Mekesh Kusanger kwa Pakampwil—Ku Kwipul Yipul ni Kutesh
1 Antu avud akat kusangar kubudish yitongijok yau pakwez akisin kwilej ap kuyipompish. Chawiy lel, chitudia atushalapol in Kristu, tuswiridin kwilej kwikal in nkeu mu kusadil yipul mulong wa kwijik kubudish yitongijok ya antu.—Jinsw. 20:5.
2 Yipul yetu yifanyidin kumubachik muntu kutong—, kangal ku kumwovish wom. Chisu chilejenay ku chikumbu ni chikumbu, mukadivar umwing wipul anch: “Ey utongin anch kukez kwikal chisu chikezau antu kukwatijan nich usey ni kalimish?” Kukwatijan nich chakul, ndiy wipula kand anch: “Utongin anch yom ik yifanyidina kusal chakwel kuwanyish chinech?” ap “Mulong wak utongina mwamu?” Chisu chilejenay kwa kukashimun ni mu jindond ja antu awonsu, mukadivar mukwau ukuyipul akweta an anch, “Yom ik yikusangareshinanya nakash mulong wa kwikal anvaj?” Kupwa wipul anch: “Yom ik yikwakamishinanya nakash?” Tal anch yipul yiney yayitwishishin antu kubudish yitongijok yau pakad kuyitek pa mantant. Mulong mikadil yikat kuswimp, tuswiridin kurijek mutu wa mulong ni mulad wa yipul yetu chakwel kukwatijan ni antu adia mu teritwar wetu.
3 Yilika Antu Alond: Anch antu asotil kukulej yitongijok yau, tesh ni kushimpish pakad kusot kuyikaturij. (Jak. 1:19) Jikitish kurumburil kwau nich ranaken. (Kol. 4:6) Ukutwish kwey walond anch: “Chiwamp. Wajikitish wanlejap kal chom chinech.” Yijikitisha anch ukutwish kusal mwamu nich muchim umwing. Ipul nawamp yipul yikwau chakwel kujingunin yitonginau ni mulong wak. Kimb mufulandal wa yisakin yau. Chisu usotila kupwitin manangu mau ku mufund, ukutwish walonda anch, “Washinshikidinap kal chom chinech anch chikutwishik?” Ipuk kwikal mwin kushindil ni mwin ntad.—2 Tim. 2:24, 25.
4 Mutapu wakwilau akwetu ku yipul yetu ukutwish kwimen nakash pa mutapu tuteshina. Antu akutwish kulond anch tukat kutesh kwa kashinsh. Kalam umwing mwin kwendangan wamana anch, “Chisu umekeshina kushimpish ni kusot kuyitesh antu, kukwet usu wa kupwit ushimokishina ni chidi chimekesh chiwamp nakash cha kusanger kwa pakampwil kwa chirungul.” Kuyitesh akwetu kuyinkishin kalimish, ni kukutwish kuyibachik kutesh rusangu ruwamp tusotila kuyilej.—Rom 12:10.