Ov, Umulondwil Kristu Rawonsu?

“Mudi chiukata kwendilanyimu kal, . . . ukukulany kakwau ni kakwau.”—1 TES. 4:1.

1, 2. (a) Yom ik yijim yasalau antu avud mu machuku mapanay Yesu uman? (b) Mulong wak chirung chetu cha katat chidi kand cha usey?

WATONGIJOKIDINAP kal pa mutapu mwom wafanyina kwikal ushimokishina padingay Yesu pa mangand? Ufanyidin kutongijokin pa ruchingej ra kwikal okinau kudi Yesu ni wakad kwov kusansan kwa yikokujol ya ku mujimbu. Ap ukutwish kushinshikin musangar wawonsu wa kutwish kumuman ni kumutesh Yesu—mulong wa kutwish kwilejin kudiay ndiy ap kumutal pasadilay chilay kanang. (Mar. 4:1, 2; Luka 5:3-9; 9:11) Chela kwikal chiyukish chijim mud ik kwikalaku pa chisu chasalay Yesu midimu yiney yawonsu! (Luka 19:37) Kudiosh pinipa kwikil dijuku diapanap kal uman wa yom mudi yiney, ni yom yasalay Yesu pa divu kushik ni “ku kwipesh kwend amwinend” kiyikezap kuchirikin kapamp kakwau.—Heb. 9:26; Yoh. 14:19.

² Pakwez, pa chirung chetu cha katat, chidi ni chawiy cha usey. Mulong wak? Mulong tushich mu chirung chasambelau kulejan mu Bibil anch cha “disudiel” ni “machuku ma kwisudiel.” (Dan. 12:1-4, 9, MN; 2 Tim. 3:1) Pa chirung chinech, Satan amopata mwiur. Machuku makemp kurutu oku, akumukas ni kumudjibwil “mu dibuku diakad musul.” (Kuj. 12:7-9, 12; 20:1-3) Tukwet kand pa chirung chinech chisend chijim cha kulejan “rusangu ruwamp ra want” pa mangand mawonsu, kuyilej antu piur pa ruchingej ra kwez kwa Paradis—mudimu winou ukezap kand kudadik.—Mat. 24:14.

3. Chisu chikemp kurutu kwa kuya kwend mwiur, yom ik yayilejay Yesu in kwilej end kusal, ni chinech chita yom ik?

³ Chisu chikemp kurutu kwa kuya kwend mwiur, Yesu wayileja in kwilej end anch: “Ukez kwikalany atuman amam ku Yerusalem, ni ku Yudea mwawonsu ni Samaria, ni kwisudiel kwa mangand.” (Mid. 1:8) Mudimu winou wadinga witin mujikit wawonsu wa kulejan. Ov, wadinga nich rutong ik? Ra kwikadish in kwilej—in kumulondul Kristu akwau—kurutu disudiel dieza. (Mat. 28:19, 20) Ov, chom ik tufanyidina kusal anch tusotil kuwanyish mudimu wa Kristu?

4. (a) Mazu ma Pita madia mu 2 Pita 3: 11, 12 makasikeshidin maswir ik? (b) Chom ik tufanyidina kubabel?

⁴ Shishikin mazu minam ma kambuy Pita: “Ov, en ukwikalany antu a mutapu ik? Chifanyidin en kwikalany nich mwom utumbila, wikalany kand in kudandamen kudi Nzamb, piuchingedilany dichuku dikurumburishay Nzamb.” (2 Pita 3:11, 12) Mazu ma Pita makasikeshidin pa usey wa kudandamen kwikal achila ku mes pa chirung chinech cha machuku ma kwisudiel chakwel kushinshikin anch mwom wetu wimedin pa yisal yitumbila. Mu yisal mudi yiney mudi kulejan kwa rusangu ruwamp. Chawiy lel, chidi cha musangar mudi ik, kudi etu pa kuman mutapu usadilau akadivar mu mangand mawonsu nich mushiku mudimu wa in Kristu wa kulejan! Pa chisu chawiy chimwing, tujingunin anch tufanyidin kubabal chakwel yipwichik ya pichuku ni pichuku ya mangand ma Satan ni yibachikin yetu ya mujimbu ya chivadik kangal yakepish mushiku utusadila nich mudimu wa Nzamb. Chawiy lel, tushinshikinany, mutapu tukutwisha kutal nawamp anch tudandamedin kumulondul Kristu.

Itiyij Yisend Yipaninay Nzamb

5, 6. (a) Paul wayijikitisha ambay nend akaritiy mu Yerusalem mulong wak, ni wayibabesha pantaliken ni chom ik? (b) Mulong wak tufanyidinap kudiburil yisend yitwinkishinay Nzamb?

⁵ Mu mukand wayifundinay in Kristu a mu Yerusalem, kambuy Paul wayijikitisha ambay nend akaritiy mulong wa ritiy ni kujijaman kwamekeshau ap padingau mu rupompat. Walonda anch: “Vurikany mutapu wadinganya mu machuku ma kwinyim piwatambulanya chimunyik cha Nzamb mu michim yen. En wimananya daang mu mar ni mu kurish.” Mwawiy, Yehova wavurika mwikadil wau wa ritiy. (Heb. 6:10; 10:32-34, MN) Mazu ma chirungul ma kujikitish ma Paul mafanyina kuyikasikesh nakash in Kristu a mu Hebereu. Pakwez, mu mukand wawiy umwing, Paul wayibabesha kand pantaliken ni chibachikin cha untu, chikutwisha anch kadimukinap chikukepish mushiku wa muntu mu mudimu wa Nzamb. Walonda anch in Kristu afanyidin kubabal chakwel kangal ‘alika,’ ap kwipuk ayinau, kulondul yijil ya Nzamb.—Heb. 12:25.

⁶ Kubabesh kwinoku akusadidil kand pantaliken nich chibachikin cha ‘kulik’ kwitiy yisend yipaninay kudi in Kristu nlel. Tufanyidin kujijaman kuwanyish yisend yetu ya in Kristu ni kulam mushiku wetu mu mudimu wa Nzamb (Heb. 10:39) Kupwa kwa yawonsu, kuwanyish mudimu utumbila udi mulong wa mwom ni rufu.—1 Tim. 4: 16.

7, 8. (a) Chom ik chikeza kutukwash kulam mushiku wetu mu mudimu wa Nzamb? (b) Anch twashadish mushiku wetu wakusambish, chom ik tufanyidina kuvurik piur pa Yehova ni Yesu?

⁷ Chom ik chikeza kutukwash kwilam pantaliken ni kulik ayinetu kuwanyish yisend yetu kudi Nzamb? Njil yimwing ya usey mulong wa kurishish chibachikin chinech yidi kusutil ku kutongijokin pakad kujing pa kurumburik kwa kwipan kwetu. Cha usey, twamukana Yehova anch tukez kutek mu mwom wetu pa ndond ya kusambish kusal rusot rend, ni tusotin kulam kushilamu kwinoku. (Tang Mateu 16:24.) Chikwau kand, tuswiridin kwimik ni kwiyipul ayinetu anch: ‘Ov, nichidandamedin kwiyov anch nijijamedin kushakam kulondulijan ni kwipan kwam kudiay Nzamb mudi munasala pa chisu natambula dibabatish? Ap nashadishin kal mushiku wam wa pakusambish mu kusut kwa mivu?’

⁸ Anch kwishinshikin kwa kashinsh kwamekesh anch tusadil nich usweral mu mudimu wetu wa Yehova, tuwapidil kuvurik mazu ma dikasikesh malonday muprofet Sofoniy. Walonda anch: ‘Kangal walikumukany mu makas! Yehova Nzamb wen udi ni yenen. Ukash wend ukez kakukwashany kuyipandakan akankuny. Ukez kakusangareshany.’ (Sof. 3:16, 17) Mazu minam makasikeshina amasadila padiay Isarel wa pasak pachirikay ku Yerusalem kudiokal mu uswik mu Babilon. Pakwez, mazu minam machikwet usey wakin mulong wa antu a Nzamb nlel. Mulong mudimu tusadila udi mudimu wa Yehova, tufanyidin kulam mu manangu anch mwaad wau Yehova ni Mwanend atukwashin ni kutukasikesh chakwel tuwanyisha yisend yitu yitwinkishinay Nzamb. (Mat. 28:20; Fil. 4:13) Anch twikasikesh chakwel tudandamena kusal mudimu wa Nzamb nich mushiku, ndiy ukutukasikesh ni kutukwash kuya kurutu mu spiritu.

“Sambilany Bil Kusurib Want” Nich Mushiku

9, 10. Yom ik yilejena chishimu cha Yesu cha musambu ujim wa yakudia ya urel, ni dilejan ik tukutwisha kwilejin ku chinech?

⁹ Pandingay udil yakudia ku chikumbu cha mufaris umwing, Yesu wapana chishimu chimwing piur pa musambu ujim wa yakudia ya urel. Mu chishimu chinech, warumburila pa mutapu ujim uyitwishishinau antu kushalijan kulondul Want wa Mwiur. Wapana kand chilikej cha chom chirumburikina “kwiyingishil.” (Tang Luka 14:16-21.) Antu itau mu chishimu cha Yesu ita dilikishin anch kakwezap ku musambu. Umwing walonda anch uswiridin kuya akatala chir chalanday. Mukwau walonda anch walandin angomb akudim nich ni usotil kuya akayitala. Mukwau washalaku walonda anch: ‘Am namwatang kal mband chawiy nikutwiship kwez.’ Kwit dilikishin kwinoku kwadinga kwakad kufanyin. Muntu ulandining chir ap angomb chisu chivud ukat kuyishinshikin kurutu kwa kuyiland, chawiy lel chitinap kand kuswakej kujim kwa kuya kuyishinshikin kwinyim kwa kuyiland. Ni ov, mulong wak ufanyidina uruw wa katat kumukangesh muntu kwitiy diladikij dia usey mudi dined? Chishimokishenap anch mwin kuyiladikij mu chishimu wajimana nakash!

¹⁰ Atushalapol a Nzamb awonsu akutwish kwilej dilejan kusutil ku chishimu cha Yesu. Ov, dilejan ik? Kangal twalikidil milong ya muntu ni muntu ipend, mudi yijimbwilau mu chishimu cha Yesu, kwikal pa ndond ya kusambish kupandakanamu mudimu wetu wa Nzamb. Anch mwin Kristu katekinap midimu yend pa ndond yay yiyifanyidina, mushiku wend mu mudimu wa kulejan ukukep pakemp pakemp. (Tang Luka 8:14.) Chakwel kukangesh chinech kushiken, shakamany kukwatijan nich kubabesh kwa Yesu anch: “Sambilany bil kusurib want wend ni kutentam kwend.” (Mat. 6:33) Chikasikeshin mudi ik pa kuman anch antu a Nzamb—ansand ni amapal chilik chimwing—asadidil chiyul chinech cha usey! Chakin kamu, avud asendin chiyul cha kuswapej mwikadil wa mwom wau chakwel atwisha kutek yisu yivud mu mudimu wa kulejan. Ilejin kapamp kamwing anch kusurib bil Want nich mushiku kuletining musangar wa kashinsh ni kwiyov itiyikina.

11. Rusangu ik ra Bibil rilejena usey wa kusal mudimu wa Nzamb nich muchim wawonsu ni mushiku?

¹¹ Chakwel kwilikej usey wa kusal mudimu wa Nzamb nich mushiku, shinshikin mulong umwing washikena mu mwom wa Mwant Jewas wa Isarel. Pamanay anch Isarel ukutwish kuwil mu makas ma in Siria, Jewas weza kudiay Elisha wamudidil. Muprofet wamuleja kwasin pa kapend kutadish ku mutambu wa Siria, chamekeshina kupandakan kudiay Yehova pantaliken ni muchid winiwa. Chakin kamu chinech chafanyina kumukasikesh mwant. Kupwa Elisha wamuleja Jewas kusend jinseu jend ni kujibul pansh. Jowas wajibula pansh tupamp tusatu. Pa chinech Elisha wova kuyip, mulong wa kubul pansh tupamp tutan ap musamban kwela kurumburik “kuyibul ni Siria, djat kamu ni pakupwilau.” Katat Jowas watwisha kuyipandakan tupamp tusatu kusu pakad kuyipwish. Mulong wasala pakad mushiku, kuyipandakan kwa Jowas kwadinga nich mipak. (2 Ant 13:14-19, MN) Dilejan ik tukutwisha kwilejin ku rusangu riner? Yehova ukez katuyukish nakash ching kusu anch twasal mudimu wend nich muchim wetu wawonsu nich mushiku.

12. (a) Chom ik chikutukwasha kulam mushiku wetu mu mudimu wa Nzamb piturishina nich yikokujol ya mwom? (b) Rumburil mutapu ukata kutambul ukwash wa kwikal ukwatikena mu mudimu

¹² Yikokujol ya mwom yitekin mu choziu mushiku wetu ni kulamat kwetu ku mudimu wa Nzamb. Akadivar avud ni anambaz akat kurish nich mwikadil wa mar ma kutan nfalang. Akwau kasangerap mulong mayej makash mayikangeshin kusal yom yitwishikina kudiawiy kusal mu mudimu wa Yehova. Pakwez, etu awonsu tukutwish kusal chakwel tushinshikina anch tulamin mushiku wetu ni tudandamedin kumulondul rawonsu Kristu. Shinshikin amboku yimwing ya yiyul ni mifund yirijekinau mu mushet “Yom ik Yikeza Kukukwash Kudandamen Kumulondul Kristu?” Shishikin mutapu ukutwisha kuyisadil mu mutapu ujim. Anch wasal, ukez kangul yiyukish yakin. Kwikal akwatikena mu mudimu wa kuleja kukweting padi etu usu wa kujikish, kupitishin mwom wetu, ni kutuletidin chisambu ni musangar. (1 Kor. 15:58) Chikwau kand, kusal mudimu wa Nzamb ni muchim wawonsu kutukwashin mu ‘kuchingel dichuku dikurumburishay Nzamb.’—2 Pita 3:12.

Shinshikin Chakin Kamu Mikadil Yey

13. Mutapu ik tukutwisha kujingunin chirumburikina kudi etu kusal nich muchim wawonsu?

¹³ Pakwez, chiwapidil kuvurik anch kusal nich muchim wawonsu udiap mulong utadila uvud wa chisu tusadila mu mudimu. Mikadil ya muntu ni muntu yishalijadin. Muntu usadila saa umwing ap asaa aad ngond ni ngond mu mudimu wa chingand ukutwish kwikal umusangareshina Yehova anch awiy chakin kamu asaa awonsu atwishinay kusal mulong wa ukash wa mujimbu wend. (Ilikej ni Mar. 12:41-44.) Chawiy lel, chakwel tujinguninany chirumburikina kudi etu kumusadil Nzamb nich muchim wawosu, tuswiridin kushinshikin chakin kamu piur pa ukaliweny wetu ni mikadil yetu. Chitudia in kumulondul Kristu, tuswiridin kand kurijek chitongijok chetu ni chendendiy. (Tang Rome 15:5; 1 Kor. 2:16) Chom ik chatekay Yesu pandond ya kusambish mu mwom wend? Wachileja chisak cha antu mu Kapernaum anch: “Am niwapidil kulejan rusangu ruwamp ra want mu mal makwau kand, mulong chawiy chantuminau.” (Luka 4:43; Yoh. 18:37) Nich kutongijokin pa mushiku wa Yesu mu mudimu wend, shinshikin mikadil yey chakwel kutal anch ukutwish kusal yivud mu mudimu wey.—1 Kor. 11:1.

14. Mwinjil ik yikwau tukutwisha kujimbish mudimu wetu?

¹⁴ Kushinshikin kwakin pa mikadil yetu kukutwish kutushikij ku kulond anch tufanyidin kuvudish chisu tusadila mu mudimu. (Mat. 9:37, 38) Chilakej, tunan tuvud twa ansand apwishina shikol machuku minam ajimbishin mudimu wau ni amen katat musangar udiokila ku kusal nich mushiku mudimu wa uchibol. Ov, ukutwish niyey kuman musangar mudi winou? Akadivar amwing ni anambaz ashinshikina mikadil yau ni akwata mupak anch akutwish kuya kwindond kanang mwi ngand yau, ap kand kuya mwi ngand yayen, mudia maswir majim ma in kulejan a Want. Pakwez akwau ileja ridim rikwau chakwel kuyikwash angedj arilondina. Ap anch kujimbish mudimu wetu kukutwish kukasikan, kuletin yiyukish yivud, ni tukuyikwash antu akwau avud “kwez ku kwijik uyakin.”—1 Tim. 2:3, 4; 2 Kor. 9:6.

Chilikej cha Bibil cha Kulondul

15, 16. Chilikej ik tukutwisha kwimburij mu kwikal in kumulondul Kristu akweta mushiku?

¹⁵ Mutapu ik wakulau amwing ashikena ku kwikal atwimbuy payitazukay Krisu kwikal in kumulondul? Piur pa Mateu, rusangu rilondil anch: “Ndiy walika yawonsu, watumbuk wamulondul.” (Luka 5:27, 28) Piur pa Pita ni Andre, adinga ayibind a anch, tutangin anch: “Aswakala kusha mand, amulondula.” Kupwa Yesu wamumana Yakob nenday Yohan, adinga akat kuchimijol mand mau pamwing ni tatukwau. Mutapu ik wakulau ku diladikij dia Yesu? “Awiy aswakal kusha wat ni tatukwau, amulondula.”—Mat. 4:18-22.

¹⁶ Chilikej chikwau chiwamp chidi cha Saul, wikala kambuy Paul. Ap anch wadinga kabwebu mwin kuyipompat in kumulondul Kristu, wakarumuna mwikadil wend ni wikala “chom chitondilau cha kusal nich” chakwel ijikisha dijin dia Kristu. “Kukashimuk ndiy [Paul] wamulejan Yesu mu masinagog anch udi Mwan a Nzamb.” (Mid. 9:3-22) Ni chikalap nchik kujijaman kwend yikokujol ya kuburen kwa nfalang ni rupompat rikash, Paul kashadishap ap pakemp mushiku wend.—2 Kor. 11:23-29; 12:15.

17. (a) Risu rusot rey pantaliken nich kumulondul Kristu? (b) Yiyukish ik tutambwila mulong wa kusal rusot ra Yehova nich muchim wetu wawonsu ni usu wetu wawonsu?

¹⁷ Chakin kamu tuwapidil kwimburij yilikej yiwamp ya in kwilej inay ni kwakul kapamp kamwing ni pakad kwidjidjek. (Heb. 6:11, 12) Ov, yiyukish ik tutambwila pitudandamedina kukasikesh kumulondul Kristu nich mushiku ni rawonsu? Tutanin musangar wa kashinsh mu kusal rusot ra Nzamb ni tumen musangar udiokila ku kwitiy yisend yikwau ya mudimu ni midimu mu chikumangen. (Kus. 40:8; tang 1 Tesalonika 4:1.) Mwawiy, pitukasikeshina kwiyijidish mu kumulondul Kristu, tutambwil yiyukish mudi yiney yivud mudi chisambu cha mu manangu, musangar, kusanger yitukweta, kwitiyik kwa Nzamb, ni ruchingej ra mwom wa chikupu.—1 Tim. 4:10.

Ov, Uvurikin?

• Mudimu ik wa usey utwinkishinau kusal, ni mutapu ik tufanyidina kuuman?

• Ov, tufanyidin kwilam ku yibachikin ik ya untu, ni mulong wak?

• Ov, mutapu ik tufanyidina kwishinshikin chakin kamu?

• Chom ik chikeza kutukwash kudandamen kumulondul Kristu?

[Kamushet/Chipich chidia pa paj wa 31]

Yom ik Yikeza Kukukwash Kudandamen Kumulondul Kristu?

▪ Tang Dizu dia Nzamb pichiku ni pichuku, ni tongijokin pa yom utangina.—Kus. 1:1-3; 1 Tim. 4:15.

▪ Lembil chisu chawonsu mulong wa kwit ukwash ni umutakel wa spiritu wa Nzamb.—Zak. 4:6; Luka 11:9, 13.

▪ Ikal murund wa antu amekeshina mushiku wa kashinsh mu mudimu.—Jinsw. 13:20; Heb. 10:24, 25.

▪ Jingunin kuswapej kwa chirung chiushichany.—Efes 5:15, 16.

▪ Ijik nawamp yibudikin yikash ya ‘kulik.’—Luka 9:59-62.

▪ Mekesh pakad kujing kwipan kwey ni yiyukish yipandakena kuvul yidiokila ku kumusadil Yehova ni kumulondul Kristu ni muchim wawonsu.—Kus. 116:12-14; 133:3; Jinsw. 10:22.