Usu wa Maband Video Makata Kupan Uman
1 “Mwanetu ikundj wading ni kutal band video padingay kand kal asambisha kwend. Ndiy wamutala tupamp tuvud. Chipandiken kuwap mud ik kwikal nich yom yiney ya mudimu yikata kwandjik rukat ra Yehova mud anetu!” Ov nvaj winou mwin Kristu wadinga ni kwisambin band ik umwing? Ndiy wadinga ni kwisambin band video ukweta mutu wa mulong Noé: il marchait avec Dieu. Maku umwing wakad kwikal Kaman ukweta mwanend watala band video wa Noé ku chikumbu chayen watuma mulambu wa 90 $ (dollars) ku biro wa mutiy ni kwipul anch tukwet kand maband video makwau mulong wa an. Maband video mabudishina dirijek dia Yehova makwet usu padi ansand nau amakurump.
2 Mu Dijuku: Kupwa kwa dijuku dimwing dia Atuman kutal band video La fermeté des Témoins de Jéhovah face à la persécution nazie, maku walonda anch: “Natongijoka muten wawonsu wa kabuj mutapu wayitwishishay Yehova antu amwamu kujijaman mu yom yiney yikash! Kutongijokin pa chinech kwanvurisha kuman anch yikokujol yam yading kwau yikemp nakash. Kutal band video winou pamwing ni anetu kwayikwasha kuman nawamp nakash kuswir kwa kwengamin padi Yehova. Mu kumwisambin nau pamwing kupwa kwa kumutal, kwayikwashin anetu amband kwikal awanyishinau nawamp chakwel kupwish yipwichik ni kuzengol kwawonsu kukutwishau kusankan.”
3 Ku Shikol: Mud chikunku cha rapor umwing, Kaman umwing wa dikum dia mivu watwisha kulejan chikunku cha band video La fermeté mu kalas kau. Pa kusambish, mulej wadinga ni kulond anch ndiy kayikatiningap Atuman. Kupwa kwa kutal band video, walonda anch: “Chinech chakarumuna kamu mutapu wam wa kuyiman Atuman’a Yehova. Nashilamu kal anch ez kand kwol kwam, nikez kuyitesh ni kusambish kwilej nau Baibel!” Ov chom ik chakarumuna yitongijok yend piur petwetu? Ndiy walonda anch chading “rukat retu ra kashinsh ni kushinshaman kwetu.”
4 Mu Mudimu wa Kulejan: Nambaz umwing wasankana mband umwing ap anch chadingay ni kwidjidjek chakwel kwitiy mikand, ndiy wadinga ni kwiyipul yipul piur petu ni yitiyij yetu. Nambaz wamuchirikina nich band video Les Témoins de Jéhovah: un nom, une organisation ni amutala pamwing nend mband mwinou ni nfumwend. Ashimoka awonsu aad ni itiya kwilej Baibel. Mud chibudikin cha uman uwamp wayinkishau, asambisha kwambatanish mwom wau nich rusot ra Nzamb.
5 Ov ukat kusadilang maband video metu mud kamu chitwishikina?