Tufanyidin Kulam Mushiku Wetu mu Mudimu
1 Muvu ni muvu kudiosh pa muvu wa 1992, Atuman a Yehova asadin asaa miliyar umwing ni kusut mu mudimu wa kulejan Want ni wa kwikadish in kwilej mu mangand mawonsu. Ov, tukwet musangar mudi ik pa kwikal nich chisend chikemp mu mudimu winou wamushena!—Mat. 28:19, 20.
2 Chakin kamu, kujikitish kwawonsu ni katumb yidi ya Yehova, watulama mu mudimu wetu mu “machuku ... [ma] yom yikash.” (2 Tim. 3:1) Yik yitwitinau kusal anch tusotin kudandamen kusal mudimu winou wa usey nich mushiku?
3 Mufulandal wa Mushiku: Rukat ripandikena ra Nzamb ni mutej netu, nich rusot ridiokila ku muchim ra kushakam kwambatan nich kwipan kwetu, yitubachikin tusala mudimu wetu wa Want. (Mat. 22:37-39; 1 Yohan 5:3) Rukat ritubachikin kwipan chakwel tusala nakash mudimu wa kulejan.—Luka 9:23.
4 Salany Usu Chakwel Ulamany Mushiku: Mukankuny netu Djabul usadin usu wawonsu mulong wa kukepish mushiku wetu mu mudimu. Kuburen kusanger kwa antu adia mu teritwar, kuzuwol kwa mangand minam, yikokujol ya dichuku ni dichuku, ni kuyip kwa ukash wetu wa mujimbu, yawiy yom yikemp pakach pa yom yisadidinay mulong wa kutuchirish kwinyim.
5 Pakwez, tufanyidin kusal usu ukash chakwel tulama mushiku wetu ukash. Chidi cha usey kudi etu anch twakudish “rukat [ritwadinga] nich pakusambish.” Mudi kutang ni kutongijokin pa Dizu dia Nzamb, Bibil, ni kwisakin ayinetu mu yakudia yawonsu ya muspiritu ya “kashalapol ushishamena ni kubabal.”—Kubur. 2:4; Mat. 24:45; Kus. 119:97.
6 Mudi mulejenau patok mu uprofet wawonsu wa Bibil, dichuku dia Yehova dikezay kuyishesh antu ayimp dishejin piswimp nakash. (2 Pit. 2:3; 3:10) Pitwija nawamp yom yiney, tusalany amboku usu ukash chakwel tulama mushiku wetu mu mudimu, kusutil ku kwipan nakash mu mudimu wa kulejan Want ni wa kwikadish in kwilej mu mangand mawonsu uyila katat kurutu!