Uman wa mu Mikombil Ukweta Mabuj
1. Ov, wisu mutapu umwing tukutwisha kumwimburij Yesu?
1 Chisu chasalay mudimu wend wa kulejan panap pansh, Yesu kidjidjekiningap kulond nich antu atanijanay nau mwi njil ni mu jindond jikwau jidingau antu avud. (Luka 9:57-61; Yoh. 4:7) Ndiy wasota kulejan uruu wend wa usey kudi antu avud anch chitwishikin. Nlel unou, uman wa mu mikombil udi mutapu umwing upandaken kuwamp wa kuyikwash antu kushiken kutambul manangu ma Nzamb. (Jinsw. 1:20) Kupandakan kwetu kukez kuwap anch twikala a kusambish ku kuyisejin antu ni twasadin njingunin.
2. Ov, mutapu ik kwikal wa kusambish kutukwashin pa chisu tusadina mudimu wa mu mikombil?
2 Ikal wa Kusambish: Chiwapining chisu chivud kuyisejin antu pa ndond pa kwiman ap kushakam mwi ndond yimwing uchingedin in kusut chakwel isamba ney. Pakwez, chifanyidin kusipaku pakemp, kumutal muntu pa mes, ni kwitudish, mu mwikadil wa urund. Anch usadin mudimu ni in kulejan akwau, chiwapining yisu yivud kwisamb ni antu umwing ni umwing. Kwikal wa kusambish kwitin kand kulondul yisakin utanina. Anch chifanyidin, kupwa kwa mambamb, ipul nawamp mutapu ukutwisha kumanijan kakwau ni muntu winou. In kulejan amwing akat kusal chisu ni chisu mudimu wa mu mikombil pa ndond yimwing, yikuyikwasha chakwel isamba ni antu amwing chisu ni chisu ni adandamen kukudish musangar wau.
3. Ov, mutapu ik tufanyidin kusadil njingunin chisu tupanina uman mu mikombil?
3 Sadil Njingunin: Sadil nawamp mu manangu pa kukwat mupak piur pa ndond ya kwimanyin mu mukombil ni muntu ukwambamb nend. Chiswiridinap kupan uman kudi muntu wawonsu usutina. Ikal mwin kushinshikin yom. Chilakej, anch muntu usotin kulond swa, chitwishikin kumulik asut. Chisu upanina uman kurutu kwa ndond ya winsak, ikal muntu ubabel kamu mudi ukat kwipuk kumwovish yakamish piur pa milong ya ntakel wa winsak. Chiwapining yisu yivud kupan uman kudi antu apwish kal ni midimu ya kwisak pa ndond pa kupan kudi awiy akat kusambish. Yishejina antu mu mutapu ukezap kuyakamish ap kuyichinish. Chikwau kand, ikal mwin kujingunin chisu upanin mikand. Anch amekesh musangar ukemp, ufanyidin kumwinkish trakt pa ndond pa magazet.
4. Ov, mulong wak kupan uman wa mu mikombil udi mutapu umwing wa usey ni usangareshina?
4 Kupan uman mu mikombil kukutwishish kupalangesh mbut ja uyakin mu chisu chikemp kusu. (Mul. 11:6) Antu amwing tutanina akutwish ap kwikal awiy tufanyidinap kutan ku yikumbu yau chisu tusadina mudimu wa ku chikumbu ni chikumbu. Ov, mulong wak ukutwishap witenchik chakwel wasambish kupan uman wa mu mikombil, udi mutapu umwing usangarishina ni ukwet mabuj wa mudimu wa chingand?