Yiwanyishina Mudimu Wetu
1. Mutapu ik umenay Yehova mudimu wetu, ni mutapu ik wakwilau antu?
1 Dizu dia Nzamb dirumburil in Kristu mud antu akata kwend mu kupandakan mu mudimu wa Yehova, mud kusutil mu kuwin kwa atubar. (2 Kor. 2: 14-16) Pitwijikishina ronganyin ra Nzamb, milambu ya mudimu wetu yidi mud diseng dia malash dimusangareshina Yehova. Antu amwing ayipwitidin ku rupwembu ra rusangu ruwamp; akwau akat kurilik. Pakwez chakul chakad kufanyin cha avud chirumburikinap anch mudimu wetu usadilap chom. Tushinshikany yiwanyishina mudimu wetu.
2. Ov, mudimu wetu ututwishishin kumekesh yom ik?
2 Umutumbishin Yehova: Satan ukat kulond anch akaantu amusadidil Yehova mulong wa mayingish ma yifu. (Job 1:9-11) Mudimu wa Ukristu utwinkishin mutapu wa kumekesh anch kwipan kwetu kud Nzamb kudi kwa kashinsh. Atutwambil avud adandamedin kuziyil kwi mbil ya kulejan ni kusal in kwilej kwikalap nchik mikadil yikash ya pakampwil ap kadiwij ka antu avud. Kudandamen kwipan mud kwinoku kusangareshin muchim wa Yehova!—Jinsw. 27:11.
3. Mulong wak chidi cha usey kud etu kudandamen kwijikish dijin dia Nzamb ni rutong rend?
3 Chikwau, mudimu wetu uwanyishin rutong ra Nzamb. Mu kukwatijan nich kusheshik kwezina kwa mangand ma Satan, Yehova ulondil anch: ‘Michid yikez kwijik anch yam Yehova.’ (Ezek. 39:7) Chakwel anch michid yijika chinech, chidi cha usey anch atushalapol a Nzamb adandamen kulejan dijin diend ni rutong rend “kudi michid yawonsu, ni majuku, ni jindim, ni antu.”—Kuj. 14:6, 7.
4. Mudimu wa kulejan udi dishin dia dirumburish mu mutapu ik?
4 Dishin dia Dirumburish: Kulejan kwa rusangu ruwamp kudi kand dishin dia dirumburish. Mupostol Paul walonda anch Kristu Yesu ukufundakesh kudi “awiy akad kumwijik Nzamb, ni kudi awiy akad kuziyil katumb kawamp ka Nsalejetu Yesu.” (2 Tes. 1:8, 9) Antu akuyirumburish kulondwish nich mutapu ukwakulau ku rusangu ruwamp. Atushalapol a Nzamb akwet kamu chakin chisend chijim nakash! Chakwel twipuka chikal cha mash, tufanyidinap kwimik kwijikish uruu wa Want upandishina-mwom.—Midimu 20:26, 27.
5. Mutapu ik umekena riy ra Nzamb mu mudimu wetu?
5 Usu wetu wa kudandamedin kusal mulong wa kuyikwash amutej netu kwitapil dilau dia Nzamb udi chimekesh cha riy ra Yehova. (1 Tim. 2:3, 4) Chitwija anch mwom wa antu udandamedin kuswimp, tukat kuyendin chisu ni chisu ni kuyikasikesh kumukimb Yehova pikuchidia chisu ap. Mu kusal mwamu, tumekeshin “muchim wa riy wa Nzamb wetu,” ndiy “kasotilip kal umwing ajiya, pakwez usotil amwing akarumun michim yau.”—Luka 1:78; 2 Pi. 3:9.
6. Kwikal akwatikena mu mudimu wa Yehova kutukwashin nchik?
6 Utukwashin Ayinetu: Kwikal akwatiken mu mudimu wa Yehova didi diking kud etu. Kutukwashin kulam ‘kumekan kwa dichuku dia Yehova’ ni kwipuk kwikal adimbinau ku ditenchik dia yom diyimp dia katat. (2 Pi. 3:11-14; Titus 2:11, 12) Chawiy lel, twikalany amboku iminya “dang, akad kushemunik, akweta chisu chawonsu yivud ya kusal mu mudimu wa Mwant,” ni kwijik anch usu tusadila mu mudimu wa Ukristu udiap wamwamu.—1 Kor. 15:58.