Sadil Yom Yimekena ni mes Yilejena
1. Mutapu ik wasadilay Yehova yom yimekena ni mes chakwel kuyilej atushalapol end a pakur, ni kwikala chibudikin ik?
1 Chakwel kwijikish rusangu ra usey kud atushalapol end a pakur, yisu yimwing Yehova wasadila yishimushimu ni yilat. Tongin pa chishimushimu cha Ezekiel cha ditemb dia mwiur dia Yehova. (Ezek. 1:1-28) Tong mutapu wovay Daniel kupwa kwa kutambul chilat cha uprofet chirumburila kwend kwa makand ma mangand. (Dan. 7:1-15, 28) Ing yidi nchik piur pa kuburik kukasikeshina kwamulejau mupostol Yohan ‘mu yijingidij’ piur pa yom yela kusadik mu “dichuku dia Mwant”? (Kuj. 1:1, 10) Yehova wayileja mu kusadil chipich chitamukina ni chisal cha usu, ni kayivuramenap mu manangu mau.
2. Yom ik yimekena ni mes tukutwisha kusadil chakwel kuyilej akwetu uyakin wa Bibil?
2 Anch tusotil kurumburil uyakin wa Bibil kud akwetu nich chibachikin cha kulik kuvuramen swa, tukutwish chilik chimwing kusadil mavideo metu malejena. Mavideo metu makwet mitu ya milong kushalijan ni makasikeshin ruchingej mu Bibil, mu dirijek dia Yehova, ni mu yijidik yikwashina mwom wa Ukristu. Shinshikin mitapu yikemp tukutwisha kusadil mavideo metu chakwel kulejan. Yilondwila ey yidi yilakej ya mavideo tukutwisha kusadil.
3. Yom ik ukutwisha kusadil chakwel kumutwal mwin kwilej Bibil ku dirijek?
3 Mu Mudimu: Ov, wamuleja kal mwin kwilej Bibil piur pa ukadivar wetu wa Ukristu wa ngand ya kabuj? Mulejau kusutil ku kutal band video Toute la communauté de frères. Mwinkishay chakwel amutal kurutu kwa dilejan dien diambakedina ap kumutal nend pamwing chisu cha chikunku chezina. Kupwa isambinany yipul ya dichirikin yidia mu Mudimu Wetu wa Want wa Kalol 2002.
4. Yom ik yilejena yikutwishau kusadil Atuman ansand ku shikol?
4 Ansand, ukutwishany kwit kud alej en mulong wa kuyilej akwen ansand a shikol maprogram ma video La fermeté des Témoins de Jéhovah face à la persécution Nazie ap Fidèles dans les épreuves — Les Témoins de Jéhovah en Union Soviétique. Itany chakwel kurijek dipaper dia yipul, kulondwish ku yipul ya minsamb ya shikol mu Mudimu Wetu wa Want wa Kalol 2001.
5. Yom ik yidiaku mulong wa anvaj kusadil pa malejan ma dijuku?
5 Mu Dijuku ni Arund: Anvaj, tongany pasut kal machuku minch kudiosh kwatadilau anen video Les jeunes s’interrogent — Comment se faire des vrais amis ? Ukutwishanyap kand kumutal ku dilejan dien dia dijuku dilondwila? Mudimu Wetu wa Want wa Mwinkind 2002 ukwet yipul ya minsamb ya usu ni ya kashinsh.
6. Mutapu ik ukutwishanya kwirijek mulong wa chisu chikasikeshina nau arund?
6 Mu chikumangen mudi arund usotila kutazuk kwol kwey? Kutal pamwing video Respectons l’autorié de Jéhovah ukutwish kusal mulong wa urel ukasikeshina, nakash anch washinshikinany kwinyim malejan malejenau, mu kusadil yipul yipanginau mu Mudimu Wetu wa Want wa Mwinses 2004.
7. Mitapu ik yitwishikina ukutwisha kutong kusadil mulong wa mavideo metu?
7 Mitapu Yikwau: Mutapu ik ukutwisha kand kusadil mavideo metu mashalijadina 20? Ov, kulejan umwing wa mavideo ap maad kud muntu ukata kuya ni kutal chisu ni chisu kukutwish kumukwash kuya kurutu muspiritu? Ov, ukutwish kwit kulejan mavideo ku rupital ap kwi ndond yitekinau mulong wa mijikit ya antu amapal? Ov, mavideo makutwish kwikal nich chibudikin chiwamp kud anamakwetu akad kwikal Atuman, amutej, ni ambay a mudimu? Mavideo metu madi ma usu, malejen, ni madi ukwash wa mes wa usey. Masadila mulong wa kulejan.