“Ikalany ni Mushiku mu Muchim”

1. Mudimu wetu wa kulejan ufanyidin wikala nich yom ik?

¹ Kwikil mutapu wa mudimu wetu wa Ukristu ufanyidina kwikal wiminya ndond yimwing. Mulong atukasikeshin chakwel ‘twikala ni mushiku mu muchim’ ni ‘tumusadilany Nzamb.’ (Rome 12:11) Pakwez, kudi yom yivud yikutwisha kukepish mushiku wetu mulong wa mudimu wetu wa kulejan. Mutapu ik tukutwisha ‘kulangwish’ mushiku wetu ni kusanger mudimu wetu wa Want?—2 Tim. 1:6, 7.

2. Kwilej kwetu Bibil kukwet usu ik pa mushiku wetu wa kusal mudimu wa kulejan?

² Kwilej Kwey Bibil: Mwin kulejan Want mukash udi muntu ukatininga chijil cha Nzamb ni ukat kusangaredin nakash uyakin utaninayimu. (Kus. 119:97) Pitukata kujingunin uyakin udia mu Bibil pa chisu twilejininga ayinetu, ubachikining michim yetu ni kuvuvurish mushiku wetu. Kumukat Musul wa uyakin winou ni impu yetu ya kusot kuyilej antu akwau rusangu ruwamp kutubachikining ku kumushiman Nzamb ni kulejan dijin diend patok. (Heb. 13:15) Chakin kamu, kulejan rusangu ruwamp mudi muridia kulejening kusanger kwetu kujim kwa usey wau.

3. Mutapu ik ukutwishay spiritu wa Nzamb kwikal nich usu mu mudimu wetu wa kulejan?

³ It Spiritu wa Nzamb: Kitukatap kuwanyish mudimu ukash wa kulejan nich usu wetu ayinetu. Mushiku wakin udiokiling ku spiritu wa Nzamb. (1 Pita 4:11) Kusejin piswimp ni musul wa “usu” kukez kutwikadish ajijamena muspiritu mulong wa kulejan nich mushiku. (Isay 40:26, 29-31) Pamanay kambuy Paul mar mu mudimu wend wa kulejan, ‘Nzamb wamukwasha.’ (Midimu 26:21, 22) Spiritu utumbila wa usu wa Yehova ukutwish watukwash twikala ni mushiku mu mudimu wetu wa kulejan, chawiy tufanyidina kumwilembil atwinkishay.—Luka 11:9-13.

4. Mushiku ukutwish walet yibudikin ik yiwamp, pakwez yom ik tufanyidina kubabel?

⁴ Chisu ni chisu, mushiku ukash wa kulejan Want ukutwish waletish mushiku ujim mukach mwa akwetu in Kristu. (2 Kor. 9:2) Mu teritwar, antu itiyijining nakash uruu ulejenau nich musangar ni kashinsh kawonsu. Pakwez, mushiku, ufanyidin kuya pamwing ni nkeu ni kwitudish. (Titus 3:2) Tusotining chisu chawonsu, kumulimish mwin chikumbu ni kulimish want ipend wend wa kutond.

5. Chiyul ik chapepilau chitufanyidina kusal usu chakwel tuchisadila?

⁵ Chitudia in kulejan a Want, el twikalany chisu chawonsu “ni mushiku mu muchim.” El tukudishany mushiku kusutil ku kwilej kwetu Bibil ni ku kumulembil Yehova ni mushiku, mulong ndiy ukutwish watwinkish usu wa spiritu utumbila. Mwi njil yiney, tukutwish twawanyish nich mushiku mudimu wetu wa kulejan ‘ni spiritu utumbila, ni kushinshik kukash.’—1 Tes. 1:5.