilejan dia Chinong cha Kalam ni kurumburil nawamp. Ov, tukat kukimb maverse majimbwilau ni kutong mutapu tukutwisha kumasadil mu mwom wetu? Ov, tukat kusal usu wa kukimbijol chisu tutangina Bibil rubing ni rubing anch mikadil yetu yitutwishishin ni kutong pa malejan madia mu yom tutangina mu Bibil? (Kus. 77:11, 12; Jinsw. 2:1-5) Chidi cha ukwash nakash kutong ni kusanger mu dizu dia Nzamb! (1 Tim. 4:15, 16) Kwilej kwinoku kwa kashinsh kukutukwash ni kutukasikesh kwikal “atakamena ku midimu yiwamp.”—Titus 2:14.